سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”میں نے جبرائیل علیہ السلام سے دریافت کیا کہ (سیدنا) موسیٰ علیہ السلام نے (مدین میں قیام کی) دونوں مدتوں میں سے کون سی مدت پوری کی تھی؟ تو انہوں نے بتایا کہ ان میں سے جو زیادہ کامل اور زیادہ مکمل تھی (یعنی آپ نے دس سالہ مدت پوری فرمائی)۔“ [مسند أبي يعلى الموصلي/أول مسند ابن عباس/حدیث: 2408]

سیدنا ابن عباس رضی اللہ عنہما سے روایت ہے کہ انہوں نے فرمایا: ”جمعرات کا دن! اور کیا ہی (کٹھن) دن تھا وہ جمعرات کا دن! یہ وہ دن تھا جس میں رسول اللہ صلی اللہ علیہ وسلم کی تکلیف میں شدت آ گئی تو آپ صلی اللہ علیہ وسلم نے فرمایا: ”میرے پاس (لکھنے کا سامان) لاؤ تاکہ میں تمہارے لیے ایک ایسی تحریر لکھ دوں جس کے بعد تم کبھی گمراہ نہ ہو گے۔“ اس پر لوگوں میں اختلاف پیدا ہو گیا، حالانکہ کسی نبی کے حضور جھگڑا کرنا زیب نہیں دیتا، چنانچہ آپ صلی اللہ علیہ وسلم نے فرمایا: ”مجھے میرے حال پر چھوڑ دو، کیونکہ میں اس وقت جس (کیفیتِ استغراق و توجہ الٰہی) میں ہوں وہ اس سے بہتر ہے جس کی تم مجھ سے طلب کر رہے ہو۔“ پھر آپ صلی اللہ علیہ وسلم نے انہیں تین باتوں کا حکم فرمایا، آپ صلی اللہ علیہ وسلم نے فرمایا: ”مشرکین کو جزیرہ عرب سے نکال دینا اور وفود کی اسی طرح مہمان نوازی و خاطر مدارات کرنا جس طرح میں ان کی کیا کرتا تھا۔“ اور تیسری بات کے متعلق (راوی سعید بن جبیر رحمہ اللہ کہتے ہیں کہ) مجھے یاد نہیں کہ انہوں نے وہ بیان فرمائی تھی اور میں اسے بھول گیا یا انہوں نے اسے سرے سے بیان ہی نہیں فرمایا۔“ [مسند أبي يعلى الموصلي/أول مسند ابن عباس/حدیث: 2409]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم سفید لباس اختیار کرو، تمہارے زندوں کو وہی زیبِ تن کرنا چاہیے اور اپنے وفات پا جانے والوں کو بھی اسی میں کفن دیا کرو، اور تم اثمد (سرمہ) کا استعمال لازم کر لو کیونکہ یہ بصارت کو جلا بخشتا ہے اور بال (پلکیں) اگاتا ہے“۔ [مسند أبي يعلى الموصلي/أول مسند ابن عباس/حدیث: 2410]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”پانی کو کوئی چیز ناپاک نہیں کرتی۔“ [مسند أبي يعلى الموصلي/أول مسند ابن عباس/حدیث: 2411]

سیدنا ابن عباس رضی اللہ عنہما سے روایت ہے کہ انہوں نے فرمایا: ”نبی کریم صلی اللہ علیہ وسلم کی وفات اس حال میں ہوئی کہ آپ صلی اللہ علیہ وسلم کی عمر مبارک پینسٹھ برس تھی۔“ [مسند أبي يعلى الموصلي/أول مسند ابن عباس/حدیث: 2412]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”وہ شخص ہم میں سے نہیں جس نے کسی غلام کو اس کے آقا کے خلاف ورغلایا، اور وہ شخص بھی ہم میں سے نہیں جس نے کسی عورت کو اس کے شوہر کے خلاف بگاڑ کر (میاں بیوی کے تعلقات میں) فساد پیدا کیا، اور وہ شخص بھی ہم میں سے نہیں جس نے گھڑ دوڑ کے مقابلے والے دن گھوڑوں کو (شور و غل یا ناجائز طریقے سے) اشتعال دلایا۔“ [مسند أبي يعلى الموصلي/أول مسند ابن عباس/حدیث: 2413]

سیدنا عبد اللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے خیبر کے دن حاملہ عورتوں کے ساتھ ہم بستری کرنے سے منع فرمایا اور یہ حکم دیا کہ ”تم اپنے پانی سے کسی دوسرے کی کھیتی کو سیراب نہ کرو“، نیز آپ صلی اللہ علیہ وسلم نے مالِ غنیمت کو تقسیم کیے جانے سے قبل فروخت کرنے، گھریلو گدھوں کا گوشت کھانے اور ہر کچلی (نوکیلے دانت) والے شکاری درندے کو کھانے سے بھی منع فرمایا۔ [مسند أبي يعلى الموصلي/أول مسند ابن عباس/حدیث: 2414]

سیدنا ابن عباس رضی اللہ عنہما سے روایت ہے کہ اللہ کے نبی صلی اللہ علیہ وسلم نے ارشاد فرمایا: ”عدن سے بارہ ہزار (ایسے مجاہدین) نکلیں گے جو اللہ اور اس کے رسول کی نصرت و حمایت کریں گے، وہ میرے اور اپنے درمیانی عہد کے لوگوں میں سب سے بہتر ہیں۔“ اور راویِ حدیث معتمر رحمہ اللہ بیان کرتے ہیں کہ میرا گمان ہے کہ آپ صلی اللہ علیہ وسلم نے (ان کے مقام کے متعلق) یہ بھی فرمایا کہ وہ ”اعماق (نامی علاقے) میں ہوں گے۔“ [مسند أبي يعلى الموصلي/أول مسند ابن عباس/حدیث: 2415]

سیدنا ابن عباس رضی اللہ عنہما سے روایت ہے کہ انہوں نے اس حدیث کو نبی کریم صلی اللہ علیہ وسلم تک مرفوعاً بیان فرمایا ہے، اور اس کی سند میں سعید بن جبیر رحمہ اللہ یا مقسم رحمہ اللہ کے مابین شک واقع ہوا ہے۔ [مسند أبي يعلى الموصلي/أول مسند ابن عباس/حدیث: 2416]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے ارشاد فرمایا: ”یہ کلمات ہر بیماری کی دوا ہیں: «أَعُوذُ بِكَلِمَاتِ اللَّهِ التَّامَّةِ وَأَسْمَائِهِ كُلِّهَا عَامَّةً مِنْ شَرِّ السَّامَّةِ وَالْعَامَّةِ، وَشَرِّ الْعَيْنِ اللَّامَّةِ، وَمِنْ شَرِّ حَاسِدٍ إِذَا حَسَدَ، وَمِنْ شَرِّ أَبِي قَتَرَةَ وَمَا وَلَدَ» ”میں اللہ کے کامل کلمات اور اس کے تمام ناموں کے ذریعے ہر زہریلے جانور اور عام تکلیف دہ چیزوں کے شر سے، اور ہر نقصان دہ نظرِ بد کے شر سے، اور ﴿حاسد کے شر سے جب وہ حسد کرے﴾، اور ابلیس اور اس کی اولاد کے شر سے پناہ مانگتا ہوں۔“ (نیز فرمایا کہ) تینتیس فرشتے اپنے رب کے حضور حاضر ہوئے اور عرض کی کہ ہماری زمین میں بیماری اور تکلیف بہت بڑھ گئی ہے، تو اللہ تعالیٰ نے فرمایا: تم اپنی زمین (کی مٹی) لو اور اسے اپنی تکلیف کی جگہوں پر محمد صلی اللہ علیہ وسلم کے دم کے طور پر ملو؛ جس نے اس پر کوئی صلہ لیا یا اسے کسی سے چھپایا تو وہ کبھی فلاح نہیں پائے گا۔“ [مسند أبي يعلى الموصلي/أول مسند ابن عباس/حدیث: 2417]