سیدنا ابوبکرہ فرماتے ہیں: ہم رسول اللہ صلی اللہ علیہ وسلم کی بارگاہ میں حاضر تھے، بنی تمیم کا ایک وفد نبی اکرم صلی اللہ علیہ وسلم کی بارگاہ میں آیا، ان میں قیس بن عاصم، عمرو بن اہتم اور زبرقان بن بدر بھی تھے، نبی اکرم صلی اللہ علیہ وسلم نے عمرو بن اہتم رضی اللہ عنہ سے فرمایا: زبرقان بن بدر کے بارے میں تمہاری کیا رائے ہے؟ انہوں نے کہا: یا رسول اللہ صلی اللہ علیہ وسلم اس کے قبیلے میں اس کی بات مانی جاتی ہے، بہادر آدمی ہے، اپنے قبیلے کے علاوہ دیگر لوگوں کو کچھ نہیں دیتا۔ زبرقان نے کہا: یا رسول اللہ صلی اللہ علیہ وسلم اس نے میرے بارے میں جو کچھ بیان کیا ہے، یہ اس سے بھی زیادہ جانتا ہے لیکن حسد کی وجہ سے بیان نہیں کر رہا۔ عمرو نے کہا: یا رسول اللہ صلی اللہ علیہ وسلم اللہ کی قسم! یہ شخص بے مروت ہے، کنجوس ہے، کمینہ ہے، خاندانی احمق ہے۔ اللہ کی قسم! میں نے پہلے بھی جھوٹ نہیں کہا تھا اور دوسری بار بھی سچ بولا ہے، لیکن (اصل بات یہ ہے کہ) میں اس کے ساتھ رضا مندی کی کیفیت میں تھا میں نے اس کی وہ اچھائیاں بیان کیں جو میں جانتا تھا، اور ناراضگی کے عالم میں، میں نے وہ برائیاں بیان کر دی ہیں جو میں جانتا تھا۔ نبی اکرم صلی اللہ علیہ وسلم نے فرمایا: بیشک بیان میں جادو کا سا اثر بھی ہوتا ہے اور بے شک شعر میں بڑی دانائی کی باتیں بھی ہوتی ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6714]