سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”دم ان چیزوں ہی سے ہوتا ہے: بدنظری، زہریلے جانور کے ڈنک اور بہتے خون سے۔“ عباس (عباس عنبری) نے بدنظری کا ذکر نہیں کیا۔ اور اس حدیث کے الفاظ سلیمان بن داود کے ہیں۔ [سنن ابي داود/كتاب الطب /حدیث: 3889]

سیدنا عمران بن حصین رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”دم جھاڑ صرف نظرِ بد میں ہے یا زہریلے ڈنک میں۔“ [سنن ابي داود/كتاب الطب /حدیث: 3884]

سیدنا سہل بن حنیف رضی اللہ عنہ کہتے ہیں کہ ہم ایک ندی کے پاس سے گزرے تو میں اس میں داخل ہو گیا اور غسل کیا۔ باہر نکلا تو بخار چڑھا ہوا تھا۔ یہ بات رسول اللہ صلی اللہ علیہ وسلم کو بتائی گئی تو آپ صلی اللہ علیہ وسلم نے فرمایا: ”ابو ثابت کو کہو کہ اسے دم کر دے۔“ (رباب رضی اللہ عنہا کہتی ہیں) کہ میں نے (سہل بن حنیف رضی اللہ عنہ سے) عرض کیا: ”آقا! کیا دم مفید ہوتے ہیں؟“ فرمایا: ”دم بد نظری، سانپ کے کاٹے اور بچھو کے ڈنک ہی میں مفید ہوتے ہیں۔“ امام ابوداؤد رحمہ اللہ نے کہا: ” «الْحُمَةُ» کا لفظ سانپ اور ہر ڈسنے والے موذی جانور پر بولا جاتا ہے۔“ [سنن ابي داود/كتاب الطب /حدیث: 3888]