سیدنا انس بن مالک رضی اللہ عنہ، سیدنا عبادہ بن الصامت رضی اللہ عنہ سے روایت کرتے ہیں کہ نبی کریم صلی اللہ علیہ وسلم نے ارشاد فرمایا: ”جو شخص اللہ تعالیٰ سے ملاقات کو پسند کرتا ہے، اللہ تعالیٰ بھی اس سے ملنے کو پسند فرماتا ہے، اور جو اللہ تعالیٰ سے ملاقات کو ناپسند کرتا ہے، اللہ تعالیٰ بھی اس سے ملنے کو ناپسند فرماتا ہے۔“ [مسند أبي يعلى الموصلي/مسند أنس بن مالك/حدیث: 3235]

سیدنا انس بن مالک رضی اللہ عنہ، سیدنا عبادہ بن صامت رضی اللہ عنہ سے روایت کرتے ہیں کہ نبی کریم صلی اللہ علیہ وسلم نے حجاج کی روایت کردہ سابقہ حدیث کے مانند ارشاد فرمایا۔ [مسند أبي يعلى الموصلي/مسند أنس بن مالك/حدیث: 3236]

سیدنا انس بن مالک رضی اللہ عنہ، سیدنا عبادہ بن صامت رضی اللہ عنہ سے روایت کرتے ہیں کہ نبی کریم صلی اللہ علیہ وسلم نے ارشاد فرمایا: ”بے شک مسلمان کا خواب نبوت کے چھیالیس حصوں میں سے ایک حصہ ہے۔“ [مسند أبي يعلى الموصلي/مسند أنس بن مالك/حدیث: 3237]

سیدہ ام سلیم رضی اللہ عنہا سے روایت ہے کہ انہوں نے عرض کی: ”یا رسول اللہ صلی اللہ علیہ وسلم ! انس (رضی اللہ عنہ) آپ کا خادم ہے، اس کے لیے اللہ تعالیٰ سے دعا فرما دیجیے“، تو آپ صلی اللہ علیہ وسلم نے ان کے حق میں یہ دعا فرمائی: «اللَّهُمَّ أَكْثِرْ مَالَهُ وَوَلَدَهُ، وَبَارِكْ لَهُ فِيمَا أَعْطَيْتَهُ» ”اے اللہ! اس کے مال اور اولاد میں کثرت عطا فرما اور جو کچھ تو نے اسے بخشا ہے اس میں اس کے لیے برکت پیدا فرما“۔ سیدنا انس رضی اللہ عنہ فرماتے ہیں کہ ”مجھے میری اولاد میں سے کسی نے بتایا کہ (نبی اکرم صلی اللہ علیہ وسلم کی دعا کی برکت سے) میری اپنی صلب سے پیدا ہونے والی اولاد اور میرے پوتوں میں سے ایک سو سے زائد نفوس اب تک دفن کیے جا چکے ہیں“۔ [مسند أبي يعلى الموصلي/مسند أنس بن مالك/حدیث: 3238]

سیدنا انس بن مالک رضی اللہ عنہ سے بھی اسی کے مانند (سابقہ حدیث کی طرح) مروی ہے۔ [مسند أبي يعلى الموصلي/مسند أنس بن مالك/حدیث: 3239]

سیدنا انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم کے صحابہ کرام رضی اللہ عنہم (نماز کے انتظار میں بیٹھے بیٹھے) سو جایا کرتے تھے، پھر وہ (اٹھ کر) نماز ادا کر لیتے اور (از سر نو) وضو نہیں کرتے تھے۔“ [مسند أبي يعلى الموصلي/مسند أنس بن مالك/حدیث: 3240]

قتادہ رحمہ اللہ سے روایت ہے، وہ فرماتے ہیں کہ میں نے سیدنا انس رضی اللہ عنہ سے مٹی کے سبز گھڑے میں تیار کردہ نبیذ کے بارے میں دریافت کیا تو انہوں نے فرمایا کہ ”میں نے نبی کریم صلی اللہ علیہ وسلم سے اس سلسلے میں (خاص طور پر) کوئی بات نہیں سنی“ اور سیدنا انس رضی اللہ عنہ اسے (اپنی احتیاط کی بنا پر) ناپسند فرمایا کرتے تھے۔ [مسند أبي يعلى الموصلي/مسند أنس بن مالك/حدیث: 3241]

سیدنا انس رضی اللہ عنہ سے روایت ہے کہ ایک مرتبہ مدینہ منورہ میں دشمن کے حملے کا خوف پیدا ہوا تو نبی کریم صلی اللہ علیہ وسلم نے سیدنا ابو طلحہ رضی اللہ عنہ کا ایک گھوڑا عاریتاً طلب فرمایا جس کا نام "مندوب" تھا، چنانچہ آپ صلی اللہ علیہ وسلم اس پر سوار ہوئے اور جب واپس تشریف لائے تو رسول اللہ صلی اللہ علیہ وسلم نے ارشاد فرمایا: ”ہم نے (وہاں) خوف والی کوئی بات نہیں دیکھی اور بے شک ہم نے اس (گھوڑے) کو سمندر کی طرح (تیز رفتار اور رواں) پایا۔“ [مسند أبي يعلى الموصلي/مسند أنس بن مالك/حدیث: 3242]

سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم ”کدو کو پسند فرمایا کرتے تھے“، وہ بیان کرتے ہیں کہ ”میں نے ایک دن آپ صلی اللہ علیہ وسلم کو اسے تناول فرماتے ہوئے دیکھا، تو میں اسے آپ صلی اللہ علیہ وسلم کے سامنے لا کر رکھنے لگا“۔ [مسند أبي يعلى الموصلي/مسند أنس بن مالك/حدیث: 3243]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم کی خدمتِ اقدس میں گوشت پیش کیا گیا تو آپ صلی اللہ علیہ وسلم نے دریافت فرمایا: «مَا هَذَا؟» ”یہ کیا ہے؟“ صحابہ کرام رضی اللہ عنہم نے عرض کیا کہ یہ وہ گوشت ہے جو سیدہ بَرِیرہ رضی اللہ عنہا کو بطورِ صدقہ دیا گیا تھا، اس پر رسول اللہ صلی اللہ علیہ وسلم نے ارشاد فرمایا: «هُوَ عَلَيْهَا صَدَقَةٌ وَلَنَا هَدِيَّةٌ» ”یہ ان کے حق میں تو صدقہ ہے لیکن ہمارے لیے (ان کی جانب سے) ہدیہ ہے“۔ [مسند أبي يعلى الموصلي/مسند أنس بن مالك/حدیث: 3244]