سیدنا عبداللہ بن عمر رضی اللہ عنہما فرماتے ہیں: رسول اللہ صلی اللہ علیہ وسلم حمار کی طرف متوجہ ہوئے، آپ سے ایک آدمی ملا، کہنے لگا: یا رسول اللہ صلی اللہ علیہ وسلم ایک آدمی نے ایک پھوپھی اور ایک خالہ چھوڑی ہے ان کے علاوہ اس کا کوئی وارث نہیں ہے۔ (وراثت کا کیا حکم ہے؟) حضور صلی اللہ علیہ وسلم نے آسمان کی جانب چہرہ اٹھایا اور دعا مانگی ” اے اللہ! ایک آدمی نے پھوپھی اور خالہ چھوڑی ہے ان دو کے علاوہ اس کا کوئی وارث نہیں ہے (اس کی وراثت کیسے بٹے گی؟) پھر حضور صلی اللہ علیہ وسلم نے پوچھا: وہ سائل کہاں ہے؟ اس نے کہا: یا رسول اللہ صلی اللہ علیہ وسلم میں یہاں ہوں۔ آپ صلی اللہ علیہ وسلم نے فرمایا: ان کو وراثت نہیں ملے گی۔ ٭٭ یہ حدیث صحیح الاسناد ہے۔ عبداللہ بن جعفر المدینی کے خلاف اگرچہ اس کے بیٹے علی نے سوء حفظ کی گواہی دی ہے لیکن یہ ان محدثین میں سے نہیں ہیں جن کی احادیث کو چھوڑا جا سکتا ہو، اس کی ایک شاہد حدیث بھی موجود ہے۔ [المستدرك على الصحيحين/كتاب الفرائض/حدیث: 8195]