سیدنا ابو امامہ باہلی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اس امت میں ایک گروہ نکلے گا، ان کے پاس کوڑے ہوں گے جو گائے کی دموں کی طرح ہوں گے، وہ صبح اللہ کی ناراضی میں کریں گے اور شام اس کے غضب میں کریں گے۔“
امام طبرانی رحمہ اللہ فرماتے ہیں: ”یہ حدیث سیدنا ابو امامہ رضی اللہ عنہ سے اسی سند کے ساتھ ہی مروی ہے، اس میں عبداللہ بن بجیر منفرد ہیں۔“ [المعجم الأوسط/بَابُ الْمِيمِ/حدیث: 5251]

سیدنا سعد رضی اللہ عنہ سے روایت ہے کہ رسول اللہ صلی اللہ علیہ وسلم نے کچھ مال تقسیم فرمایا، کچھ لوگوں کو دیا اور کچھ کو چھوڑ دیا، تو میں نے عرض کیا: ”اے اللہ کے رسول! آپ نے فلاں کو دیا اور فلاں کو محروم رکھا، حالانکہ وہ مومن ہے؟“ آپ صلی اللہ علیہ وسلم نے فرمایا: ”یوں نہ کہو کہ مومن ہے، بلکہ یوں کہو کہ مسلم ہے۔“
امام طبرانی رحمہ اللہ فرماتے ہیں: ”اس حدیث کو سلام بن ابی مطیع سے ابوالولید کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 5252]

عبدالحمید بن ابی امیہ رحمہ اللہ بیان کرتے ہیں کہ ہم سیدنا انس بن مالک رضی اللہ عنہ کے پاس تھے تو انہوں نے فرمایا: میں نے رسول اللہ صلی اللہ علیہ وسلم کو فرماتے سنا، جبکہ آپ صلی اللہ علیہ وسلم کے پاس ایک آدمی کو نمازِ جنازہ پڑھانے کے لیے لایا گیا تھا، آپ صلی اللہ علیہ وسلم نے دریافت فرمایا: ”کیا تمہارے ساتھی پر کوئی قرض ہے؟“ صحابہ نے عرض کیا: ”جی ہاں۔“ تو آپ صلی اللہ علیہ وسلم نے فرمایا: ”اگر میں ایسے آدمی کی نماز پڑھاؤں جس کی روح اس کی قبر میں گروی رکھی ہوئی ہے اور آسمان کی طرف بلند نہیں ہوتی، تو اس سے تمہیں کیا فائدہ ہوگا؟ ہاں اگر کوئی شخص اس کے قرض کا ضامن بن جائے تو میں کھڑا ہو کر اس کی نماز پڑھا دوں گا، کیونکہ میری نماز اسے نفع دے گی۔“
امام طبرانی رحمہ اللہ فرماتے ہیں: ”یہ حدیث سیدنا انس رضی اللہ عنہ سے صرف اسی سند سے مروی ہے، اسے روایت کرنے میں عیسیٰ بن صدقہ منفرد ہیں۔“
دار الحرمین کے نسخے میں اسی طرح ہے، جبکہ درست ”عبدالحمید بن امیہ“ ہے۔ [المعجم الأوسط/بَابُ الْمِيمِ/حدیث: 5253]

ام المومنین سیدہ عائشہ رضی اللہ عنہا بیان کرتی ہیں: ”رسول اللہ صلی اللہ علیہ وسلم باریوں کی تقسیم میں ایک بیوی کو دوسری پر فوقیت نہیں دیتے تھے، اور کم ہی ایسا ہوتا کہ کوئی دن گزرے اور آپ صلی اللہ علیہ وسلم ہم سب کے پاس چکر نہ لگاتے، چنانچہ آپ صلی اللہ علیہ وسلم ہر بیوی کے پاس جا کر بغیر مباشرت کے اس سے ملتے، یہاں تک کہ اس بیوی کے پاس پہنچتے جس کی اس دن باری ہوتی اور وہیں ٹھہر جاتے۔ اور جب سیدہ سودہ بنت زمعہ رضی اللہ عنہا عمر رسیدہ ہو گئیں اور انہیں اندیشہ ہوا کہ کہیں آپ صلی اللہ علیہ وسلم انہیں جدا نہ کر دیں تو انہوں نے آپ صلی اللہ علیہ وسلم سے عرض کیا: ”اے اللہ کے رسول! میری جو باری آپ صلی اللہ علیہ وسلم کے ہاں مجھے ملتی ہے وہ عائشہ کے لیے ہے۔“ تو آپ صلی اللہ علیہ وسلم نے ان کی یہ بات قبول فرما لی۔ اور اسی طرح کے معاملات کے بارے میں یہ آیت نازل ہوئی: ﴿وَإِنِ امْرَأَةٌ خَافَتْ مِنْ بَعْلِهَا نُشُوزًا أَوْ إِعْرَاضًا﴾ الآیہ۔“
امام طبرانی رحمہ اللہ فرماتے ہیں: ”اس حدیث کو ہشام بن عروہ سے عبدالرحمن بن ابی الزناد کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 5254]

سیدنا ابوہریرہ رضی اللہ عنہ بیان کرتے ہیں: ”رسول اللہ صلی اللہ علیہ وسلم کی نمازِ جنازہ تین دن تک پڑھی جاتی رہی۔“
امام طبرانی رحمہ اللہ فرماتے ہیں: ”اس حدیث کو محمد بن عمرو سے عبدالرحمن بن مسہر کے سوا کسی نے روایت نہیں کیا، اور اسے روایت کرنے میں عیسیٰ بن ابراہیم برکی منفرد ہیں۔“ [المعجم الأوسط/بَابُ الْمِيمِ/حدیث: 5255]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے اشج عبدالقیس سے فرمایا: ”بلاشبہ تم میں دو خصلتیں ایسی ہیں جنہیں اللہ تعالیٰ پسند فرماتا ہے: بردباری اور سوچ سمجھ کر کام کرنا (تحمل و وقار)۔“
امام طبرانی رحمہ اللہ فرماتے ہیں: ”اس حدیث کو قرہ سے بشر بن مفضل کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 5256]

ام المومنین سیدہ عائشہ رضی اللہ عنہا بیان کرتی ہیں کہ سیدنا حبیب بن حارث رضی اللہ عنہ رسول اللہ صلی اللہ علیہ وسلم کے پاس آئے اور عرض کیا: ”اے اللہ کے رسول! میں ایسا آدمی ہوں جو بہت زیادہ گناہوں کا ارتکاب کرتا ہے؟“ آپ صلی اللہ علیہ وسلم نے فرمایا: ”اے حبیب! اللہ کے حضور توبہ کرو۔“ انہوں نے عرض کیا: ”اے اللہ کے رسول! میں توبہ کرتا ہوں، پھر دوبارہ گناہ کر بیٹھتا ہوں؟“ آپ صلی اللہ علیہ وسلم نے فرمایا: ”جب بھی گناہ کرو، توبہ کرو۔“ انہوں نے عرض کیا: ”اے اللہ کے رسول! پھر تو میرے گناہ بہت بڑھ جائیں گے؟“ تو آپ صلی اللہ علیہ وسلم نے فرمایا: ”اے حبیب بن حارث! اللہ کی معافی تمہارے گناہوں سے کہیں زیادہ وسیع ہے۔“
امام طبرانی رحمہ اللہ فرماتے ہیں: ”یہ حدیث ہشام بن عروہ سے صرف اسی سند سے روایت کی جاتی ہے، اس میں عیسیٰ بن ابراہیم برکی منفرد ہیں۔“ [المعجم الأوسط/بَابُ الْمِيمِ/حدیث: 5257]

سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”قرآن کے حامل کو، جب وہ اس کے حلال کو حلال اور اس کے حرام کو حرام سمجھے (اور اس پر عمل کرے)، یہ حق حاصل ہوگا کہ وہ اپنے گھر والوں میں سے دس ایسے افراد کی شفاعت کرے جن سب پر جہنم واجب ہو چکی ہو۔“
امام طبرانی رحمہ اللہ فرماتے ہیں: ”اس حدیث کو جعفر بن حارث سے سلم بن سالم کے سوا کسی نے روایت نہیں کیا، اس میں عیسیٰ بن سالم منفرد ہیں۔“ [المعجم الأوسط/بَابُ الْمِيمِ/حدیث: 5258]

عبداللہ بن محمد بن عقیل رحمہ اللہ بیان کرتے ہیں کہ میں نے سیدنا انس بن مالک رضی اللہ عنہ سے پوچھا: ”کیا رسول اللہ صلی اللہ علیہ وسلم کے بال سفید ہوئے تھے؟“ انہوں نے فرمایا: ”میرے خیال میں آپ صلی اللہ علیہ وسلم کے سر اور داڑھی میں پندرہ بال بھی سفید نہیں تھے، اور رسول اللہ صلی اللہ علیہ وسلم انہیں زرد خضاب سے رنگ دیا کرتے تھے۔“
امام طبرانی رحمہ اللہ فرماتے ہیں: ”اس حدیث کو عبداللہ بن محمد بن عقیل سے مبارک بن فضالہ کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 5259]

ام المومنین سیدہ عائشہ رضی اللہ عنہا فرماتی ہیں: ”میں نے رسول اللہ صلی اللہ علیہ وسلم کو فرماتے ہوئے سنا: ”اللہ کے لیے آپس میں محبت کرنے والے یاقوت کے ایک ستون پر ہوں گے، جس کے لیے آسمان میں ساٹھ میل بلند کھوکھلے یاقوت کا ایک خیمہ ہوگا، اس کے ہر گوشے میں ان کی بیویاں ہوں گی جن کا دوسروں کو علم نہیں ہوگا۔ ان میں سے کوئی ایک جنتیوں کی طرف جھانکے گا تو اہلِ جنت کو نور سے بھر دے گا، یہاں تک کہ اہلِ جنت کہیں گے: یہ کیا نئی چیز ظاہر ہوئی ہے؟ پھر وہ ایک دوسرے سے کہیں گے: یہ کیسی روشنی ہے جو نمودار ہوئی ہے؟ تو وہ ایک دوسرے سے کہیں گے: تمہاری طرف اللہ کے لیے محبت کرنے والوں میں سے ایک آدمی نے جھانکا ہے۔““
امام طبرانی رحمہ اللہ فرماتے ہیں: ”یہ حدیث سیدہ عائشہ رضی اللہ عنہا سے اس سند کے سوا مروی نہیں۔“ [المعجم الأوسط/بَابُ الْمِيمِ/حدیث: 5260]