اپنے رب کے نام کی تسبیح کر جو سب سے بلند ہے۔

وہ جس نے پیدا کیا، پس درست بنایا۔

اور وہ جس نے اندازہ ٹھہرایا، پھر ہدایت کی ۔

اور وہ جس نے چارا اگایا۔

پھر اس نے اسے سیاہ کوڑا کرکٹ کر دیا ۔

ہم ضرور تجھے پڑھائیں گے تو تو نہیں بھولے گا۔

مگر جو اللہ چاہے۔ یقینا وہ کھلی بات کو جانتا ہے اور اس بات کو بھی جو چھپی ہوئی ہے۔

اور ہم تجھے آسان راستے کے لیے سہولت دیں گے ۔

سو تو نصیحت کر ، اگر نصیحت کرنافائدہ دے ۔

عنقریب نصیحت حاصل کرے گا جو ڈرتا ہے ۔

اور اس سے علیحدہ رہے گا جو سب سے بڑا بدنصیب ہے ۔

وہ جو سب سے بڑی آگ میں داخل ہو گا۔

پھر وہ نہ اس میں مرے گا اور نہ زندہ رہے گا ۔

بے شک وہ کامیاب ہوگیا جو پاک ہوگیا ۔

اور اس نے اپنے رب کا نام یاد کیا، پس نماز پڑھی ۔

بلکہ تم دنیا کی زندگی کو ترجیح دیتے ہو ۔

حالانکہ آخرت کہیں بہتر اور زیادہ باقی رہنے والی ہے ۔

بے شک یہ بات یقینا پہلے صحیفوں میں ہے ۔

ابراہیم اور موسیٰ کے صحیفوں میں ۔