ابوامامہ بن سہل رضی اللہ عنہ فرماتے ہیں: جب رسول اللہ صلی اللہ علیہ وسلم غزوہ بدر سے فارغ ہوئے تو دو آدمیوں کو بھیجا تاکہ وہ اہل مدینہ کو فتح کی خوشخبری سنا دیں، ان میں زید بن حارثہ رضی اللہ عنہ زیریں علاقہ کے لوگوں کی جانب بھیجا اور سیدنا عبداللہ بن رواحہ رضی اللہ عنہ کو مدینہ کے بالائی علاقے والوں کے لئے خوشخبری سنانے کے واسطے بھیجا۔ چنانچہ زید بن حارثہ رضی اللہ عنہ نے اپنے بیٹے اسامہ رضی اللہ عنہ کی موافقت کی، کیونکہ وہ رسول اللہ صلی اللہ علیہ وسلم کی صاحبزادی سیدہ رقیہ رضی اللہ عنہا کی تدفین میں مصروف تھے (نبی اکرم صلی اللہ علیہ وسلم نے سیدنا عثمان رضی اللہ عنہ اور سیدنا اسامہ بن زید رضی اللہ عنہ کو سیدہ رقیہ کی تیمارداری کے لئے جنگ بدر میں شرکت سے روک دیا تھا۔ شفیق) جب سیدنا زید رضی اللہ عنہ وہاں آئے تو سیدنا اسامہ رضی اللہ عنہ سے کہا گیا کہ وہ تمہارے والد آ رہے ہیں، اسامہ رضی اللہ عنہ فرماتے ہیں: میں آیا تو وہ لوگوں کے سامنے کھڑے تھے اور کہہ رہے تھے: عتبہ بن ربیعہ مارا گیا، شیبہ بن ربیعہ بھی مارا گیا، اور ابوجہل بن ہشام بھی مارا گیا، (حجاج کے دونوں بیٹے) نبیہ اور منبہ بھی مارے گئے اور امیہ بن خلف بھی قتل ہو گیا۔ میں کہا: ابا جان! کیا یہ واقعی سچ ہے؟ سیدنا زید رضی اللہ عنہ سے فرمایا: ہاں، اے میرے بیٹے! یہ سچ ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5025]