سیدنا انس بن مالک رضی اللہ عنہ سے روایت ہے کہ ایک شخص نے دریافت کیا: اے اللہ کے نبی صلی اللہ علیہ وسلم ! قیامت کے دن کافر کو اس کے چہرے کے بل کیسے اٹھایا (اور چلایا) جائے گا؟ آپ صلی اللہ علیہ وسلم نے ارشاد فرمایا: ”کیا وہ ذات جس نے اسے دنیا میں اس کے پاؤں پر چلنے کے قابل بنایا، اس بات پر قادر نہیں ہے کہ قیامت کے دن اسے اس کے چہرے کے بل چلا دے؟“ قتادہ رحمہ اللہ نے (یہ سن کر) کہا: «بَلَى وَعِزَّةِ رَبِّنَا» ”کیوں نہیں، ہمارے رب کی عزت کی قسم (وہ یقیناً اس پر قادر ہے)“۔ [مسند أبي يعلى الموصلي/مسند أنس بن مالك/حدیث: 3046]

سیدنا انس بن مالک رضی اللہ عنہ سے روایت ہے، قتادہ رحمہ اللہ بیان کرتے ہیں کہ میں نے ان سے دریافت کیا کہ رسول اللہ صلی اللہ علیہ وسلم کی قرات کیسی تھی؟ تو انہوں نے جواب دیا: ”آپ صلی اللہ علیہ وسلم قرات کے دوران حروف کو خوب کھینچ کر (مد کے ساتھ) پڑھا کرتے تھے۔“ [مسند أبي يعلى الموصلي/مسند أنس بن مالك/حدیث: 3047]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم نے گردن کی دونوں جانب کی رگوں اور دونوں کندھوں کے درمیانی حصے پر پچھنے لگوائے (حجامہ کروایا)۔“ [مسند أبي يعلى الموصلي/مسند أنس بن مالك/حدیث: 3048]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: «لَا يُؤْمِنُ أَحَدٌ حَتَّى أَكُونَ أَحَبَّ إِلَيْهِ مِنْ وَالِدِهِ وَوَلَدِهِ وَالنَّاسِ أَجْمَعِينَ» ”کوئی شخص اس وقت تک (کامل) مومن نہیں ہو سکتا جب تک کہ میں اسے اس کے والد، اس کی اولاد اور تمام لوگوں سے زیادہ محبوب نہ ہو جاؤں۔“ [مسند أبي يعلى الموصلي/مسند أنس بن مالك/حدیث: 3049]

سیدنا انس رضی اللہ عنہ سے روایت ہے کہ ”نبی اکرم صلی اللہ علیہ وسلم نے سیدہ صفیہ بنت حی رضی اللہ عنہا سے نکاح فرمایا اور ان کی آزادی کو ہی ان کا مہر مقرر فرمایا۔“ [مسند أبي يعلى الموصلي/مسند أنس بن مالك/حدیث: 3050]

سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”مدینہ منورہ کی طرف دجال آئے گا تو وہ وہاں فرشتوں کو اس کی حفاظت و نگہبانی کرتے ہوئے پائے گا، چنانچہ «إِنْ شَاءَ اللَّهُ» ”اگر اللہ نے چاہا“ تو نہ تو دجال اس شہر میں داخل ہو پائے گا اور نہ ہی طاعون کی وبا وہاں آ سکے گی۔“ [مسند أبي يعلى الموصلي/مسند أنس بن مالك/حدیث: 3051]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم نے وصال (افطار کیے بغیر مسلسل روزے رکھنے) سے منع فرمایا، تو صحابہ کرام رضی اللہ عنہم نے عرض کی کہ ”اے اللہ کے رسول! آپ تو خود وصال فرماتے ہیں“، اس پر آپ صلی اللہ علیہ وسلم نے ارشاد فرمایا کہ ”تم لوگ میری ہیئت و حالت کے مانند نہیں ہو، میں تو (اپنے رب کے ہاں) اس حال میں رات بسر کرتا ہوں کہ مجھے کھلایا اور پلایا جاتا ہے“۔“ [مسند أبي يعلى الموصلي/مسند أنس بن مالك/حدیث: 3052]

سیدنا انس رضی اللہ عنہ سے روایت ہے کہ ایک شخص رسول اللہ صلی اللہ علیہ وسلم کی خدمت میں حاضر ہوا جس نے شراب پی رکھی تھی، تو آپ صلی اللہ علیہ وسلم نے اس کے بارے میں حکم صادر فرمایا اور اسے ”جوتوں کے ساتھ چالیس ضربیں لگائی گئیں“، پھر سیدنا ابوبکر رضی اللہ عنہ کے پاس ایک شخص لایا گیا جس نے شراب پی رکھی تھی تو انہوں نے بھی اس کے ساتھ اسی طرح کا عمل کیا، پھر سیدنا عمر رضی اللہ عنہ کے پاس ایک ایسا شخص لایا گیا جس نے شراب پی رکھی تھی تو انہوں نے اس معاملے میں (سزا کی مقدار سے متعلق) لوگوں سے مشاورت کی، جس پر سیدنا عبدالرحمن بن عوف رضی اللہ عنہ نے عرض کیا: ”میری رائے یہ ہے کہ آپ اسے حدود میں سب سے کم حد یعنی اسی کوڑے مقرر کر دیں“، چنانچہ سیدنا عمر رضی اللہ عنہ نے اسے اسی کوڑے مارنے کا حکم دیا۔ [مسند أبي يعلى الموصلي/مسند أنس بن مالك/حدیث: 3053]

سیدنا انس رضی اللہ عنہ سے روایت ہے کہ اللہ کے نبی صلی اللہ علیہ وسلم نے ارشاد فرمایا: ”یقیناً کچھ لوگوں کو ان گناہوں کی پاداش میں جو انہوں نے کیے ہوں گے، جہنم کی آگ کا جھلساؤ ضرور پہنچے گا، پھر اللہ تعالیٰ انہیں اپنے فضل و رحمت سے جنت میں داخل فرما دے گا اور انہیں ’جہنمی‘ (یعنی جہنم سے نکالے گئے لوگ) کہا جائے گا۔“ [مسند أبي يعلى الموصلي/مسند أنس بن مالك/حدیث: 3054]

سیدنا انس رضی اللہ عنہ سے روایت ہے کہ اللہ کے نبی صلی اللہ علیہ وسلم نے ارشاد فرمایا: ”اپنی صفیں برابر اور سیدھی رکھا کرو، کیونکہ صفوں کو برابر کرنا نماز کی تکمیل ہے یا (فرمایا کہ) نماز کی تکمیل کا ایک حصہ ہے۔“ [مسند أبي يعلى الموصلي/مسند أنس بن مالك/حدیث: 3055]