سیدنا انس رضی اللہ عنہ سے روایت ہے کہ مسجد میں تھوکنے کے متعلق رسول اللہ صلی اللہ علیہ وسلم نے ارشاد فرمایا: ”یہ عمل ایک گناہ ہے اور اس کا کفارہ اسے (مٹی میں) دبا دینا ہے۔“ [مسند أبي يعلى الموصلي/مسند أنس بن مالك/حدیث: 3155]

سیدنا انس رضی اللہ عنہ سے روایت ہے کہ اللہ کے نبی صلی اللہ علیہ وسلم نے ارشاد فرمایا: ” «أَتِمُّوا الرُّكُوعَ وَالسُّجُودَ، فَوَاللَّهِ إِنِّي لَأَرَاكُمْ مِنْ بَعْدِ ظَهْرِي إِذَا رَكَعْتُمْ وَإِذَا سَجَدْتُمْ» رکوع اور سجدہ مکمل کیا کرو، کیونکہ اللہ کی قسم! جب تم رکوع اور سجدہ کرتے ہو تو میں یقیناً تمہیں اپنی پشت کے پیچھے سے بھی دیکھ رہا ہوتا ہوں“، پھر قتادہ رحمہ اللہ نے اس کی وضاحت میں فرمایا کہ ”اللہ تعالیٰ آپ صلی اللہ علیہ وسلم کو ان کیفیات میں سے وہ کچھ دکھاتا ہے جو تم نہیں دیکھ سکتے“۔ [مسند أبي يعلى الموصلي/مسند أنس بن مالك/حدیث: 3156]

سیدنا انس بن مالک رضی اللہ عنہ نبی کریم صلی اللہ علیہ وسلم سے پچھلی حدیث کے مثل روایت کرتے ہیں، البتہ اس روایت میں قتادہ رحمہ اللہ کا یہ قول مذکور نہیں: ”اللہ تعالیٰ آپ صلی اللہ علیہ وسلم کو وہ کچھ دکھاتا ہے جو تم نہیں دیکھتے۔“ [مسند أبي يعلى الموصلي/مسند أنس بن مالك/حدیث: 3157]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”بسا اوقات میں نماز شروع کرتا ہوں اور میرا ارادہ اسے طویل کرنے کا ہوتا ہے، پھر میں کسی بچے کے رونے کی آواز سنتا ہوں تو اپنی نماز مختصر کر دیتا ہوں کیونکہ مجھے اس کے رونے کی وجہ سے اس کی ماں کی دلی تڑپ اور بے قراری کا بخوبی علم ہوتا ہے۔“ [مسند أبي يعلى الموصلي/مسند أنس بن مالك/حدیث: 3158]

سیدنا انس رضی اللہ عنہ سے روایت ہے کہ ”رِعل، ذکوان، عُصیہ اور بنو لِحیان کے قبائل رسول اللہ صلی اللہ علیہ وسلم کی خدمت میں حاضر ہوئے اور یہ ظاہر کیا کہ وہ اسلام لا چکے ہیں، چنانچہ انہوں نے اپنی قوم کے خلاف آپ سے امداد طلب کی، تو رسول اللہ صلی اللہ علیہ وسلم نے ستر انصاری صحابہ کے ذریعے ان کی مدد فرمائی“؛ سیدنا انس رضی اللہ عنہ بیان فرماتے ہیں کہ ”ہم اس دور میں ان صحابہ کو ’القراء‘ (قاریوں کی جماعت) کہا کرتے تھے، وہ دن کو محنت و مشقت یا جہاد میں مصروف رہتے اور رات کو نمازیں پڑھتے تھے، پھر وہ لوگ ان صحابہ کو اپنے ہمراہ لے گئے یہاں تک کہ جب وہ ’بئرِ معونہ‘ کے مقام پر پہنچے تو انہوں نے ان کے ساتھ غداری کی اور انہیں شہید کر دیا، جس پر رسول اللہ صلی اللہ علیہ وسلم نے ایک ماہ تک نمازِ فجر میں ان قبائل یعنی رِعل، ذکوان، عُصیہ اور بنو لِحیان کے خلاف بددعا فرمائی“۔ قتادہ رحمہ اللہ بیان کرتے ہیں کہ ہمیں سیدنا انس رضی اللہ عنہ نے یہ حدیث سنائی کہ ”صحابہ کرام ان شہداء کے بارے میں یہ قرآنی کلام تلاوت کیا کرتے تھے: ﴿بَلِّغُوا عَنَّا قَوْمَنَا أَنَّا لَقِينَا رَبَّنَا، فَرَضِيَ عَنَّا وَأَرْضَانَا﴾ ”ہماری جانب سے ہماری قوم کو یہ پیغام پہنچا دو کہ ہم اپنے رب سے جا ملے ہیں، پس وہ ہم سے راضی ہو گیا اور اس نے ہمیں بھی خوش کر دیا““۔ [مسند أبي يعلى الموصلي/مسند أنس بن مالك/حدیث: 3159]

سیدنا انس رضی اللہ عنہ سے روایت ہے کہ اللہ کے نبی صلی اللہ علیہ وسلم نے ارشاد فرمایا: ”ان لوگوں کو کیا ہو گیا ہے جو اپنی نماز کے دوران اپنی نگاہیں آسمان کی طرف اٹھاتے ہیں؟“ پھر آپ صلی اللہ علیہ وسلم نے اس بارے میں سخت کلام فرمایا یہاں تک کہ ارشاد فرمایا: ”وہ اس عمل سے ضرور باز آ جائیں ورنہ ان کی بینائی اچک لی جائے گی۔“ [مسند أبي يعلى الموصلي/مسند أنس بن مالك/حدیث: 3160]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”مسجد میں تھوکنا ایک گناہ ہے اور اس کا کفارہ اسے دفن کر دینا (یعنی مٹا کر صاف کر دینا) ہے۔“ [مسند أبي يعلى الموصلي/مسند أنس بن مالك/حدیث: 3161]

سیدنا انس رضی اللہ عنہ سے روایت ہے کہ اللہ کے نبی صلی اللہ علیہ وسلم اور سیدنا زید بن ثابت رضی اللہ عنہ نے سحری کی، پھر جب آپ صلی اللہ علیہ وسلم اپنی سحری سے فارغ ہوئے تو قتادہ رحمہ اللہ کہتے ہیں کہ میں نے سیدنا انس رضی اللہ عنہ سے دریافت کیا کہ آپ صلی اللہ علیہ وسلم کے سحری سے فارغ ہونے اور نمازِ فجر کے لیے کھڑے ہونے کے درمیان کتنا فاصلہ تھا؟ تو انہوں نے جواب دیا: ”اتنا وقت جتنی دیر میں ایک انسان پچاس آیات کی تلاوت کر لے۔“ [مسند أبي يعلى الموصلي/مسند أنس بن مالك/حدیث: 3162]

سیدنا انس رضی اللہ عنہ سے روایت ہے کہ اللہ کے نبی صلی اللہ علیہ وسلم نے فرمایا: ”پہلی صف کو مکمل کیا کرو، پھر اگر (نمازیوں کی تعداد میں) کوئی کمی ہو تو وہ سب سے آخری صف میں ہونی چاہیے۔“ [مسند أبي يعلى الموصلي/مسند أنس بن مالك/حدیث: 3163]

سیدنا انس رضی اللہ عنہ سے روایت ہے کہ سیدہ ام سلیم رضی اللہ عنہا نے اللہ کے نبی صلی اللہ علیہ وسلم سے اس عورت کے متعلق سوال کیا جو خواب میں وہی کچھ دیکھتی ہے جو ایک مرد دیکھتا ہے (یعنی احتلام)، تو اللہ کے نبی صلی اللہ علیہ وسلم نے ارشاد فرمایا: ”جب وہ اپنے خواب میں ایسا منظر دیکھے تو اسے غسل کر لینا چاہیے۔“ سیدہ ام سلیم رضی اللہ عنہا کہتی ہیں کہ مجھے اس بات پر حیا محسوس ہوئی تو میں نے عرض کی: کیا واقعی ایسا (عورتوں کے ساتھ بھی) ہوتا ہے؟ تو اللہ کے نبی صلی اللہ علیہ وسلم نے ارشاد فرمایا: ”ہاں، (اگر ایسا نہ ہو) تو پھر مشابہت کہاں سے آتی ہے؟ یقیناً مرد کا مادہ منویہ گاڑھا اور سفید ہوتا ہے جبکہ عورت کا مادہ زرد اور پتلا ہوتا ہے، پس ان دونوں میں سے جو بھی غالب آ جائے یا سبقت لے جائے، مشابہت اسی کے مطابق ہو جاتی ہے۔“ [مسند أبي يعلى الموصلي/مسند أنس بن مالك/حدیث: 3164]