(نبی کریم صلی اللہ علیہ وسلم نے فرمایا:)
”کیا اس شخص کو کوئی ایسی چیز میسر نہیں تھی جس سے یہ اپنے سر کے بکھرے بالوں کو سنوار لیتا؟ کیا اس شخص کو کوئی ایسی چیز (پانی وغیرہ) نہیں ملی جس سے یہ اپنے کپڑے دھو لیتا؟“ [صحيح الجامع الصغير وزيادته/[حرف الألف] -- أل م/حدیث: 1333]

(نبی کریم صلی اللہ علیہ وسلم نے فرمایا:)
”کیا تم اپنی قوم کی وادی سے اس حال میں نہیں گزرے کہ وہ بالکل بنجر اور قحط زدہ تھی، پھر تم وہاں سے گزرے تو وہ سرسبز و شاداب تھی، پھر تم گزرے تو وہ بنجر تھی، پھر گزرے تو وہ سرسبز تھی؟ (بالکل اسی طرح موت کے بعد زندگی ملے گی، جیسا کہ اللہ تعالیٰ کا فرمان ہے:) ﴿كَذَلِكَ يُحْيِي اللَّهُ الْمَوْتَى﴾ ”اسی طرح اللہ تعالیٰ مُردوں کو زندہ فرماتا ہے۔“ [سورة البقرة: 73] “ [صحيح الجامع الصغير وزيادته/[حرف الألف] -- أل م/حدیث: 1334]

(نبی کریم صلی اللہ علیہ وسلم نے فرمایا:)
”سن لو! اللہ کی قسم، بے شک میں تم سب سے زیادہ اللہ سے ڈرنے والا اور تم سب سے بڑھ کر اس کا تقویٰ اختیار کرنے والا ہوں۔“ [صحيح الجامع الصغير وزيادته/[حرف الألف] -- أل م/حدیث: 1335]

(نبی کریم صلی اللہ علیہ وسلم نے فرمایا:)
”سن لو! اللہ کی قسم، میں تم سب سے زیادہ اللہ سے ڈرنے والا اور اس کا تقویٰ اختیار کرنے والا ہوں، لیکن (اس کے باوجود) میں روزے بھی رکھتا ہوں اور چھوڑتا بھی ہوں، میں (رات کو نفل) نماز بھی پڑھتا ہوں اور سوتا بھی ہوں، اور میں نے عورتوں سے نکاح بھی کیا ہے۔ پس جس شخص نے میری سنت سے اعراض کیا (منہ موڑا)، اس کا مجھ سے کوئی تعلق نہیں ہے۔“ [صحيح الجامع الصغير وزيادته/[حرف الألف] -- أل م/حدیث: 1336]

(نبی کریم صلی اللہ علیہ وسلم نے فرمایا:)
”سن لو! اللہ کی قسم، میں آسمان والوں کے نزدیک بھی امانت دار (امین) ہوں اور زمین والوں کے نزدیک بھی امانت دار ہوں۔“ [صحيح الجامع الصغير وزيادته/[حرف الألف] -- أل م/حدیث: 1337]

(نبی کریم صلی اللہ علیہ وسلم نے فرمایا:)
”سن لو! اللہ کی قسم، اگر اسامہ کوئی لڑکی ہوتی تو میں ضرور اسے زیور پہناتا اور اس کا بناؤ سنگھار کرتا تاکہ میں اسے رخصت کر دوں (یعنی اس کی شادی کروا دوں)۔“ [صحيح الجامع الصغير وزيادته/[حرف الألف] -- أل م/حدیث: 1338]

(نبی کریم صلی اللہ علیہ وسلم نے فرمایا:)
”سن لو! اللہ کی قسم، اگر یہ قاعدہ نہ ہوتا کہ قاصدوں (سفیروں) کو قتل نہیں کیا جاتا، تو میں تم دونوں کی گردنیں اڑا دیتا۔“ [صحيح الجامع الصغير وزيادته/[حرف الألف] -- أل م/حدیث: 1339]

(نبی کریم صلی اللہ علیہ وسلم نے فرمایا:)
”کیا تم میں سے کوئی اس بات سے نہیں ڈرتا کہ جب وہ نماز میں اپنا سر (آسمان کی طرف) اٹھائے تو اس کی بینائی واپس نہ لوٹائی جائے (یعنی چھین لی جائے)؟“ [صحيح الجامع الصغير وزيادته/[حرف الألف] -- أل م/حدیث: 1340]

(نبی کریم صلی اللہ علیہ وسلم نے فرمایا:)
”کیا تم میں سے کوئی اس بات سے نہیں ڈرتا کہ جب وہ امام سے پہلے اپنا سر (رکوع یا سجدے سے) اٹھائے تو اللہ تعالیٰ اس کے سر کو گدھے کے سر میں بدل دے، یا اللہ تعالیٰ اس کی صورت کو گدھے کی صورت بنا دے؟“ [صحيح الجامع الصغير وزيادته/[حرف الألف] -- أل م/حدیث: 1341]

(نبی کریم صلی اللہ علیہ وسلم نے فرمایا:)
”جہاں تک ابراہیم (علیہ السلام) کا تعلق ہے تو تم اپنے ساتھی (یعنی مجھے) دیکھ لو (میں ان کے مشابہ ہوں)، اور جہاں تک موسیٰ (علیہ السلام) کی بات ہے تو وہ گندمی رنگت اور گھنگھریالے بالوں والے تھے۔ گویا میں انہیں دیکھ رہا ہوں کہ وہ وادی میں اتر رہے ہیں اور ایک سرخ اونٹ پر سوار تلبیہ پڑھ رہے ہیں، جس کی نکیل کھجور کی چھال کی رسی سے بنی ہوئی ہے۔“ [صحيح الجامع الصغير وزيادته/[حرف الألف] -- أل م/حدیث: 1342]