سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو عورت بھی اپنے ولی کی اجازت کے بغیر نکاح کرے تو اس کا نکاح باطل ہے، پھر اگر اس شخص نے اس کے ساتھ ہم بستری کر لی ہو تو اس کی شرمگاہ سے نفع اٹھانے کے عوض عورت مہر کی حقدار ہے، اور اگر ان کے درمیان (ولایت کے معاملے میں) کوئی اختلاف پیدا ہو جائے تو جس کا کوئی ولی نہ ہو، اس کا ولی وقت کا حکمران ہے۔“ [مسند أبي يعلى الموصلي/مسند عائشة/حدیث: 4837]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”میری امت میں سے جو شخص بھی (اپنی ضرورت کے لیے) کوئی قرض اپنے ذمہ لے، پھر اسے ادا کرنے کی بھرپور تگ و دو کرے لیکن اس کی ادائیگی سے قبل ہی اس کا انتقال ہو جائے، تو میں اس کا ولی اور سرپرست ہوں۔“ [مسند أبي يعلى الموصلي/مسند عائشة/حدیث: 4838]

سیدہ عائشہ رضی اللہ عنہا سے روایت ہے کہ ایک شخص نے اس آیت ﴿مَنْ يَعْمَلْ سُوءًا يُجْزَ بِهِ﴾ ”جو بھی برائی کرے گا اسے اس کا بدلہ دیا جائے گا“ کی تلاوت کی اور (تشویش کا اظہار کرتے ہوئے) کہا: ”کیا ہمیں اپنے ہر (برے) عمل کا بدلہ دیا جائے گا؟ تب تو ہم ہلاک ہو گئے۔“ جب یہ بات رسول اللہ صلی اللہ علیہ وسلم تک پہنچی تو آپ صلی اللہ علیہ وسلم نے ارشاد فرمایا: ”ہاں، مومن کو اس کا بدلہ دنیا ہی میں دے دیا جاتا ہے: اس کے جسم کو پہنچنے والی کسی مصیبت کی صورت میں یا کسی بھی ایسی چیز کے ذریعے جو اسے اذیت پہنچاتی ہے۔“ [مسند أبي يعلى الموصلي/مسند عائشة/حدیث: 4839]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے ارشاد فرمایا: ”قبلہ (یعنی سامنے والی دیوار یا سترہ) کے قریب ہو جایا کرو۔“ [مسند أبي يعلى الموصلي/مسند عائشة/حدیث: 4840]

ام المؤمنین سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم کے عہدِ مبارک میں سورج گرہن ہوا، تو آپ صلی اللہ علیہ وسلم مسجد میں لوگوں کو نماز پڑھانے کے لیے کھڑے ہوئے اور لوگ رسول اللہ صلی اللہ علیہ وسلم کے پیچھے کثیر تعداد میں جمع ہو گئے۔ پس رسول اللہ صلی اللہ علیہ وسلم دن کے ایک طویل حصے تک قیام کی حالت میں رہے یہاں تک کہ شدید گرمی کی وجہ سے کچھ لوگ بے ہوش ہو کر گرنے لگے، حتیٰ کہ میں نے ایسے مردوں کو دیکھا جو (گرمی کی شدت کے باعث) اپنے چہروں پر پانی چھڑک رہے تھے۔ پھر آپ صلی اللہ علیہ وسلم نے اپنے قیام ہی کی طرح طویل رکوع کیا یہاں تک کہ میں نے دیکھا کہ اب بھی کچھ لوگ بے ہوش ہو کر گر رہے تھے، پھر آپ صلی اللہ علیہ وسلم نے اپنا سرِ مبارک اٹھایا اور سجدہ کیا، پھر دوبارہ قیام کیا جو پہلے قیام کی نسبت مختصر تھا، پھر رکوع کیا جو پہلے رکوع کی نسبت مختصر تھا، پھر سرِ مبارک اٹھایا اور سجدہ کیا، پھر دوبارہ قیام کیا جو اس (دوسرے قیام) سے بھی مختصر تھا، پھر رکوع کیا، پھر سرِ مبارک اٹھایا اور سجدہ کیا۔“ [مسند أبي يعلى الموصلي/مسند عائشة/حدیث: 4841]

مسلم بن مخراق رحمہ اللہ بیان کرتے ہیں کہ میں نے ام المؤمنین سیدہ عائشہ رضی اللہ عنہا سے عرض کیا کہ کچھ لوگ ایک ہی رات میں دو یا تین مرتبہ قرآنِ کریم ختم کر لیتے ہیں، تو انہوں نے فرمایا: ”ان لوگوں نے قرآن پڑھا بھی اور (حقیقت میں) نہیں بھی پڑھا، رسول اللہ صلی اللہ علیہ وسلم پوری رات قیام فرماتے تو اس میں سورہ البقرہ، سورہ آل عمران اور سورہ النساء کی تلاوت فرماتے تھے، اور آپ صلی اللہ علیہ وسلم کا معمول مبارک تھا کہ جب بھی کسی ایسی آیت سے گزرتے جس میں اللہ کی رحمت اور خوشخبری کا تذکرہ ہوتا تو اللہ کے حضور دعا فرماتے تھے۔“ [مسند أبي يعلى الموصلي/مسند عائشة/حدیث: 4842]

سیدہ عائشہ رضی اللہ عنہا سے روایت ہے کہ انہوں نے فرمایا: ”رسول اللہ صلی اللہ علیہ وسلم کی وفات ذاتُ الجنب کے مرض سے ہوئی تھی۔“ [مسند أبي يعلى الموصلي/مسند عائشة/حدیث: 4843]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم ”سورج طلوع ہونے کے وقت نماز ادا کرنے سے منع فرماتے تھے یہاں تک کہ وہ (افق سے) بلند ہو جائے، اور آپ صلی اللہ علیہ وسلم ارشاد فرماتے تھے: «إِنَّهَا تَطْلُعُ بِقَرْنِ شَيْطَانٍ» ”بیشک وہ شیطان کے سینگ کے ساتھ طلوع ہوتا ہے“، نیز آپ صلی اللہ علیہ وسلم سورج غروب ہونے کے قریب نماز پڑھنے سے بھی منع فرماتے تھے یہاں تک کہ وہ مکمل طور پر غروب ہو جائے۔“ [مسند أبي يعلى الموصلي/مسند عائشة/حدیث: 4844]

عبد اللہ بن شقیق رحمہ اللہ بیان کرتے ہیں کہ میں نے سیدہ عائشہ رضی اللہ عنہا سے رسول اللہ صلی اللہ علیہ وسلم کی (نفل) نماز کے متعلق دریافت کیا تو انہوں نے فرمایا کہ ”آپ صلی اللہ علیہ وسلم ظہر سے پہلے چار رکعتیں ادا فرماتے، پھر (مسجد) تشریف لے جاتے اور لوگوں کو ظہر کی نماز پڑھاتے، پھر واپس (گھر) تشریف لاتے اور دو رکعتیں ادا فرماتے، پھر مغرب کی نماز کے لیے تشریف لے جاتے اور نماز پڑھا کر واپس آتے تو دو رکعتیں ادا فرماتے، پھر عشاء کی نماز کے لیے تشریف لے جاتے اور واپس لوٹ کر دو رکعتیں ادا فرماتے تھے۔“ [مسند أبي يعلى الموصلي/مسند عائشة/حدیث: 4845]

مسروق رحمہ اللہ سے روایت ہے کہ سیدہ عائشہ رضی اللہ عنہا نے بیان فرمایا: ”رسول اللہ صلی اللہ علیہ وسلم بسا اوقات «اِغْتَسَلَ مِنَ الْجَنَابَةِ ثُمَّ أَتَانِيْ فَضَمَمْتُهُ إِلَيَّ فَأُدْفِئُهُ وَلَمْ أَغْتَسِلْ بَعْدَهُ» ”غسلِ جنابت فرماتے، پھر میرے پاس تشریف لاتے تو میں آپ صلی اللہ علیہ وسلم کو اپنے ساتھ لگا لیتی تاکہ آپ صلی اللہ علیہ وسلم کو حرارت پہنچاؤں، حالانکہ میں نے اس وقت تک (اپنا) غسل نہیں کیا ہوتا تھا۔“ [مسند أبي يعلى الموصلي/مسند عائشة/حدیث: 4846]