ام المومنین سیدہ عائشہ رضی اللہ عنہا فرماتی ہیں: جب اہل مکہ اپنے قیدیوں کے فدیے دینے آئے تو سیدہ زینب بنت رسول الله صلی اللہ علیہ وسلم نے ابوالعاص کا فدیہ بھیجا اور اس میں وہ ہار بھیجا جو ان کی رخصتی کے وقت ام المومنین سیدہ خدیجہ رضی اللہ عنہا نے ان کو پہنایا تھا۔ جب رسول الله صلی اللہ علیہ وسلم نے اس ہار کو دیکھا تو آپ پر بہت شدید رقت طاری ہو گئی، آپ نے فرمایا: اگر تم مناسب سمجھو تو زینب کے قیدی کو چھوڑ دو اور اس کا ہار بھی واپس بھیج دو۔ صحابہ کرام رضی اللہ عنہم نے سر تسلیم خم کیا اور سیدہ زینب رضی اللہ عنہا کا ہار واپس بھیج دیا۔ اس موقع پر سیدنا عباس رضی اللہ عنہ نے کہا: یا رسول الله صلی اللہ علیہ وسلم ! میں تو مسلمان تھا، رسول اللہ صلی اللہ علیہ وسلم نے فرمایا: میں تمہارے اسلام کو بہتر جانتا ہوں اگر بات اسی طرح ہوئی جیسے تم کہہ رہے ہو تو اللہ تعالیٰ تمہیں اس کی جزاء دے گا۔ تم اپنا بھی فدیہ دو اور اپنے دونوں بھتیجوں نوفل بن حارث بن عبدالمطلب اور عقیل بن ابی طالب بن عبدالمطلب کا بھی فدیہ دو اور اپنے حلیف عتبہ بن عمرو بن جحدم بنی حارث بن فہر کے بھائی کا بھی فدیہ دو۔ سیدنا عباس رضی اللہ عنہ نے کہا: یا رسول اللہ صلی اللہ علیہ وسلم میرے پاس تو کچھ بھی نہیں ہے۔ رسول الله صلی اللہ علیہ وسلم نے فرمایا: وہ مال کہاں ہے جو تم نے اور ام فضل نے دفن کیا ہے؟ اور تو نے ام الفضل سے کہا تھا کہ اگر میں جنگ میں شہید ہو جاؤں تو یہ فضل کی اولادوں کو اور عبداللہ کو اور قثم کو دینا۔ سیدنا عباس رضی اللہ عنہ نے کہا: یا رسول الله صلی اللہ علیہ وسلم اللہ کی قسم! میں گواہی دیتا ہوں، بے شک آپ اللہ کے رسول ہیں۔ یہ وہ بات تھی جس کو میرے اور ام الفضل کے سوا دوسرا کوئی بھی نہیں جانتا تھا۔ یا رسول اللہ صلی اللہ علیہ وسلم میری جانب سے بیس اوقیہ جو کہ میرے پاس ہے اس کا حساب کر لیں۔ رسول الله صلی اللہ علیہ وسلم نے فرمایا: ٹھیک ہے ایسا ہی کر لو، چنانچہ سیدنا عباس رضی اللہ عنہ نے اپنا، اپنے بھانجوں اور اپنے حلیف کی جانب سے فدیہ ادا کیا۔ اس موقع پر الله تعالیٰ نے یہ آیت نازل فرمائی۔ {يَا أَيُّهَا النَّبِيُّ قُلْ لِمَنْ فِي أَيْدِيكُمْ مِنَ الْأَسْرَى إِنْ يَعْلِمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا مِمَّا أُخِذَ مِنْكُمْ وَيَغْفِرْ لَكُمْ وَاللَّهُ غَفُورٌ رَحِيمٌ} [الأنفال: 70] ”اے غیب کی خبریں بتانے والے جو قیدی تمہارے ہاتھ میں ہیں ان سے فرماؤ اگر اللہ نے تمہارے دل میں بھلائی جانی تو جو تم سے لیا گیا اس سے بہتر تمہیں عطا فرمائے گا اور تمہیں بخش دے گا اور اللہ بخشنے والا مہربان ہے“ رسول اللہ صلی اللہ علیہ وسلم نے ان بیس اوقیہ کے بدلے اسلام میں بیس غلام عطا فرمائے ان میں سے ہر ایک کی ملک میں بہت سارا مال تھا۔ لیکن مجھے خواہش فقط الله تعالیٰ کی جانب سے مغفرت کی تھی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5496]