سیدنا ابو ذر رضی اللہ عنہ بیان کرتے ہیں کہ رسول اللہ صلی اللہ علیہ وسلم کے پاس کچھ بکریاں جمع ہوئیں تو آپ صلی اللہ علیہ وسلم نے فرمایا: ”اے ابو ذر! ان کے ساتھ باہر (چراگاہ میں) رہو،“ تو میں ربذہ چلا گیا، وہاں مجھے جنابت لاحق ہو جاتی تھی اور میں پانچ پانچ چھ چھ دن اسی حال میں گزار دیتا تھا، پھر میں رسول اللہ صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم نے فرمایا: ”ابو ذر!“ میں خاموش رہا، آپ صلی اللہ علیہ وسلم نے فرمایا: ”تمہاری ماں تمہیں گم پائے، تمہاری ماں کے لیے ہلاکت ہو،“ پھر آپ صلی اللہ علیہ وسلم نے ایک لونڈی کو بلایا جو پانی کا ایک بڑا برتن لائی، اس نے مجھے کپڑے سے چھپایا اور میں نے سواری کی اوٹ میں غسل کیا، تو مجھے ایسا محسوس ہوا جیسے مجھ سے کوئی پہاڑ ہٹ گیا ہو، پھر آپ صلی اللہ علیہ وسلم نے فرمایا: ”پاک مٹی مسلمان کا وضو ہے چاہے دس سال تک پانی نہ ملے، پھر جب تمہیں پانی مل جائے تو اسے اپنے بدن سے چھواؤ (یعنی غسل یا وضو کرو) کیونکہ یہی بہتر ہے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ یہ حدیث صحیح ہے لیکن اسے صرف ابوقلابہ نے عمرو بن بجدان سے روایت کیا ہے، اور یہ میرے اصول کے مطابق ہے کہ شیخین نے اس طرح کی روایات لی ہیں۔ [المستدرك على الصحيحين/كتاب الطهارة/حدیث: 637]