سیدنا انس بن مالک رضی اللہ عنہ فرماتے ہیں کہ جب رسول اللہ صلی اللہ علیہ وسلم کی صاحبزادی سیدہ رقیہ رضی اللہ عنہا کا انتقال ہو گیا تو سیدنا عمر رضی اللہ عنہ سیدنا عثمان رضی اللہ عنہ کے پاس گئے اور پوچھا: کیا آپ کو میری بیٹی حفصہ میں کوئی دلچسپی ہے؟ سیدنا عثمان رضی اللہ عنہ نے ان کو کوئی خاطر خواہ جواب نہ دیا، سیدنا عمر رضی اللہ عنہ نبی اکرم صلی اللہ علیہ وسلم کے پاس آئے اور ساری بات بتائی، رسول اللہ صلی اللہ علیہ وسلم نے فرمایا: اے عمر! ہو سکتا ہے کہ اللہ تعالیٰ تجھے ایسا داماد عطا کر دے جو عثمان سے بھی بہتر ہو، تو رسول اللہ صلی اللہ علیہ وسلم نے سیدنا عمر رضی اللہ عنہ کی صاحبزادی سے خود نکاح کر لیا اور اپنی بیٹی ” ام کلثوم “ کا نکاح سیدنا عثمان رضی اللہ عنہ سے کر دیا۔ اس سے پہلے سیدنا ابوبکر رضی اللہ عنہ اور سیدنا عمر رضی اللہ عنہ رسول اللہ صلی اللہ علیہ وسلم سے ” ام کلثوم “ کا رشتہ مانگ چکے تھے۔ لیکن رسول اللہ صلی اللہ علیہ وسلم نے ان کو ” ام کلثوم “ کا رشتہ نہیں دیا۔ رسول اللہ صلی اللہ علیہ وسلم نے فرمایا: عثمان کے لئے بہترین سفارش یہ ہے کہ اپنی بیٹیوں کا نکاح میں خود نہیں کرتا بلکہ ان کا فیصلہ خود رب ذوالجلال کرتا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 7032]