سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میرے حجرے اور میری نماز کی جگہ کے درمیان کا حصہ جنت کے باغوں میں سے ایک باغ ہے۔“
امام طبرانی رحمہ اللہ فرماتے ہیں: ”علی بن حکم سے اس حدیث کو عدی بن فضل کے سوا کسی نے روایت نہیں کیا، اس میں سعید بن سلیمان منفرد ہیں۔“ [المعجم الأوسط/بَابُ الْمِيمِ/حدیث: 5231]

سیدنا عبداللہ بن سائب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”عرب اپنے آبا و اجداد کی جائے پیدائش تک، یعنی شیح اور قیصوم (خوشبودار جنگلی بوٹیوں) کے اگنے کی جگہوں تک پہنچ جائیں گے۔“
امام طبرانی رحمہ اللہ فرماتے ہیں: ”قاسم بن ابی بزہ سے اس حدیث کو علی بن حکم کے سوا کسی نے روایت نہیں کیا، اور علی سے عدی بن فضل کے سوا کسی نے روایت نہیں کیا، اس میں سعید بن سلیمان منفرد ہیں۔“ [المعجم الأوسط/بَابُ الْمِيمِ/حدیث: 5232]

سیدنا بریدہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تین قسم کے لوگوں کے قریب فرشتے نہیں آتے: نشے میں مدہوش شخص، زعفران (یا خلوق خوشبو) لگانے والا، اور جنبی (جس پر غسل فرض ہو)۔“
امام طبرانی رحمہ اللہ فرماتے ہیں: ”اس حدیث کو یوسف بن صہیب سے عبداللہ بن حکیم، یعنی ابوبکر داہری کے سوا کسی نے روایت نہیں کیا، اور اس میں سعید بن سلیمان منفرد ہیں۔“ [المعجم الأوسط/بَابُ الْمِيمِ/حدیث: 5233]

سیدنا بریدہ رضی اللہ عنہ سے روایت ہے کہ جب سیدنا جعفر بن ابی طالب رضی اللہ عنہ حبشہ سے واپس آئے تو رسول اللہ صلی اللہ علیہ وسلم نے ان سے پوچھا: ”وہاں تم نے سب سے عجیب چیز کیا دیکھی؟“ انہوں نے عرض کیا: میں نے ایک عورت دیکھی جس کے سر پر کھانے کی ٹوکری تھی، ایک گھڑ سوار تیزی سے گھوڑا دوڑاتا ہوا گزرا تو اس نے ٹوکری گرا کر کھانا بکھیر دیا۔ وہ بیٹھ کر اسے سمیٹنے لگی، پھر اس سوار کی طرف متوجہ ہو کر کہنے لگی: ”تیرے لیے ہلاکت ہو اس دن جب بادشاہ (حقیقی) اپنی کرسی رکھے گا اور مظلوموں کو ظالم سے ان کا حق دلائے گا۔“ تو رسول اللہ صلی اللہ علیہ وسلم نے اس کی بات کی تصدیق کرتے ہوئے فرمایا: ”وہ امت پاکیزہ نہیں کی جاتی“ یا فرمایا: ”وہ امت کیسے پاکیزہ کی جائے گی جس کا کمزور فرد اپنے طاقتور سے اپنا حق اس طرح نہ لے سکے کہ اسے کوئی اذیت یا سختی بھی نہ پہنچے؟“
امام طبرانی رحمہ اللہ فرماتے ہیں: ”اس حدیث کو عطاء بن سائب سے منصور بن ابی الاسود اور عمرو بن ابی قیس کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 5234]

سیدنا معاذ بن جبل رضی اللہ عنہ بیان کرتے ہیں کہ جب رسول اللہ صلی اللہ علیہ وسلم نے مجھے یمن کی طرف بھیجا اور میں آپ صلی اللہ علیہ وسلم کے پاس سے روانہ ہوا تو آپ صلی اللہ علیہ وسلم نے میرے پیچھے آدمی بھیجا (اور مجھے بلوایا)، پھر فرمایا: ”کیا تم جانتے ہو میں نے تمہیں کیوں بلوایا؟ میں نے تمہیں اس لیے بلوایا کہ (کوئی مال) لینے کے معاملے میں احتیاط رکھنا، جو چیز تمہیں لینے کی اجازت دی گئی ہو اس کے سوا کچھ نہ لینا، کیونکہ وہ خیانت (غلول) ہے، اور جو خیانت کرے گا وہ قیامت کے دن اپنی خیانت کی ہوئی چیز لے کر آئے گا۔“
امام طبرانی رحمہ اللہ فرماتے ہیں: ”اس حدیث کو مغیرہ بن شبیل سے داود اودی کے سوا کسی نے روایت نہیں کیا، اور اس میں ابو اسامہ منفرد ہیں۔“ [المعجم الأوسط/بَابُ الْمِيمِ/حدیث: 5235]

ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”جس گھر میں کھجور نہ ہو اس کے رہنے والے بھوکے ہیں۔“
امام طبرانی رحمہ اللہ فرماتے ہیں: ”اس حدیث کو زہری سے عبدالرحمن بن کردم کے سوا کسی نے روایت نہیں کیا، اور اس میں عبدالرحمن بن قیس منفرد ہیں۔“ [المعجم الأوسط/بَابُ الْمِيمِ/حدیث: 5236]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب گرمی کی شدت ہو تو نماز ٹھنڈے وقت میں پڑھا کرو، کیونکہ گرمی کی شدت جہنم کے سانس (کی تپش) سے ہوتی ہے۔“
امام طبرانی رحمہ اللہ فرماتے ہیں: ”اس حدیث کو یزید بن عبداللہ بن قسیط سے ایوب بن عتبہ کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 5237]

سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”سینگی لگانے والے اور سینگی لگوانے والے دونوں کا روزہ ٹوٹ گیا۔“ [المعجم الأوسط/بَابُ الْمِيمِ/حدیث: 5238]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس نے عشاء کی نماز جماعت کے ساتھ ادا کی، پھر مسجد سے نکلنے سے پہلے چار رکعتیں پڑھیں تو یہ اسے لیلۃ القدر کے برابر ثواب دلائے گی۔“
امام طبرانی رحمہ اللہ فرماتے ہیں: ”اس حدیث کو سیدنا ابن عمر رضی اللہ عنہما سے محارب بن دثار کے سوا کسی نے روایت نہیں کیا، اور محارب سے ابو حنیفہ کے سوا کسی نے روایت نہیں کیا، اور اسحاق ازرق اس روایت میں منفرد ہیں۔“ [المعجم الأوسط/بَابُ الْمِيمِ/حدیث: 5239]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”تم میں سب سے بہتر وہ لوگ ہیں جو نماز میں اپنے کندھوں کو (صف میں ملنے کے لیے) سب سے زیادہ نرم رکھتے ہیں۔ اور کسی بندے کا اٹھایا ہوا کوئی قدم اس قدم سے زیادہ اجر والا نہیں جو کوئی شخص صف کے خلا کی طرف چل کر جائے اور اسے پُر کر دے۔“ [المعجم الأوسط/بَابُ الْمِيمِ/حدیث: 5240]