اردو حاشہ:
فوائد و مسائل:
(1)
نماز جنازہ کا اصل مقصود تو میت کے لئے دعا کرنا ہے۔
لیکن اس موقع پر ضمناً دوسرے مسلمانوں کے لئے دعا بھی کی جا سکتی ہے۔
حدیث میں مذکور دعا ایک ایسی ہی دعا ہے۔
جو تمام مسلمانوں کے لئے ہے۔

(2)
اسلام اور ایمان ہم معنی الفاظ کے طور بھی استعمال ہوتے ہیں۔
اورایک دوسرے سے مختلف معنی میں بھی۔
جب یہ دونوں الفاظ اکھٹے استعمال ہوں تو اسلام سے مراد ظاہری اعمال اور ایمان سے مراد باطنی اور قلبی اعمال ہوتے ہیں۔
زندگی میں دل کے ایمان اور یقین کے ساتھ ظاہری اعمال کی اہمیت زیادہ ہوتی ہے۔
کیونکہ معاشرے میں ظاہری اعمال کی بنیاد ہی پرمسلم اور غیرمسلم میں امتیاز ہوتا ہے وفات کے وقت دل میں یقین اور ایمان ہونا ضروری ہے۔
کیونکہ آخرت میں نجات کا دارومدار اسی پر ہے۔
اس لئے دعائے جنازہ میں اسلام پر زندگی اور ایمان پر وفات کی درخواست ہے۔

(3)
”ہمیں اس کے اجر سے محروم نہ رکھنا“ اس سے مراد رشتہ دار عزیز یا دوست کی وفات پر صبر اوردوسرے متعلقہ اعمال سے حاصل ہونے والا ثواب ہے مثلاً نماز جنازہ میں شرکت کفن دفن کا اہتمام اورفوت ہونے والے کے اقارب کو تسلی تشفی اور انکے غم میں تخفیف کی کوشش میت کے اقارب کے لئے کھانا تیار کرنا وغیرہ۔
ان اعمال سے ہونے والے ثواب کو میت کا ثواب کہا گیا ہے۔
یعنی وفات کی وجہ سے زندوں کو حاصل ہونے والا ثواب اس ثواب کی دعا کا یہ مطلب ہے۔
کہ ہمیں یہ اعمال خلوص کے ساتھ محض اللہ کی رضا کے لئے کرنے کی توفیق ملے۔

(4)
”اس کے بعد ہمیں گمراہ نہ کرنا“ اس کا مطلب یہ ہے کہ اس کی وفات کے غم میں نفس امّارہ کے اکسانے سے یا شیطان کے وسوسوں کی وجہ سے ناجائز اعمال کا ارتکاب نہ ہوجائے جو گمراہی ہے۔
بعض اوقات یہ بھی ہوتا ہے کہ مرنے والا اپنی زندگی میں نیکی کی تلقین کرتا تھا۔
بُرائی سے منع کرتا تھا۔
صحیح اور غلط کے امتیاز میں رہنمائی کرتا تھا۔
اس کے دنیا چھوڑ جانے کے بعد اس کی ر ہنمائی باقی نہیں رہی۔
اب ہمیں اللہ کی طرف توجہ کرنے کی زیادہ ضرورت ہے۔
کہ وہ ہرقدم پر ہماری رہنمائی فرمائے۔
اور ہمیں گمراہی سے محفوظ رکھے۔

لغوی تشریح:
«شَاهِدِنَا» جو حاضر ہیں۔
«صَغِيرِناَ» کم عمر اور چھوٹی عمر والوں کے حق میں بلندی درجات کی دعا ہے، یا یہ مطلب ہے کہ اللہ تعالیٰ انہیں تکلیف و مصیبت کے وقت افعال صالحہ پر ثابت قدم رکھے۔
«فَاْحَيِهِ» «إحْيَاء» سے ماخوذ امر کا صیغہ ہے جو دعا کے لیے استعمال کیا گیا ہے۔
«لَا تَحُرِمَنَا» ”تا“ پر فتحہ اور ”را“ کے نیچے کسرہ۔ حرمان سے مشتق ہے، نہ محروم رکھنا ہمیں۔
«جُرَهُ» اس کی موت کی وجہ سے ہمیں جو صدمہ پہنچا ہے اس پر صبر کے اجر سے۔
«لَاتَقُتِناّ» دوسری ”تا“ کے نیچے کسرہ اور ”نون“ جمع پر تشدید ہے۔
باب «‏‏‏‏ضَرَبَ» «يَضْرِبُ» ہے اور فعل کے ”نون“ کو ”نون“ متکلم میں مدغم کر دیا گیا ہے۔ اس کا مطلب ہے کہ ہمیں اس کی موت کے بعد فتنہ و آزمائش میں مبتلا نہ کرنا بلکہ اس کی موت کو ہمارے لیے مقام عبرت بنا دے۔
حدیث کے آخر میں ہے «رَوَاهُ مُسْلِمٌ» ”اسے مسلم نے روایت کیا ہے۔“
جبکہ یہ حدیث مسلم میں نہیں ہے۔ غالب گمان یہ ہے کہ یہ کسی کاتب سے غلطی ہو گئی ہے، مصنف سے نہیں۔ «والله اعلم»

فوائد ومسائل:
حضرت ابو ہریرہ رضی اللہ تعالیٰ عنہ کا یہ دعا سن کر یادکرلینا اس بات کی دلیل ہے کہ یہ جنازہ نبی کریم صلی اللہ علیہ وسلم نے بلند آواز سے پڑھا تھا۔