سیدنا جابر بن عبداللہ رضی اللہ عنہما سے روایت ہے کہ نبی کریم صلی اللہ علیہ وسلم نے ”کشمش اور خشک کھجوروں کو، اور اسی طرح گدر کھجوروں اور پختہ کھجوروں کو باہم ملا کر (نبیذ تیار کرنے کے لیے) بھگونے سے منع فرمایا ہے۔“ [مسند أبي يعلى الموصلي/مسند جابر/حدیث: 1768]

سیدنا جابر رضی اللہ عنہ سے روایت ہے کہ ”نبی اکرم صلی اللہ علیہ وسلم کے لیے پتھر کے بنے ہوئے ایک برتن (تور) میں نبیذ تیار کی جاتی تھی۔“ [مسند أبي يعلى الموصلي/مسند جابر/حدیث: 1769]

سیدنا جابر بن عبد اللہ رضی اللہ عنہما سے روایت ہے کہ ہم رسول اللہ صلی اللہ علیہ وسلم کے ہمراہ تھے، تو (نماز کے انتظار میں) مجھے نیند آ گئی، پھر میں بیدار ہوا، پھر سو گیا اور پھر بیدار ہوا، اسی اثنا میں مسلمانوں میں سے ایک شخص کھڑے ہوئے اور آواز دی: ”نماز! نماز!“، تو رسول اللہ صلی اللہ علیہ وسلم ہمارے پاس باہر تشریف لائے درآنحالیکہ آپ صلی اللہ علیہ وسلم کے سرِ مبارک سے پانی کے قطرے ٹپک رہے تھے، پھر آپ صلی اللہ علیہ وسلم نے ہمیں نماز پڑھائی اور اس کے بعد ارشاد فرمایا: ”اگر یہ بات نہ ہوتی کہ میں اپنی امت کو مشقت میں ڈال دوں گا، اور میں یہ پسند نہیں کرتا کہ اپنی امت پر بوجھ بنوں، تو میں یقیناً اس بات کو محبوب رکھتا کہ تم یہ نماز (اسی طرح تاخیر کے ساتھ) اس وقت پڑھا کرو۔“ راویِ حدیث فرات رحمہ اللہ کہتے ہیں کہ میرا گمان ہے کہ اس سے مراد نمازِ عشاء ہے۔ [مسند أبي يعلى الموصلي/مسند جابر/حدیث: 1770]

سیدنا جابر بن عبد اللہ رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم اپنے مویشیوں اور (باہر چرنے والے) بکھر جانے والے جانوروں کو (گھروں میں) روکے رکھو یہاں تک کہ عشاء کی ابتدائی تاریکی اور ہیبت کا وقت گزر جائے، کیونکہ یہ وہ گھڑی ہے جس میں شیاطین جلتے ہیں۔“ [مسند أبي يعلى الموصلي/مسند جابر/حدیث: 1771]

سیدنا جابر رضی اللہ عنہ سے روایت ہے کہ انہوں نے فرمایا: ”رسول اللہ صلی اللہ علیہ وسلم نے ہمیں حکم دیا کہ ہم (رات کے وقت) اپنے دروازے بند کر دیا کریں، برتنوں کو ڈھانپ کر رکھا کریں، مشکیزوں کے تسمے باندھ دیا کریں، چراغوں کو بجھا دیا کریں اور عشاء کی ابتدائی تاریکی چھٹ جانے تک اپنے مویشیوں کو (باہر پھیلنے سے) روک کر رکھا کریں، نیز آپ صلی اللہ علیہ وسلم نے اس بات سے منع فرمایا کہ ہم میں سے کوئی بائیں ہاتھ سے کھانا کھائے، یا ایک ہی جوتا پہن کر چلے، اور آپ صلی اللہ علیہ وسلم نے ’صماء‘ (جسم پر چادر اس طرح لپیٹنا کہ ہاتھ باہر نہ نکل سکیں) اور ایک ہی کپڑے میں ’احتباء‘ (گھٹنوں کو پیٹ سے لگا کر اس طرح بیٹھنا کہ ستر کھلنے کا اندیشہ ہو) کرنے سے بھی منع فرمایا۔“ [مسند أبي يعلى الموصلي/مسند جابر/حدیث: 1772]

سیدنا جابر بن عبد اللہ رضی اللہ عنہما سے روایت ہے کہ ”رسول اللہ صلی اللہ علیہ وسلم نے نجاشی (شاہِ حبشہ) کی نمازِ جنازہ پڑھائی۔“ سیدنا جابر رضی اللہ عنہ بیان کرتے ہیں کہ ”میں (اس وقت) دوسری یا تیسری صف میں موجود تھا۔“ [مسند أبي يعلى الموصلي/مسند جابر/حدیث: 1773]

سیدنا جابر رضی اللہ عنہ اور سیدنا ابوہریرہ رضی اللہ عنہ سے روایت ہے کہ سیدنا ابو حمید رضی اللہ عنہ نامی ایک شخص نبی کریم صلی اللہ علیہ وسلم کی خدمتِ اقدس میں دن کے وقت مقامِ نقیع سے دودھ کا ایک برتن لے کر حاضر ہوئے، تو رسول اللہ صلی اللہ علیہ وسلم نے ارشاد فرمایا: «أَلَا خَمَّرْتَهُ وَلَوْ أَنْ تَعْرُضَ عَلَيْهِ بِعُودٍ» ”تم نے اسے ڈھانپ کیوں نہ دیا؟ خواہ تم اس پر چوڑائی میں کوئی لکڑی ہی رکھ دیتے“۔ [مسند أبي يعلى الموصلي/مسند جابر/حدیث: 1774]

سیدنا ابو ہریرہ اور سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: «سَدِّدُوا وَقَارِبُوا، وَلَنْ يُنِجِيَ أَحَدًا مِنْكُمْ عَمَلُهُ» ”درستی اختیار کرو اور میانہ روی اپناؤ، اور (یاد رکھو کہ) تم میں سے کسی کو بھی اس کا عمل ہرگز نجات نہیں دلا سکے گا“، ہم نے عرض کیا: اے اللہ کے رسول صلی اللہ علیہ وسلم ! کیا آپ کو بھی نہیں؟ آپ صلی اللہ علیہ وسلم نے ارشاد فرمایا: «وَلَا أَنَا إِلَّا أَنْ يَتَغَمَّدَنِي اللَّهُ مِنْهُ بِرَحْمَةٍ» ”مجھے بھی نہیں، سوائے اس کے کہ اللہ تعالیٰ مجھے اپنی جانب سے رحمت میں ڈھانپ لے۔“ [مسند أبي يعلى الموصلي/مسند جابر/حدیث: 1775]

سیدنا جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: «الْعَارُ وَالتَّخْزِيَةُ تَبْلُغُ مِنِ ابْنِ آدَمَ فِي الْقِيَامَةِ فِي الْمَقَامِ بَيْنَ يَدَيِ اللَّهِ مَا يَتَمَنَّى الْعَبْدُ أَنْ يُؤْمَرَ بِهِ فِي النَّارِ» ”قیامت کے دن اللہ رب العزت کے حضور پیشی کے مقام پر شرمندگی اور ذلت و رسوائی کا احساس ابنِ آدم پر اس قدر غالب ہوگا کہ بندہ یہ تمنا کرے گا کہ کاش اسے جہنم میں بھیج دیے جانے کا حکم دے دیا جائے۔“ [مسند أبي يعلى الموصلي/مسند جابر/حدیث: 1776]

سیدنا جابر بن عبداللہ رضی اللہ عنہ سے روایت ہے کہ ”رسول اللہ صلی اللہ علیہ وسلم نے سیدنا ابوطیبہ رضی اللہ عنہ کو طلب فرمایا اور انہوں نے آپ صلی اللہ علیہ وسلم کے پچھنے لگائے (حجامہ کیا)، پھر آپ صلی اللہ علیہ وسلم نے ان سے ان کے خراج (مالک کو ادا کی جانے والی مقررہ رقم) کے بارے میں دریافت فرمایا، تو انہوں نے عرض کیا: ”تین صاع“، جس پر آپ صلی اللہ علیہ وسلم نے ان کے خراج میں سے ایک صاع کم کروا دیا۔“ [مسند أبي يعلى الموصلي/مسند جابر/حدیث: 1777]