(نبی کریم صلی اللہ علیہ وسلم نے فرمایا:)
”میرے نام پر نام رکھو لیکن میری کنیت اختیار نہ کرو، کیونکہ میں ابوالقاسم ہوں، میں تمہارے درمیان تقسیم کرتا ہوں۔“ [صحيح الجامع الصغير وزيادته/حرف التاء./حدیث: 2949]

(نبی کریم صلی اللہ علیہ وسلم نے فرمایا:)
”صدقہ کیا کرو، کیونکہ تم پر ایک ایسا زمانہ آئے گا کہ آدمی اپنا صدقہ لے کر پھرے گا، اور جس کے پاس وہ لے کر جائے گا وہ کہے گا: اگر تم یہ کل لے آتے تو میں قبول کر لیتا، لیکن اب مجھے اس کی ضرورت نہیں، پس اسے کوئی قبول کرنے والا نہیں ملے گا۔“ [صحيح الجامع الصغير وزيادته/حرف التاء./حدیث: 2950]

(نبی کریم صلی اللہ علیہ وسلم نے فرمایا:)
”صدقہ کرو خواہ ایک کھجور ہی کیوں نہ ہو، کیونکہ یہ بھوکے کی بھوک مٹا دیتی ہے اور گناہ کو اسی طرح بجھا دیتی ہے جیسے پانی آگ کو بجھاتا ہے۔“ [صحيح الجامع الصغير وزيادته/حرف التاء./حدیث: 2951]

(نبی کریم صلی اللہ علیہ وسلم نے فرمایا:)
”خرچ کرو اور مال کو سمیٹ کر مت رکھو، ورنہ تم پر بھی رزق روک دیا جائے گا۔“ [صحيح الجامع الصغير وزيادته/حرف التاء./حدیث: 2952]

(نبی کریم صلی اللہ علیہ وسلم نے فرمایا:)
”آدمی کا اپنے گھر میں نفل نماز پڑھنا لوگوں کے سامنے نفل پڑھنے سے اسی طرح افضل ہے جیسے آدمی کی باجماعت نماز اس کی اکیلے نماز پڑھنے سے افضل ہوتی ہے۔“ [صحيح الجامع الصغير وزيادته/حرف التاء./حدیث: 2953]

(نبی کریم صلی اللہ علیہ وسلم نے فرمایا:)
”آپس میں حدود کو معاف کر دیا کرو، کیونکہ جو حد میرے پاس پہنچ جائے وہ واجب ہو جاتی ہے۔“ [صحيح الجامع الصغير وزيادته/حرف التاء./حدیث: 2954]

(نبی کریم صلی اللہ علیہ وسلم نے فرمایا:)
”آؤ، مجھ سے اس بات پر بیعت کرو کہ تم اللہ کے ساتھ کسی کو شریک نہیں ٹھہراؤ گے، چوری نہیں کرو گے، زنا نہیں کرو گے، اپنی اولاد کو قتل نہیں کرو گے، اپنے ہاتھوں اور پیروں کے درمیان کوئی بہتان گھڑ کر نہیں لاؤ گے، اور کسی نیک بات میں میری نافرمانی نہیں کرو گے۔ پس تم میں سے جو اسے پورا کرے گا اس کا اجر اللہ کے ذمے ہے، اور جو ان میں سے کسی چیز کا ارتکاب کر بیٹھے اور اسے دنیا میں اس کی سزا مل جائے تو وہ اس کے لیے کفارہ بن جائے گی، اور جو ان میں سے کسی چیز کا ارتکاب کرے اور اللہ اسے چھپا لے تو اس کا معاملہ اللہ کے سپرد ہے، چاہے تو اسے سزا دے اور چاہے تو معاف کر دے۔“ [صحيح الجامع الصغير وزيادته/حرف التاء./حدیث: 2955]

(نبی کریم صلی اللہ علیہ وسلم نے فرمایا:)
”قرآن کی حفاظت کیا کرو، اس ذات کی قسم جس کے ہاتھ میں میری جان ہے! یہ آدمیوں کے دلوں سے اونٹ کے اپنی رسی سے چھوٹنے سے بھی زیادہ تیزی سے نکل جاتا ہے۔“ [صحيح الجامع الصغير وزيادته/حرف التاء./حدیث: 2956]

(نبی کریم صلی اللہ علیہ وسلم نے فرمایا:)
”حج کے لیے جلدی کرو، کیونکہ تم میں سے کسی کو معلوم نہیں کہ اسے کیا پیش آ جائے۔“ [صحيح الجامع الصغير وزيادته/حرف التاء./حدیث: 2957]

(نبی کریم صلی اللہ علیہ وسلم نے فرمایا:)
”لوگوں کے اعمال ہر ہفتے دو دن پیش کیے جاتے ہیں: پیر کے دن اور جمعرات کے دن، پس ہر مومن بندے کو بخش دیا جاتا ہے سوائے اس بندے کے جس کے اور اس کے بھائی کے درمیان دشمنی ہو، تو کہا جاتا ہے: ان دونوں کو چھوڑ دو یہاں تک کہ یہ صلح کر لیں۔“ [صحيح الجامع الصغير وزيادته/حرف التاء./حدیث: 2958]