محمد بن سلام بیکندی بیان کرتے ہیں: نبی اکرم صلی اللہ علیہ وسلم کے زمانے سے کچھ پہلے سے لے کر، نبی اکرم صلی اللہ علیہ وسلم کے زمانہ اقدس تک جس چیز کو شرف سمجھا جاتا تھا اور یہ چیز اسلام میں بھی شامل ہوئی، وہ یمن کا ایک گھرانہ ہے، جو صفہ میں کندہ میں تھا، سیدنا اشعث بن قیس رضی اللہ عنہ اور ان کے شہوار زبید سے تعلق رکھتے تھے، عمرو بن معدیکرب ان کا شاعر تھا، امرءالقیس کندہ سے تعلق رکھتا تھا، اس بارے میں کوئی اختلاف نہیں ہے۔ (علامہ ہیثمی فرماتے ہیں:) مجھے نہیں پتہ کہ اس کا مفہوم کیا ہے؟ [مجمع الزاوئد ومنبع الفوائد/كِتَابُ الْمَنَاقِبِ/حدیث: 16172]

ابواسحاق بیان کرتے ہیں: میں نے کندہ سے تعلق رکھنے والے شخص سے قرض لینا تھا، میں سحری کے وقت اس کے پاس آتا جاتا رہا، ایک دن میں فجر کی نماز کے بعد سیدنا اشعث بن قیس رضی اللہ عنہ کی مسجد میں موجود تھا، میں نے نماز ادا کی، جب امام نے سلام پھیرا، تو سیدنا اشعث بن قیس رضی اللہ عنہ نے مسجد میں ہر شخص کے آگے ایک لباس اور ایک جوتا اور پانچ سو درہم رکھوائے، میں نے کہا: میں اس مسجد کے باقاعدہ آنے والوں میں سے نہیں ہوں، تو انہوں نے فرمایا: اگرچہ تم مسجد کے باقاعدہ آنے والوں میں سے نہیں ہو (پھر بھی اسے قبول کرو) تو میں نے کہا: یہ کون صاحب ہیں؟ تو لوگوں نے بتایا کہ یہ سیدنا اشعت بن قیس رضی اللہ عنہ ہیں، جو مکہ سے آئے ہیں۔
یہ روایت امام طبرانی نے نقل کی ہے اور اس کی سند میں ایک راوی ابواسرائیل ملائی ہے، جس کے بارے میں اختلاف پایا جاتا ہے، اس روایت کے بقیہ رجال صحیح کے رجال ہیں۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 16173]

قیس بن ابوحازم بیان کرتے ہیں: جب سیدنا اشعث بن قیس رضی اللہ عنہ تشریف لائے، تو میں نے سیدنا ابوبکر صدیق رضی اللہ عنہ کو مشورہ دیا، انہوں نے ان کی بندش کھولی اور اپنی بہن کے ساتھ ان کی شادی کروا دی، سیدنا اشعث بن قیس رضی اللہ عنہ نے اپنی تلوار سونتی، وہ اونٹوں کے بازار میں داخل ہوئے اور انہیں جو بھی اونٹ اور اونٹنی نظر آئے، وہ اس کے پاؤں کاٹتے گئے، لوگ بلند آواز میں کہنے لگے: سیدنا اشعث رضی اللہ عنہ نے کفر اختیار کر لیا ہے، جب سیدنا اشعث رضی اللہ عنہ اس بات سے فارغ ہوئے، تو انہوں نے اپنی تلوار رکھی اور بولے: اللہ کی قسم! میں نے کفر نہیں کیا ہے، بلکہ ان صاحب نے (یعنی امیرالمؤمنین نے) اپنی بہن کے ساتھ میری شادی کی ہے، اگر ہم اپنے علاقے میں موجود ہوتے تو ہمارا ولیمہ اس سے زیادہ بڑا ہوتا، اے اہل مدینہ! تم ان سب جانوروں کو قربان کر کے ان کا گوشت کھاؤ، اور اے اونٹوں والو! تم آگے آؤ اور اپنا معاوضہ وصول کرو۔
یہ روایت امام طبرانی نے نقل کی ہے اور اس کے رجال صحیح کے رجال ہیں، صرف عبدالمؤمن بن علی کا معاملہ مختلف ہے اور وہ ثقہ ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 16174]