سیدنا ابو سعید خدری رضی اللہ عنہ سے روایت ہے، انہوں نے کہا کہ ایک بار رسول اللہ صلی اللہ علیہ وسلم کچھ تقسیم کر رہے تھے کہ ایک آدمی آیا اور آپ صلی اللہ علیہ وسلم کے اوپر جھک گیا، تو آپ صلی اللہ علیہ وسلم نے اپنی کھجور کی لاٹھی سے جو آپ کے پاس تھی اسے کچوکا دیا، پس اس سے اس کا چہرہ زخمی ہو گیا۔ تو رسول اللہ صلی اللہ علیہ وسلم نے اس سے فرمایا: ”آؤ اور اپنا بدلہ لے لو۔“ اس نے جواب دیا: ”اے اللہ کے رسول! میں نے معاف کیا۔“ [سنن ابي داود/كتاب الديات /حدیث: 4536]

جناب عبدالرحمٰن بن ابو لیلیٰ، سیدنا اسید بن حضیر رضی اللہ عنہ سے روایت کرتے ہیں اور یہ انصار میں سے تھے کہ یہ ایک دفعہ اپنی قوم سے باتیں کر رہے تھے، مزاحیہ آدمی تھے اور انہیں ہنسا رہے تھے کہ نبی کریم صلی اللہ علیہ وسلم نے ان کی کوکھ میں ایک لکڑی چبھو دی۔ تو انہوں نے (اسید بن حضیر نے) کہا: ”مجھے بدلہ دیجیے۔“ آپ صلی اللہ علیہ وسلم نے فرمایا: ”لے لو۔“ انہوں نے کہا: ”آپ پر تو قمیص ہے اور مجھ پر قمیص نہیں تھی۔“ تو نبی کریم صلی اللہ علیہ وسلم نے اپنی قمیص اوپر کر دی۔ تو اسید رضی اللہ عنہ نے آپ صلی اللہ علیہ وسلم کو اپنے بازوؤں میں لے لیا اور آپ صلی اللہ علیہ وسلم کے پہلو پر بوسے دینے لگے اور کہنے لگے: ”اے اللہ کے رسول! میری یہی نیت تھی۔“ [سنن ابي داود/كتاب الديات /حدیث: 5224]