قاسم بن محمد اور سلیمان بن یسار کا بیان ہے کہ یحییٰ بن سعید بن العاص نے (اپنی بیوی عمرہ) بنت عبدالرحمٰن بن حکم کو طلاق دے دی، «طَلَاقُ الْبَتَّةِ» ”طلاقِ بتہ“ (تین طلاقیں)، تو عبدالرحمٰن نے اپنی بیٹی کو (اپنے گھر) منتقل کر لیا۔ سیدہ عائشہ رضی اللہ عنہا نے مروان بن حکم کو پیغام بھیجا اور وہ ان دنوں مدینہ کا حاکم تھا، کہ ”اللہ سے ڈرو اور عورت کو اس کے (خاوند کے) گھر لوٹا دو۔“ مروان نے کہا (بالفاظِ سلیمان): ”عبدالرحمٰن مجھ پر غالب آ گیا ہے۔“ اور (بالفاظِ قاسم) مروان نے کہا: ”کیا آپ کو فاطمہ بنت قیس رضی اللہ عنہا کا احوال نہیں پہنچا؟“ سیدہ عائشہ رضی اللہ عنہا نے کہا: ”اگر آپ فاطمہ رضی اللہ عنہا کی حدیث بیان نہ کریں تو آپ کو کوئی نقصان نہ ہو گا۔“ (اس کو ایک خاص وجہ سے اجازت دی گئی تھی) مروان نے کہا: ”اگر آپ ایک شر کو انتقال کی وجہ جواز سمجھتی ہیں تو ان زوجین کے درمیان موجود شر بھی اس کی وجہ جواز ہے۔“ [سنن ابي داود/كتاب تفريع أبواب الطلاق /حدیث: 2295]

ہشام بن عروہ اپنے والد سے بیان کرتے ہیں کہ سیدہ عائشہ رضی اللہ عنہا نے اس روایت پر بہت سخت عیب لگایا ہے (انکار کیا ہے) یعنی فاطمہ بنت قیس رضی اللہ عنہا کی حدیث پر اور کہا کہ ”فاطمہ بنت قیس ایک خالی مکان میں رہائش پذیر تھی اور اس طرف سے کوئی خطرہ سا بھی تھا اس لیے رسول اللہ صلی اللہ علیہ وسلم نے اس کو (گھر تبدیل کرنے کی) رخصت عنایت فرمائی تھی۔“ [سنن ابي داود/كتاب تفريع أبواب الطلاق /حدیث: 2292]

عروہ بن زبیر سے مروی ہے کہ سیدہ عائشہ رضی اللہ عنہا سے کہا گیا کہ ”کیا آپ کو فاطمہ کی بات معلوم نہیں ہوئی؟“ تو انہوں نے کہا: ”اس بات کو ذکر کرنے میں اس کے لیے خیر نہیں ہے۔“ [سنن ابي داود/كتاب تفريع أبواب الطلاق /حدیث: 2293]