سیدہ عائشہ رضی اللہ عنہا سے روایت ہے کہ جب اہل مکہ نے اپنے قیدیوں کا فدیہ بھیجا تو رسول اللہ صلی اللہ علیہ وسلم کی صاحبزادی سیدہ زینب رضی اللہ عنہا نے (اپنے شوہر) ابو العاص کے فدیے میں وہ ہار بھیجا جو سیدہ خدیجہ رضی اللہ عنہا نے ان کی رخصتی کے وقت انہیں دیا تھا، جب رسول اللہ صلی اللہ علیہ وسلم نے اسے دیکھا تو آپ صلی اللہ علیہ وسلم پر انتہائی رقت طاری ہو گئی اور آپ صلی اللہ علیہ وسلم نے فرمایا: ”اگر تم مناسب سمجھو تو اس کے قیدی کو رہا کر دو اور اس کا مال اسے واپس کر دو،“ صحابہ نے عرض کی: جی ہاں اے اللہ کے رسول! اور انہوں نے وہ ہار واپس کر دیا۔ وہ بیان کرتے ہیں کہ سیدنا عباس رضی اللہ عنہ نے عرض کی: اے اللہ کے رسول! میں تو (پہلے ہی) مسلمان تھا، تو رسول اللہ صلی اللہ علیہ وسلم نے ارشاد فرمایا: ”اللہ تمہارے اسلام کو بہتر جانتا ہے، اگر حقیقت وہی ہے جو تم کہہ رہے ہو تو اللہ تمہیں اس کا اجر دے گا، لیکن (ظاہر کے مطابق) تم اپنا، اپنے بھتیجوں نوفل بن حارث بن عبد المطلب اور عقیل بن ابی طالب بن عبد المطلب اور اپنے حلیف عتبہ بن عمرو بن جحدم کا فدیہ ادا کرو،“ انہوں نے عرض کی: اے اللہ کے رسول! میرے پاس تو اتنا مال نہیں ہے، آپ صلی اللہ علیہ وسلم نے فرمایا: ”پھر وہ مال کہاں ہے جو تم نے اور ام الفضل نے زمین میں دفن کیا تھا اور تم نے ان سے کہا تھا کہ اگر میں (جنگ میں) مارا جاؤں تو یہ مال میرے بیٹوں فضل، عبد اللہ اور قثم کے لیے ہے؟“ اس پر انہوں نے عرض کی: اللہ کی قسم! اے اللہ کے رسول! میں گواہی دیتا ہوں کہ آپ اللہ کے رسول ہیں، کیونکہ یہ ایسی بات تھی جسے میرے اور ام الفضل کے سوا کوئی نہیں جانتا تھا، اے اللہ کے رسول! اب وہ بیس اوقیہ مال بھی اس فدیے میں شمار کر لیں جو آپ لوگوں نے مجھ سے (جنگ میں) حاصل کیا ہے، آپ صلی اللہ علیہ وسلم نے فرمایا: ”میں ایسا ہی کروں گا،“ چنانچہ عباس رضی اللہ عنہ نے اپنا، اپنے بھتیجوں اور حلیف کا فدیہ ادا کر دیا، اور اللہ عزوجل نے یہ آیت نازل فرمائی: ﴿يَاأَيُّهَا النَّبِيُّ قُلْ لِمَنْ فِي أَيْدِيكُمْ مِنَ الْأَسْرَى إِنْ يَعْلَمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا مِمَّا أُخِذَ مِنْكُمْ وَيَغْفِرْ لَكُمْ وَاللَّهُ غَفُورٌ رَحِيمٌ﴾ [سورة الأنفال: 70] ، (سیدنا عباس رضی اللہ عنہ فرماتے ہیں:) اللہ نے مجھے اس بیس اوقیہ کے بدلے اسلام میں بیس غلام عطا فرمائے جن میں سے ہر ایک کے پاس تجارت کے لیے مال ہے، اور اس کے ساتھ ساتھ میں اللہ عزوجل کی مغفرت کا امیدوار ہوں۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5496]

سیدنا عبد اللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم سیدنا عباس رضی اللہ عنہ کی ویسی ہی تعظیم و توقیر فرماتے تھے جیسے ایک بیٹا اپنے والد کی کرتا ہے، اور یہ وہ خاص فضیلت ہے جو اللہ تعالیٰ نے تمام لوگوں میں سے صرف سیدنا عباس رضی اللہ عنہ کو عطا فرمائی تھی۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5497]