سیدنا سریحہ انصاری رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: دابہ تین زمانوں میں نکلے گا، پہلی مرتبہ وہ یمن کے دور کے علاقے سے نکلے گا، اس کا تذکرہ صرف دیہاتوں میں رہے گا، مکہ مکرمہ میں اس کی خبر نہیں پہنچے گی، اس کے بعد ایک طویل زمانہ گزرے گا، پھر یہ مکہ کے قریب ایک جگہ سے نکلے گا، اس کا تذکرہ دیہاتوں میں بھی پھیلے گا اور مکہ مکرمہ میں بھی، پھر ایک طویل زمانہ گزرے گا، پھر لوگ مسجد حرام (لوگ سب سے زیادہ جس کی عزت کرتے ہیں اور اللہ تعالیٰ کو سب سے زیادہ اسی مسجد سے محبت ہے اور اس کی بارگاہ میں اس کی عزت سب مسجدوں سے زیادہ ہے) میں موجود ہوں گے، وہ لوگوں کو ڈرائے گا نہیں، وہ مسجد کے ایک کونے میں ہو گا، وہ رکن اسود اور باب بنی مخزوم کے درمیان آ جائے گا، باہر کے ہاتھ کی طرف اس کے درمیان میں۔ لوگ وہاں سے گروہ در گروہ اور اکیلے اکیلے بھاگ پڑیں گے، لیکن ایک مسلمان جماعت وہاں ثابت قدم رہے گی، ان کو یقین ہو گا کہ وہ اللہ کو عاجز نہیں کر سکتے۔ تب وہ اپنے سر سے مٹی جھاڑتے ہوئے ان کی جانب نکلے گا، وہ لوگوں میں ظاہر ہو گا، پھر وہ آسمانوں کی جانب چڑھے گا اور لوگوں کی آنکھوں سے اوجھل ہو جائے گا حتی کہ چمکتے ہوئے ستارے کی طرح محسوس ہو گا۔ پھر وہ زمین کی جانب واپس آئے گا، اس کو پکڑنے کے لئے اس کے پیچھے بھاگنے والا اس کو پکڑ نہیں سکے گا، اور اس سے بھاگنے والا اس سے بھاگ نہیں سکے گا حتی کہ ایک آدمی نماز میں اس سے پناہ مانگ رہا ہو گا تو وہ اس آدمی کے پیچھے سے آ کر کہے گا: اے آدمی تو اب نماز پڑھ رہا ہے؟ وہ آدمی اس کی طرف دیکھے گا تو وہ اس کے چہرے پر زخم کر دے گا۔ پھر چلا جائے گا، لوگ اس کو اپنے ساتھ اپنے شہروں میں رکھیں گے، اپنے سفروں میں اپنے ساتھ رکھیں گے، اپنے مالوں میں اس کو شریک کریں گے۔ مومن اس کو کافر سمجھے گا اور کافر اسے مومن جانے گا، حتی کہ کافر کہے گا: اے مومن تو میرا حق ادا کر۔ اور مومن کہے گا: اے کافر تو میرا حق ادا کر۔ ٭٭ یہ حدیث صحیح الاسناد ہے دابۃ الارض کے متعلق یہ حدیث بہت واضح ہے۔ لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8700]