سیدنا بریدہ رضی اللہ عنہ سے روایت ہے کہ نبی کریم صلی اللہ علیہ وسلم نے ” «الْجَدَّةِ» (دادی، نانی) کے لیے چھٹا حصہ مقرر کیا تھا، لیکن جب اس سے پہلے (ورے) ماں نہ ہو۔“ [سنن ابي داود/كتاب الفرائض /حدیث: 2895]

سیدنا قبیصہ بن ذؤیب رضی اللہ عنہ بیان کرتے ہیں کہ ایک (میت کی) ”نانی“ سیدنا ابوبکر صدیق رضی اللہ عنہ کے پاس آئی، وہ اپنا حق وراثت طلب کر رہی تھی، ابوبکر صدیق رضی اللہ عنہ نے کہا: ”اللہ کی کتاب میں تیرا کوئی حصہ (مذکور) نہیں ہے اور نہ مجھے نبی کریم صلی اللہ علیہ وسلم کی سنت سے کچھ معلوم ہے، تم لوٹ جاؤ حتیٰ کہ میں لوگوں سے پوچھ لوں۔“ چنانچہ انہوں نے لوگوں (صحابہ) سے پوچھا تو سیدنا مغیرہ بن شعبہ رضی اللہ عنہ نے کہا: ”میں رسول اللہ صلی اللہ علیہ وسلم کے ہاں حاضر تھا تو آپ صلی اللہ علیہ وسلم نے اسے (نانی کو) چھٹا حصہ دیا تھا۔“ ابوبکر رضی اللہ عنہ نے پوچھا: ”کیا اس خبر کے سلسلے میں تمہارے ساتھ کوئی اور بھی ہے؟“ تو محمد بن مسلمہ رضی اللہ عنہ اٹھے اور انہوں نے اسی طرح کہا: جیسے کہ مغیرہ بن شعبہ رضی اللہ عنہ نے کہا تھا۔ چنانچہ سیدنا ابوبکر رضی اللہ عنہ نے نانی کو یہ حصہ دیا۔ پھر ایک اور ”دادی“ سیدنا عمر بن خطاب رضی اللہ عنہ کے پاس آئی، وہ اپنا حق وراثت طلب کر رہی تھی۔ انہوں نے کہا: ”اللہ کی کتاب میں تمہارا کوئی حق (مذکور) نہیں۔ اور جو فیصلہ اس سے پہلے ہوا ہے وہ دوسری (نانی) کے لیے تھا اور میں حقوق وراثت میں کچھ نہیں بڑھا سکتا۔ لیکن وہ چھٹا حصہ ہی ہے۔ اگر تم دونوں (نانی اور دادی) جمع ہو جاؤ تو یہ حصہ تم دونوں کے مابین ہو گا۔ اور جو تم میں سے کوئی اکیلی ہو (دادی ہو، نانی نہ ہو، یا نانی ہو، دادی نہ ہو) تو یہ چھٹا حصہ پورے کا پورا لے گی۔“ [سنن ابي داود/كتاب الفرائض /حدیث: 2894]

سیدنا عمران بن حصین رضی اللہ عنہ سے روایت ہے کہ ایک شخص نبی کریم صلی اللہ علیہ وسلم کی خدمت میں حاضر ہوا اور اس نے کہا: ”میرا پوتا فوت ہو گیا ہے، تو میرے لیے اس کی وراثت میں سے کیا ہے؟“ آپ صلی اللہ علیہ وسلم نے فرمایا: ”تیرے لیے چھٹا حصہ ہے۔“ جب اس نے پشت پھیری تو آپ صلی اللہ علیہ وسلم نے اسے بلایا اور فرمایا: ”تیرے لیے ایک اور چھٹا حصہ بھی ہے۔“ جب اس نے پشت پھیری تو آپ صلی اللہ علیہ وسلم نے اسے بلایا اور فرمایا: ”یہ دوسرا چھٹا حصہ تحفہ ہے۔“ قتادہ رضی اللہ عنہ نے کہا: ”لوگ نہیں جان سکے کہ کس چیز کے ساتھ اسے وارث بنایا۔“ قتادہ نے (یہ بھی) کہا: ”دادا کا کم از کم حصہ وراثت چھٹا ہے۔“ [سنن ابي داود/كتاب الفرائض /حدیث: 2896]

سیدنا عمر رضی اللہ عنہ نے پوچھا: ”کیا تم میں سے کوئی جانتا ہے کہ رسول اللہ صلی اللہ علیہ وسلم نے دادا کو کیا وراثت دی تھی؟“ تو سیدنا معقل بن یسار رضی اللہ عنہ نے کہا: ”میں جانتا ہوں، رسول اللہ صلی اللہ علیہ وسلم نے اسے چھٹا حصہ دیا تھا۔“ انہوں نے پوچھا: ”کس کے ساتھ؟“ کہا: ”مجھے نہیں معلوم۔“ تو سیدنا عمر رضی اللہ عنہ نے کہا: ”تم نے نہیں جانا (تمہارا ادھوری بات بتانے کا) کیا فائدہ؟“ [سنن ابي داود/كتاب الفرائض /حدیث: 2897]