حضرت سلیمان بن یسار رحمہ اللہ سے روایت ہے کہ حضرت ابوہریرہ رضی اللہ عنہ اور حضرت ابن عباس رضی اللہ عنہما، نیز حضرت ابوسلمہ بن عبدالرحمن رحمہ اللہ نے اس عورت کی عدت کا تذکرہ فرمایا جس کا خاوند فوت ہو گیا ہو اور وہ وفات سے تھوڑا عرصہ بعد بچہ جن دے۔ حضرت ابن عباس رضی اللہ عنہما نے فرمایا: وہ دونوں میں سے آخری عدت گزارے۔ حضرت ابوسلمہ رحمہ اللہ نے فرمایا: بلکہ بچہ پیدا ہونے سے اس کی عدت ختم ہو جائے گی۔ حضرت ابوہریرہ رضی اللہ عنہ نے فرمایا: میں اپنے بھتیجے کے ساتھ ہوں۔ پھر انہوں نے نبی صلی اللہ علیہ وسلم کی زوجہ محترمہ حضرت ام سلمہ رضی اللہ عنہا کے پاس پیغام بھیجا تو انہوں نے فرمایا: سبیعہ اسلمیہ رضی اللہ عنہا نے اپنے خاوند کی وفات سے تھوڑا عرصہ بعد بچہ جن دیا تھا، پھر اس نے رسول اللہ صلی اللہ علیہ وسلم سے پوچھا تو آپ صلی اللہ علیہ وسلم نے اسے نکاح کی اجازت مرحمت فرما دی۔ [سنن نسائي/كتاب الطلاق/حدیث: 3542]