سیدنا زید بن ارقم رضی اللہ عنہ فرماتے ہیں: ایک آدمی نبی اکرم صلی اللہ علیہ وسلم کے پاس آیا کرتا تھا، اس آدمی نے حضور صلی اللہ علیہ وسلم پر جادو کر دیا، اس نے (کسی دھاگے میں) گرہیں لگا کر ایک انصاری کے کنویں میں پھینکا ہوا تھا، دو فرشتے حضور صلی اللہ علیہ وسلم کی عیادت کے لیے آئے، ان میں سے ایک حضور صلی اللہ علیہ وسلم کے سرہانے کی طرف اور دوسرا قدموں کی جانب کھڑا ہو گیا۔ ان میں سے ایک نے کہا: تمہیں پتا ہے کہ ان کے درد کی وجہ کیا ہے؟ اس نے کہا: فلاں شخص جو اکثر ان کے پاس آتا ہے اس نے (کسی دھاگے میں) گرہیں لگا کر فلاں انصاری کے کنویں میں پھینکا ہوا ہے۔ اگر کسی آدمی کو بھیج دیا جائے اور وہ گرہیں کھول دے، وہ پانی کا رنگ بدلا ہوا پائے گا، راوی کہتے ہیں: وہ گرہیں کھول دیں۔ تو حضور صلی اللہ علیہ وسلم سے جادو کا اثر ختم ہو گیا، راوی کہتے ہیں: اس کے بعد بھی وہ آدمی حضور صلی اللہ علیہ وسلم کے پاس آیا کرتا تھا۔ لیکن حضور صلی اللہ علیہ وسلم نے کبھی بھی اس کی اس حرکت کا ذکر نہیں کیا اور نہ اس پر اس کو کوئی سزا دی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الحدود/حدیث: 8273]