سیدنا ابن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم نے سیدنا زبیر اور سیدنا ابن مسعود رضی اللہ عنہما کے مابین بھائی چارہ قائم فرمایا۔“ [المعجم الأوسط/بَابُ الْأَلِفِ/حدیث: 929]

سیدنا ابن عباس رضی اللہ عنہما سے مروی ہے کہ انہوں نے فرمایا: ” ﴿اور کسی چیز کے متعلق ہرگز یہ نہ کہو کہ میں اسے کل کرنے والا ہوں، سوائے اس کے کہ اللہ چاہے؛ اور جب تم بھول جاؤ تو اپنے رب کو یاد کرو﴾ کہ تم «إِنْ شَاءَ اللهُ» کہو۔“ [المعجم الأوسط/بَابُ الْأَلِفِ/حدیث: 930]

سیدنا ابو امامہ رضی اللہ عنہ، سیدنا خالد بن ولید رضی اللہ عنہ سے روایت کرتے ہیں کہ انہوں نے رسول اللہ صلی اللہ علیہ وسلم سے ان ہولناک خوابوں کا ذکر کیا جو وہ رات کو دیکھتے تھے، جن کی وجہ سے وہ رات کی نماز نہیں پڑھ پاتے تھے، تو رسول اللہ صلی اللہ علیہ وسلم نے فرمایا: ”اے خالد بن ولید! کیا میں تمہیں ایسے کلمات نہ سکھاؤں کہ تم انہیں تین مرتبہ بھی نہیں کہو گے مگر اللہ تعالیٰ تم سے وہ کیفیت دور کر دے گا؟“ انہوں نے عرض کیا: ”کیوں نہیں، اے اللہ کے رسول! میرے ماں باپ آپ پر فدا ہوں، میں نے آپ سے اسی کی امید میں یہ شکایت کی تھی۔“ آپ صلی اللہ علیہ وسلم نے فرمایا: ”تم کہو: «‏‏‏‏أَعُوذُ بِكَلِمَاتِ اللهِ التَّامَّةِ مِنْ غَضَبِهِ، وَعِقَابِهِ، وَشَرِّ عِبَادِهِ، وَمِنْ هَمَزَاتِ الشَّيَاطِينِ، وَأَنْ يَحْضُرُونَ» ‏‏‏‏ ”میں اللہ کے کامل کلمات کے ذریعے اس کے غضب، اس کی سزا، اس کے بندوں کے شر، شیطانوں کے وسوسوں اور اس بات سے کہ وہ میرے پاس حاضر ہوں، پناہ مانگتا ہوں۔““
ام المومنین سیدہ عائشہ رضی اللہ عنہا فرماتی ہیں کہ ابھی چند ہی راتیں گزری تھیں کہ سیدنا خالد بن ولید رضی اللہ عنہ تشریف لائے اور عرض کیا: ”اے اللہ کے رسول! میرے ماں باپ آپ پر فدا ہوں، اس ذات کی قسم جس نے آپ کو حق کے ساتھ مبعوث فرمایا! ابھی میں نے وہ کلمات جو آپ نے مجھے سکھائے تھے تین مرتبہ پورے بھی نہیں کیے تھے کہ اللہ تعالیٰ نے وہ کیفیت مجھ سے دور کر دی جو میں محسوس کرتا تھا، اب مجھے کوئی پروا نہیں اگر میں رات کے وقت شیر کے کٹہرے میں بھی داخل ہو جاؤں۔“ [المعجم الأوسط/بَابُ الْأَلِفِ/حدیث: 931]

نافع رحمہ اللہ بیان کرتے ہیں کہ سیدنا ابن عمر رضی اللہ عنہما، سیدنا ابوسعید خدری رضی اللہ عنہ کے پاس تشریف لائے اور عرض کیا: ”اے ابوسعید! ہمیں یہ خبر پہنچی ہے کہ آپ رسول اللہ صلی اللہ علیہ وسلم سے سود کے بارے میں کوئی حدیث بیان کرتے ہیں، وہ ہمیں واضح طور پر بتائیے“۔
سیدنا ابوسعید رضی اللہ عنہ نے فرمایا کہ رسول اللہ صلی اللہ علیہ وسلم نے ارشاد فرمایا: ”سونا سونے کے بدلے برابر سرابر ہو، نہ اس میں کوئی زیادتی ہو اور نہ ہی ادھار؛ اور چاندی چاندی کے بدلے برابر سرابر ہو، نہ اس میں کوئی زیادتی ہو اور نہ ہی ادھار۔ نیز کسی غیر موجود (غائب) چیز کو نقد کے بدلے فروخت نہ کرو“۔ (سیدنا ابوسعید رضی اللہ عنہ نے اس کے آخر میں فرمایا:) ”میری دونوں آنکھوں نے (آپ صلی اللہ علیہ وسلم کو فرماتے ہوئے) دیکھا اور میرے دونوں کانوں نے سنا ہے“۔ [المعجم الأوسط/بَابُ الْأَلِفِ/حدیث: 932]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”کسی مسلمان شخص کے لیے، جس کے پاس وصیت کے لائق کوئی چیز ہو، یہ زیبا نہیں کہ اس پر دو راتیں گزر جائیں اور اس کی وصیت اس کے پاس لکھی ہوئی نہ ہو۔“
سیدنا عبداللہ بن عمر رضی اللہ عنہما نے فرمایا: ”جس وقت سے میں نے رسول اللہ صلی اللہ علیہ وسلم کا یہ ارشاد سنا ہے، اس کے بعد سے مجھ پر کبھی دو راتیں ایسی نہیں گزریں کہ میری وصیت میرے پاس لکھی ہوئی موجود نہ ہو۔“ [المعجم الأوسط/بَابُ الْأَلِفِ/حدیث: 933]

ام المومنین سیدہ عائشہ رضی اللہ عنہا بیان کرتی ہیں کہ ”میں رسول اللہ صلی اللہ علیہ وسلم کو سنا کرتی تھی کہ جب میرے گھر میں شام کا وقت ہوتا تو آپ صلی اللہ علیہ وسلم فرماتے تھے: «أَمْسَيْنَا وَأَمْسَى الْمُلْكُ لِلهِ، وَالْحَمْدُ وَالْحَوْلُ وَالْقُوَّةُ وَالْقُدْرَةُ وَالسُّلْطَانُ فِي السَّمَاوَاتِ وَالْأَرْضِ وَكُلُّ شَيْءٍ لِلهِ رَبِّ الْعَالَمِينَ . اللَّهُمَّ بِكَ أَصْبَحْنَا، وَبِكَ أَمْسَيْنَا وَبِكَ نَحْيَا وَبِكَ نَمُوتُ وَإِلَيْكَ الْمَصِيرُ» ”ہم نے شام کی اور اللہ کی سلطنت نے شام کی، اور تمام تعریف، طاقت، قوت، قدرت اور اقتدار آسمانوں اور زمین میں اللہ ہی کے لیے ہے، اور ہر چیز اللہ رب العالمین ہی کی ملکیت ہے۔ اے اللہ! تیرے ہی حکم و توفیق سے ہم نے صبح کی، اور تیرے ہی حکم و توفیق سے ہم نے شام کی، تیرے ہی حکم سے ہم جیتے ہیں، تیرے ہی حکم سے ہم مریں گے اور تیری ہی طرف لوٹنا ہے۔“
اور جب صبح ہوتی تو آپ صلی اللہ علیہ وسلم فرماتے: «أَصْبَحْنَا وَأَصْبَحَ الْمُلْكُ لِلهِ، وَالْحَمْدُ وَالْقُوَّةُ وَالْحَوْلُ وَالْقُدْرَةُ وَالسُّلْطَانُ فِي السَّمَاوَاتِ وَفِي الْأَرْضِ وَكُلُّ شَيْءٍ لِلهِ رَبِّ الْعَالَمِينَ . اللَّهُمَّ بِكَ أَمْسَيْنَا، وَبِكَ أَصْبَحْنَا وَبِكَ نَحْيَا وَبِكَ نَمُوتُ وَإِلَيْكَ النُّشُورُ» ”ہم نے صبح کی اور اللہ کی سلطنت نے صبح کی، اور تمام تعریف، قوت، طاقت، قدرت اور اقتدار آسمانوں میں اور زمین میں اللہ ہی کے لیے ہے، اور ہر چیز اللہ رب العالمین ہی کی ملکیت ہے۔ اے اللہ! تیرے ہی حکم و توفیق سے ہم نے شام کی، اور تیرے ہی حکم و توفیق سے ہم نے صبح کی، تیرے ہی حکم سے ہم جیتے ہیں، تیرے ہی حکم سے ہم مریں گے اور تیری ہی طرف دوبارہ جی اٹھنا ہے۔““ [المعجم الأوسط/بَابُ الْأَلِفِ/حدیث: 934]

سیدنا عبداللہ بن عمر رضی اللہ عنہما سے روایت ہے کہ انہوں نے فرمایا: ”رسول اللہ صلی اللہ علیہ وسلم نے ہمیں استخارہ کرنا سکھایا، پس آپ صلی اللہ علیہ وسلم نے فرمایا: ”تم میں سے ہر ایک (یہ دعا) کہے: «‏‏‏‏اللَّهُمَّ إِنِّي أَسْتَخِيرُكَ بِعِلْمِكَ، وَأَسْتَقْدِرُكَ بِقُدْرَتِكَ، وَأَسْأَلُكَ مِنْ فَضْلِكَ، فَإِنَّكَ تَقْدِرُ وَلَا أَقْدِرُ، وَتَعْلَمُ وَلَا أَعْلَمُ وَأَنْتَ عَلَّامُ الْغُيُوبِ، فَإِنْ كَانَ كَذَا وَكَذَا» ‏‏‏‏ — اور یہاں وہ اپنے معاملے کا نام لے — «‏‏‏‏خَيْرًا لِي فِي دِينِي وَفِي مَعِيشَتِي، وَخَيْرًا لِي فِي عَاقِبَةِ أَمْرِي، وَخَيْرًا لِي فِي الْأُمُورِ كُلِّهَا، فَاقْدُرْهُ لِي، وَبَارِكْ لِي فِيهِ، وَإِنْ كَانَ غَيْرُ ذَلِكَ خَيْرًا لِي، فَاقْدُرْ لِيَ الْخَيْرَ حَيْثُ كَانَ وَرَضِّنِي بِهِ» ‏‏‏‏ ”اے اللہ! میں تیرے علم کی بدولت تجھ سے خیر طلب کرتا ہوں، اور تیری قدرت کے ذریعے تجھ سے قدرت مانگتا ہوں، اور میں تیرے فضلِ عظیم کا سوالی ہوں، کیونکہ تو قدرت رکھتا ہے اور میں قدرت نہیں رکھتا، تو جانتا ہے اور میں نہیں جانتا، اور تو ہی تمام پوشیدہ باتوں کا خوب جاننے والا ہے۔ (اے اللہ!) اگر یہ معاملہ (فلاں کام) میرے لیے میرے دین، میری زندگی اور میرے انجامِ کار میں بہتر ہے، بلکہ تمام معاملات میں میرے حق میں بہتر ہے، تو اسے میرے لیے مقدر فرما دے اور اس میں میرے لیے برکت عطا فرما۔ اور اگر اس کے علاوہ کوئی اور صورت میرے لیے بہتر ہے، تو جہاں کہیں بھی بھلائی ہو اسے میرے لیے مقدر فرما دے اور پھر مجھے اس پر راضی کر دے۔“““ [المعجم الأوسط/بَابُ الْأَلِفِ/حدیث: 935]

سیدنا ابو کبشہ انماری رضی اللہ عنہ سے روایت ہے کہ رسول اللہ صلی اللہ علیہ وسلم اپنے سر کے وسط اور دونوں کندھوں کے درمیان پچھنے لگواتے تھے اور فرماتے تھے: ”جس نے اپنے جسم سے یہ خون بہا دیا، تو اسے اس بات سے کوئی نقصان نہیں پہنچے گا کہ وہ کسی بھی بیماری کے لیے کسی اور چیز سے علاج نہ کرے۔“ [المعجم الأوسط/بَابُ الْأَلِفِ/حدیث: 936]

ام المومنین سیدہ ام سلمہ رضی اللہ عنہا یا سیدہ حفصہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”کسی عورت کے لیے یہ حلال نہیں کہ وہ کسی بھی میت پر تین دن سے زیادہ سوگ منائے، سوائے اپنے شوہر کے کہ اس پر عدت ختم ہونے تک سوگ منائے۔“
امام طبرانی رحمہ اللہ فرماتے ہیں: ”یہ احادیث ابومعید رحمہ اللہ سے صرف عمرو رحمہ اللہ نے روایت کی ہیں۔ نیز سلیمان بن موسیٰ رحمہ اللہ کی نافع رحمہ اللہ کے واسطے سے سیدنا ابن عمر رضی اللہ عنہما سے مروی وہ حدیث کہ نبی صلی اللہ علیہ وسلم نے فرمایا: «‏‏‏‏لَا يَنْبَغِي لِامْرِئٍ مُسْلِمٍ لَهُ مَا يُوصِي فِيهِ» ‏‏‏‏ ”کسی مسلمان شخص کے لیے، جس کے پاس وصیت کرنے کے لائق کوئی چیز ہو، یہ مناسب نہیں (کہ وہ رات گزارے اور وصیت اس کے پاس لکھی نہ ہو)“، اسے سلیمان رحمہ اللہ سے صرف ابومعید رحمہ اللہ نے روایت کیا ہے۔“ [المعجم الأوسط/بَابُ الْأَلِفِ/حدیث: 937]

سیدنا جابر بن عبداللہ انصاری رضی اللہ عنہما سے روایت ہے کہ انہوں نے فرمایا: ”ہم (سفر پر) نکلے اور ہمارے ساتھ وہ عورتیں بھی تھیں جن سے ہم نے متعہ کیا تھا، یہاں تک کہ جب ہم مقامِ ثنیۃ الرکاب پہنچے تو ہم نے عرض کیا: اے اللہ کے رسول! یہ وہ عورتیں ہیں جن سے ہم نے متعہ کیا تھا۔ تو رسول اللہ صلی اللہ علیہ وسلم نے ارشاد فرمایا: ”یہ قیامت کے دن تک کے لیے حرام ہیں“، چنانچہ اس موقع پر ان خواتین نے ہمیں الوداع کہا اور اسی وجہ سے اس مقام کا نام ”ثنیۃ الوداع“ پڑ گیا، جبکہ اس سے قبل اسے محض ”ثنیۃ الرکاب“ کہا جاتا تھا۔“ [المعجم الأوسط/بَابُ الْأَلِفِ/حدیث: 938]