سیدنا ابوہریرہ رضی اللہ عنہ فرماتے ہیں: ایک آدمی نبی اکرم صلی اللہ علیہ وسلم کی بارگاہ میں حاضر ہوا اور عرض کی: یا رسول اللہ صلی اللہ علیہ وسلم مجھے خوبصورتی پسند ہے اور اور اس کا ایک حصہ مجھے ملا بھی ہے، جیسا کہ آپ خود بھی دیکھ رہے ہیں، یا رسول اللہ صلی اللہ علیہ وسلم مجھے یہ بات قطعاً اچھی نہیں لگتی کہ کوئی دوسرا میرے جوتوں یا جوتوں کے تسموں کے معاملے میں مجھ سے آگے نکلے، کیا یہ تکبر ہے؟ حضور صلی اللہ علیہ وسلم نے فرمایا: نہیں، (یہ تکبر نہیں ہے) بلکہ تکبر یہ ہے کہ انسان تکبر کے باعث حق کو قبول کرنے سے انکار کر دے، دوسرے لوگوں کو خود سے حقیر جانے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7553]