سیدنا عبداللہ بن مسعود رضی اللہ عنہ سے روایت ہے، انہوں نے کہا: میں نے مقداد رضی اللہ عنہ کا ایک ایسا کارنامہ دیکھا کہ اگر میں اس کا حصہ ہوتا تو یہ مجھے ہر اس چیز سے زیادہ محبوب ہوتا جس کے بدلے اسے خریدا جا سکتا ہے۔ وہ نبی کریم صلی اللہ علیہ وسلم کے پاس اس وقت آئے جب آپ مشرکین کے خلاف دعا فرما رہے تھے۔ مقداد رضی اللہ عنہ نے عرض کیا: ”اللہ کی قسم، اے اللہ کے رسول! ہم آپ سے وہ بات نہیں کہیں گے جو موسیٰ علیہ السلام کی قوم نے ان سے کہی تھی: ﴿اذْهَبْ أَنْتَ وَرَبُّكَ فَقَاتِلَا إِنَّا هَاهُنَا قَاعِدُونَ﴾ ”تم اور تمہارا رب جاؤ اور لڑو، ہم تو یہیں بیٹھے ہیں۔“ [سورة المائدة: 24] بلکہ ہم آپ کے دائیں، بائیں، آگے اور پیچھے سے (دشمنوں کے خلاف) لڑیں گے۔“ عبداللہ فرماتے ہیں کہ میں نے دیکھا اس بات پر نبی کریم صلی اللہ علیہ وسلم کا چہرہ مبارک چمک اٹھا اور انہیں اس سے بہت خوشی ہوئی۔
یہ حدیث صحیح الاسناد ہے لیکن شیخین نے اسے روایت نہیں کیا! [المستدرك على الصحيحين/كتاب معرفة الصحابة رضي الله تعالى عنهم/حدیث: 5577]