قتادہ فرماتے ہیں کہ حضرت عمر بن خطاب رضی اللہ عنہ نے فرمایا: ولاء کا رشتہ نسب کے رشتے کی مانند ہے، اس کو فروخت یا ہبہ نہ کیا جائے گا۔ [السنن الكبرى للبيهقي/كتاب الولاء/حدیث: 21440]

مجاہد رحمہ اللہ فرماتے ہیں کہ سیدنا علی رضی اللہ عنہ فرماتے ہیں کہ ولاء ایک معاہدہ کی مانند ہے، تو میں بھی اس کو برقرار رکھوں گا جہاں اللہ نے اس کو برقرار رکھا ہے۔ [السنن الكبرى للبيهقي/كتاب الولاء/حدیث: 21441]

مجاہد سیدنا علی رضی اللہ عنہ سے نقل فرماتے ہیں کہ رسول اللہ صلی اللہ علیہ وسلم نے فرمایا: ”ولاء کا رشتہ نسب کے رشتہ کی جگہ ہے، فروخت یا ہبہ نہیں کیا جا سکتا۔ میں اس کو برقرار رکھوں گا، جہاں اللہ نے اس کو برقرار رکھا ہے۔“ [السنن الكبرى للبيهقي/كتاب الولاء/حدیث: 21442]

عبداللہ بن معقل رحمہ اللہ فرماتے ہیں کہ میں نے سیدنا علی رضی اللہ عنہ سے سنا، وہ فرماتے ہیں کہ: ”ولاء نسب کی ایک قسم ہے۔“ [السنن الكبرى للبيهقي/كتاب الولاء/حدیث: 21443]

عبداللہ بن معقل فرماتے ہیں کہ سیدنا علی رضی اللہ عنہ سے ولاء کو فروخت کرنے کے بارے میں سوال کیا گیا تو فرمایا: کیا نسب کو فروخت کیا جاتا ہے؟ [السنن الكبرى للبيهقي/كتاب الولاء/حدیث: 21444]

عطاء، ابن عباس رضی اللہ عنہما سے نقل فرماتے ہیں کہ ”ولاء کو فروخت یا ہبہ نہ کیا جائے گا، ولاء اس کی ہے جس نے آزاد کیا ہے۔“ [السنن الكبرى للبيهقي/كتاب الولاء/حدیث: 21445]

سیدنا ابن مسعود رضی اللہ عنہ فرماتے ہیں کہ ”ولاء کو فروخت نہ کیا جائے گا۔“ [السنن الكبرى للبيهقي/كتاب الولاء/حدیث: 21446]

مجاہد، سیدنا علی رضی اللہ عنہ سے نقل فرماتے ہیں کہ انہوں نے ولاء کو فروخت اور ہبہ کرنے سے منع کیا۔
سیدنا علی رضی اللہ عنہ نے ولاء کو فروخت اور ہبہ کرنے سے منع فرمایا ہے۔ [السنن الكبرى للبيهقي/كتاب الولاء/حدیث: 21447]

امام شافعی رحمہ اللہ نے فرمایا: ”وہ (کسی کے ہاتھ پر) اسلام لانے یا (باہمی) موالات کی بنا پر اس کا مولیٰ نہیں بنے گا۔“
اور انہوں نے اس بارے میں زید بن حارثہ رضی اللہ عنہ کے متعلق اللہ تعالیٰ کے اپنے نبی صلی اللہ علیہ وسلم سے فرمان سے استدلال کیا: ﴿ادْعُوهُمْ لِآبَائِهِمْ هُوَ أَقْسَطُ عِنْدَ اللهِ فَإِنْ لَمْ تَعْلَمُوا آبَاءَهُمْ فَإِخْوَانُكُمْ فِي الدِّينِ وَمَوَالِيكُمْ﴾ ”انہیں ان کے باپوں کی نسبت سے پکارو، یہ اللہ کے نزدیک زیادہ انصاف کی بات ہے، پھر اگر تم ان کے باپوں کو نہ جانتے ہو تو وہ دین میں تمہارے بھائی اور تمہارے دوست (موالی) ہیں۔“ [سورة الأحزاب: 5]
اور فرمایا: ﴿وَإِذْ تَقُولُ لِلَّذِي أَنْعَمَ اللهُ عَلَيْهِ وَأَنْعَمْتَ عَلَيْهِ﴾ ”اور (یاد کریں) جب آپ اس شخص سے فرما رہے تھے جس پر اللہ نے انعام کیا اور آپ نے (بھی) اس پر انعام کیا۔“ [سورة الأحزاب: 37]
تو اللہ تعالیٰ نے موالی کو دو نسبتوں کی طرف منسوب کیا: ان میں سے ایک باپوں کی طرف، اور دوسری ولاء کی طرف، اور ولاء کو انعام (یعنی آزاد کرنے کے احسان) کی بنیاد پر قرار دیا... [السنن الكبرى للبيهقي/كتاب الولاء/حدیث: Q21448]

ابن عمر رضی اللہ عنہما حضرت عائشہ رضی اللہ عنہا سے نقل فرماتے ہیں کہ حضرت عائشہ رضی اللہ عنہا نے ایک لونڈی خریدنا چاہی تاکہ آزاد کر دیں تو مالک کہنے لگے: فروخت کر دیتے ہیں، لیکن ولاء میری ہوگی۔ تو حضرت عائشہ رضی اللہ عنہا نے اس کا تذکرہ نبی صلی اللہ علیہ وسلم سے کیا، آپ صلی اللہ علیہ وسلم نے فرمایا: ”یہ چیز تجھے خریدنے سے نہ روکے۔ ولاء اس کی ہوتی ہے جو آزاد کرتا ہے۔“ [السنن الكبرى للبيهقي/كتاب الولاء/حدیث: 21448]