سیدنا ابوہریرہ رضی اللہ عنہ سے روایت ہے، موسیٰ بن علی بن رباح کہتے ہیں کہ میرے والد نے فرمایا: میں حج کے ارادے سے نکلا تو مصر کے قاضی سلیمان بن عتر نے مجھ سے کہا: سیدنا ابوہریرہ کو میرا سلام کہنا اور انہیں بتانا کہ میں نے آج صبح ان کے لیے اور ان کی والدہ کے لیے مغفرت کی دعا کی ہے، چنانچہ جب میں ان سے ملا اور انہیں پیغام پہنچایا، تو انہوں نے کہا: میں نے بھی ان کے لیے استغفار کیا ہے، پھر انہوں نے پوچھا: تم ام خنور (یعنی مصر) کو کس حال میں چھوڑ کر آئے ہو؟ میں نے ان کے سامنے وہاں کی فراوانی اور خوشحالی کا تذکرہ کیا، تو انہوں نے فرمایا: آگاہ رہو! یہ روئے زمین پر سب سے پہلے تباہ ہونے والا خطہ ہوگا، پھر آرمینیا کی باری آئے گی۔ میں نے پوچھا: کیا آپ نے یہ رسول اللہ صلی اللہ علیہ وسلم سے سنا ہے؟ انہوں نے جواب دیا: نہیں، بلکہ مجھے سیدنا عبداللہ بن عمرو بن عاص رضی اللہ عنہما نے بتایا کہ انہوں نے رسول اللہ صلی اللہ علیہ وسلم کو یہ فرماتے ہوئے سنا: ”زمین کے بہترین لوگوں کی ایک ہجرت کے بعد دوسری ہجرت سیدنا ابراہیم علیہ السلام کی ہجرت گاہ (ملک شام) کی طرف ہوگی، اور زمین پر صرف بدترین لوگ باقی رہ جائیں گے جنہیں ان کی زمینیں اگل دیں گی اور اللہ تعالیٰ ان سے اظہارِ بیزاری فرمائے گا، پھر آگ انہیں بندروں اور خنزیروں کے ساتھ ہانک کر جمع کرے گی“۔ اور میں نے رسول اللہ صلی اللہ علیہ وسلم کو یہ فرماتے ہوئے بھی سنا: ”مشرق کی جانب سے کچھ ایسے لوگ نکلیں گے جو قرآن کی تلاوت تو کریں گے مگر وہ ان کے حلق سے نیچے نہیں اترے گا، جب بھی ان کا ایک گروہ «قَرْنٌ» ختم ہوگا تو دوسرا پیدا ہو جائے گا، یہاں تک کہ ان کے آخری گروہ میں دجال ظاہر ہوگا۔“
یہ حدیث شیخین کی شرط پر صحیح ہے، کیونکہ ان دونوں نے موسیٰ بن علی بن رباح لخمی کی احادیث کو قبول کرنے پر اتفاق کیا ہے، لیکن انہوں نے اسے (ان الفاظ کے ساتھ) روایت نہیں کیا۔ [المستدرك على الصحيحين/كتاب الفتن والملاحم/حدیث: 8770]