حضرت ابو موسیٰ اشعری رضی اللہ عنہ سے روایت ہے، انہوں نے کہا: میں نبی صلی اللہ علیہ وسلم کے ہمراہ تھا جب آپ جعرانہ میں ٹھہرے تھے، جو مکہ اور مدینہ کے درمیان ایک مقام ہے۔ آپ کے ساتھ حضرت بلال رضی اللہ عنہ بھی تھے۔ اس دوران میں نبی صلی اللہ علیہ وسلم کے پاس ایک اعرابی آیا اور کہنے لگا: ”آپ نے مجھ سے ایک وعدہ کیا تھا، کیا آپ اسے پورا نہیں کرتے؟“ آپ نے فرمایا: ”تیرے لیے بشارت ہے۔“ وہ بولا: ”یہ کیا بات ہے؟ آپ اکثر یہی فرماتے رہتے ہیں: خوش ہو جاؤ۔“ یہ سن کر آپ صلی اللہ علیہ وسلم حضرت ابو موسیٰ رضی اللہ عنہ اور حضرت بلال رضی اللہ عنہ کی طرف غضبناک حالت میں متوجہ ہوئے اور فرمایا: ”اس دیہاتی نے تو بشارت کو مسترد کر دیا ہے، لہذا تم دونوں قبول کر لو۔“ ان دونوں حضرات نے کہا: ”ہمیں منظور ہے۔“ پھر آپ نے پانی کا ایک پیالہ منگوایا، اپنے دونوں ہاتھ اور منہ اس میں دھوئے اور اس میں کلی بھی کی، پھر فرمایا: ”تم دونوں اس میں سے کچھ نوش کر لو اور کچھ اپنے منہ اور سینے پر ڈال لو، نیز خوش ہو جاؤ۔“ ہم دونوں پیالہ لے کر تعمیلِ حکم کرنے لگے تو حضرت ام سلمہ رضی اللہ عنہا نے پسِ پردہ پکارا کہ ”اپنی ماں کے لیے بھی کچھ پانی چھوڑ دینا“ تو انہوں نے کچھ پانی بچا کر حضرت ام سلمہ رضی اللہ عنہا کو دے دیا۔ [صحيح البخاري/كتاب المغازي/حدیث: 4328]

حضرت ابو موسیٰ اشعری رضی اللہ عنہ سے روایت ہے، انہوں نے کہا: نبی اکرم صلی اللہ علیہ وسلم نے ایک پیالہ منگوایا جس میں پانی تھا، پھر آپ نے اس پیالے میں اپنے دونوں ہاتھ اور چہرہ مبارک دھویا اور اس میں کلی فرمائی، پھر ان دونوں سے فرمایا: ”اس میں سے کچھ پانی نوش جان کر لو اور کچھ اپنے چہروں اور سینوں پر ڈال لو۔“ [صحيح البخاري/كتاب المغازي/حدیث: 188]

حضرت ابو موسیٰ اشعری رضی اللہ عنہ سے روایت ہے، نبی صلی اللہ علیہ وسلم نے ایک بڑا پیالہ منگوایا جس میں پانی تھا۔ آپ صلی اللہ علیہ وسلم نے اس میں ہاتھ، منہ دھوئے اور اس میں کلی فرمائی۔ [صحيح البخاري/كتاب المغازي/حدیث: 196]