سیدنا علی رضی اللہ عنہ سے روایت ہے کہ انہوں نے بیان کیا کہ رسول اللہ صلی اللہ علیہ وسلم نے مجھے ایک ایسی قوم کی طرف (قاضی بنا کر) بھیجا جو عمر رسیدہ لوگ تھے جبکہ میں نو عمر تھا، تو آپ صلی اللہ علیہ وسلم نے مجھے نصیحت فرمائی: ”جب تمہارے پاس دو فریق مقدمہ لے کر آئیں تو کسی ایک کی بات اس وقت تک نہ سنو جب تک کہ دوسرے کی بات بھی نہ سن لو، کیونکہ اس طرح تمہارے لیے فیصلہ کرنا واضح ہو جائے گا“، سیدنا علی رضی اللہ عنہ فرماتے ہیں کہ: ”پھر میں نے یہ طریقہ سیکھ لیا اور اس کے بعد میں ہمیشہ (حق کے مطابق فیصلہ کرنے والا) قاضی رہا“۔ [مسند أبي يعلى الموصلي/مسند علي بن أبي طالب رضي الله عنه/حدیث: 371]

سیدنا علی رضی اللہ عنہ سے مروی ہے کہ ”نبی کریم صلی اللہ علیہ وسلم رمضان المبارک کے آخری عشرے میں اپنے اہل و عیال کو (عبادت و شب بیداری کے لیے) بیدار فرمایا کرتے تھے۔“ [مسند أبي يعلى الموصلي/مسند علي بن أبي طالب رضي الله عنه/حدیث: 372]

سیدنا علی رضی اللہ عنہ سے روایت ہے کہ نبی کریم صلی اللہ علیہ وسلم ”رمضان المبارک کے آخری عشرے میں اپنے اہل و عیال کو بیدار فرمایا کرتے تھے۔“ [مسند أبي يعلى الموصلي/مسند علي بن أبي طالب رضي الله عنه/حدیث: 373]

سیدنا علی رضی اللہ عنہ سے روایت ہے کہ ”رسول اللہ صلی اللہ علیہ وسلم رمضان کے آخری عشرے میں اپنے اہل خانہ کو (عبادت کے لیے) بیدار فرمایا کرتے تھے اور پردے اٹھا دیا کرتے تھے۔“ [مسند أبي يعلى الموصلي/مسند علي بن أبي طالب رضي الله عنه/حدیث: 374]

سیدنا علی رضی اللہ عنہ سے روایت ہے کہ ہم رسول اللہ صلی اللہ علیہ وسلم کے ہمراہ ایک جنازے میں شریک ہوئے، پس جب ہم بقیع الغرقد پہنچے تو رسول اللہ صلی اللہ علیہ وسلم تشریف فرما ہوئے اور ہم بھی آپ کے ساتھ بیٹھ گئے، آپ صلی اللہ علیہ وسلم نے ایک لکڑی پکڑی اور اس کے ذریعے زمین کریدنے لگے، پھر اپنا سرِ مبارک اٹھایا اور ارشاد فرمایا: ”تم میں سے ہر ہر شخص اور ہر پیدا ہونے والی جان کا جنت یا دوزخ میں ٹھکانا اور اس کا بدبخت یا خوش بخت ہونا اللہ کے علم میں ہے (اور لکھا جا چکا ہے)۔“ اس پر مجمع میں سے ایک شخص نے عرض کی: (یا رسول اللہ صلی اللہ علیہ وسلم !) کیا پھر ہم عمل کرنا چھوڑ کر اپنی تقدیر پر توکل نہ کر لیں؟ کیونکہ ہم میں سے جو شخص خوش بختوں میں سے ہوگا وہ خوش بختی والے عمل کی طرف ہی سہولت پائے گا اور جو بدبختوں میں سے ہوگا وہ بدبختی کی طرف ہی جائے گا؟ تو رسول اللہ صلی اللہ علیہ وسلم نے ارشاد فرمایا: ”نہیں! بلکہ تم عمل کرتے رہو، کیونکہ ہر ایک کے لیے وہی راستہ آسان کر دیا جاتا ہے (جس کے لیے اسے پیدا کیا گیا ہے)، پس جو خوش بختوں میں سے ہے اس کے لیے خوش بختی والے اعمال کی راہ آسان کر دی جائے گی اور جو بدبختوں میں سے ہے اس کے لیے بدبختی والے اعمال کی راہ آسان کر دی جائے گی۔“ [مسند أبي يعلى الموصلي/مسند علي بن أبي طالب رضي الله عنه/حدیث: 375]

سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”چار باتیں ایسی ہیں کہ کوئی بھی شخص اس وقت تک ایمان کی حلاوت و چاشنی نہیں پا سکتا جب تک وہ ان پر کامل ایمان نہ لے آئے: اس بات کا اقرار کرنا کہ اللہ کے سوا کوئی معبودِ برحق نہیں، وہ اکیلا ہے اور اس کا کوئی شریک نہیں، اور یہ کہ میں اللہ کا رسول ہوں جسے اس نے حق کے ساتھ مبعوث فرمایا ہے، اور یہ کہ انسان کو موت آنی ہے اور مرنے کے بعد اسے دوبارہ زندہ کر کے اٹھایا جانا ہے، اور یہ کہ وہ تقدیر کے تمام تر خیر و شر کے فیصلوں پر مکمل ایمان رکھے۔“ [مسند أبي يعلى الموصلي/مسند علي بن أبي طالب رضي الله عنه/حدیث: 376]

سیدنا علی رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”اللہ تعالیٰ کی معصیت اور نافرمانی میں کسی بھی شخص کی اطاعت و فرمانبرداری جائز نہیں ہے۔“ [مسند أبي يعلى الموصلي/مسند علي بن أبي طالب رضي الله عنه/حدیث: 377]

سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے ایک چھوٹا لشکر (سریہ) روانہ فرمایا اور ایک انصاری شخص کو ان کا امیر مقرر کیا اور انہیں حکم دیا کہ وہ اپنے امیر کی بات سنیں اور اطاعت کریں، پھر (دورانِ سفر) ان لوگوں نے امیر کو کسی بات پر غصہ دلا دیا تو اس نے کہا: ”میرے لیے لکڑیاں جمع کرو“، پھر اس نے کہا: ”آگ جلاؤ“، چنانچہ انہوں نے آگ روشن کر دی، پھر اس نے کہا: ”کیا رسول اللہ صلی اللہ علیہ وسلم نے تمہیں میری بات سننے اور اطاعت کرنے کا حکم نہیں دیا تھا؟“ انہوں نے عرض کیا: ”کیوں نہیں!“، اس نے کہا: ”تو پھر اس آگ میں داخل ہو جاؤ“، یہ سن کر وہ ایک دوسرے کو دیکھنے لگے اور کہنے لگے: ”ہم تو رسول اللہ صلی اللہ علیہ وسلم کی طرف آگ ہی سے بچنے کے لیے بھاگ کر آئے ہیں“، وہ اسی کیفیت میں تھے کہ امیر کا غصہ ٹھنڈا ہو گیا اور آگ بجھ گئی، پھر جب وہ لوگ رسول اللہ صلی اللہ علیہ وسلم کی خدمت میں واپس آئے اور آپ صلی اللہ علیہ وسلم سے اس واقعے کا تذکرہ کیا تو آپ صلی اللہ علیہ وسلم نے ارشاد فرمایا: ”اگر وہ اس میں داخل ہو جاتے تو پھر کبھی اس سے نہ نکل پاتے، یقیناً اطاعت تو صرف معروف (بھلائی کے کاموں) میں ہے“۔ [مسند أبي يعلى الموصلي/مسند علي بن أبي طالب رضي الله عنه/حدیث: 378]

سیدنا علی رضی اللہ عنہ سے روایت ہے کہ میں نے عرض کیا: ”اے اللہ کے رسول صلی اللہ علیہ وسلم ! کیا وجہ ہے کہ آپ قریش کے دیگر خاندانوں میں تو نکاح کی رغبت فرماتے ہیں اور ہمیں نظر انداز کر دیتے ہیں؟“ آپ صلی اللہ علیہ وسلم نے دریافت فرمایا: ”کیا تمہارے پاس کوئی (ایسا رشتہ) ہے؟“ میں نے عرض کیا: ”جی ہاں، سیدنا حمزہ رضی اللہ عنہ کی صاحبزادی ہے“، اس پر نبی کریم صلی اللہ علیہ وسلم نے ارشاد فرمایا: ”وہ میرے لیے حلال نہیں ہے، کیونکہ وہ میرے رضاعی بھائی کی بیٹی ہے“۔ [مسند أبي يعلى الموصلي/مسند علي بن أبي طالب رضي الله عنه/حدیث: 379]

سیدنا علی رضی اللہ عنہ سے روایت ہے کہ میں نے عرض کی: ”اے اللہ کے رسول صلی اللہ علیہ وسلم ! کیا وجہ ہے کہ آپ قریش کی دیگر خواتین میں تو رغبت فرماتے ہیں اور ہمیں نظر انداز کر دیتے ہیں؟“ آپ صلی اللہ علیہ وسلم نے دریافت فرمایا: ”کیا تمہارے پاس کوئی تجویز ہے؟“ میں نے عرض کی: ”جی ہاں، سیدنا حمزہ رضی اللہ عنہ کی صاحبزادی۔“ تو نبی کریم صلی اللہ علیہ وسلم نے ارشاد فرمایا: ”بلاشبہ وہ میرے رضاعی بھائی کی بیٹی ہے۔“ [مسند أبي يعلى الموصلي/مسند علي بن أبي طالب رضي الله عنه/حدیث: 380]