سیدنا ابو ایوب انصاری رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”وتر نماز ہر مسلمان پر حق ہے، چنانچہ جو پانچ پڑھنا چاہے، (پانچ) پڑھ لے۔ اور جو تین پڑھنا چاہے، (تین) پڑھ لے۔ اور جو ایک پڑھنا چاہے، وہ ایک پڑھ لے۔“ [سنن ابي داود/كتاب تفريع أبواب الوتر /حدیث: 1422]

سیدنا ابن عباس رضی اللہ عنہما بیان کرتے ہیں کہ میں نے اپنی خالہ میمونہ رضی اللہ عنہا کے ہاں رات گزاری، رسول اللہ صلی اللہ علیہ وسلم تشریف لائے جبکہ رات ہو چکی تھی، آپ صلی اللہ علیہ وسلم نے پوچھا: ”کیا لڑکے نے نماز پڑھ لی ہے؟“ انہوں نے کہا: ”ہاں۔“ چنانچہ آپ صلی اللہ علیہ وسلم بھی لیٹ گئے حتیٰ کہ جب رات کا کچھ حصہ گزر گیا جو اللہ نے چاہا تو آپ صلی اللہ علیہ وسلم اٹھے اور وضو کیا۔ پھر آپ صلی اللہ علیہ وسلم نے سات یا پانچ رکعات پڑھیں اور انہیں وتر بنایا اور ان رکعات میں آپ صلی اللہ علیہ وسلم نے (درمیان میں) کوئی تشہد نہیں کیا۔ [سنن ابي داود/كتاب تفريع أبواب الوتر /حدیث: 1356]

سیدنا ابن عمر رضی اللہ عنہما سے مروی ہے کہ ایک دیہاتی آدمی نے نبی کریم صلی اللہ علیہ وسلم سے رات کی نماز کے بارے میں پوچھا تو آپ صلی اللہ علیہ وسلم نے اپنی انگلیوں سے اشارہ کرتے ہوئے فرمایا: ”اس طرح دو دو رکعت، اور وتر ایک رکعت ہے رات کے آخر میں۔“ [سنن ابي داود/كتاب تفريع أبواب الوتر /حدیث: 1421]