سیدہ عائشہ رضی اللہ عنہا سے مروی ہے کہ ایک شخص نے رسول اللہ صلی اللہ علیہ وسلم سے دریافت کیا جبکہ میں دروازے کے پیچھے کھڑی (ان کی گفتگو) سن رہی تھی، اس نے عرض کی کہ ”نماز کا وقت ہو جاتا ہے اور میں حالتِ جنابت میں ہوتا ہوں جبکہ میرا روزہ رکھنے کا ارادہ ہوتا ہے“، تو رسول اللہ صلی اللہ علیہ وسلم نے ارشاد فرمایا: ”میرے ساتھ بھی ایسا ہی ہوتا ہے کہ نماز کا وقت ہو جاتا ہے اور میں حالتِ جنابت میں ہوتا ہوں اور میرا روزہ رکھنے کا ارادہ ہوتا ہے، پھر میں غسل کر کے روزہ رکھ لیتا ہوں“، اس شخص نے عرض کی: ”میں آپ کی مثل نہیں ہوں؛ اللہ تعالیٰ نے تو آپ کے اگلے اور پچھلے تمام گناہ معاف فرما دیے ہیں“، تو رسول اللہ صلی اللہ علیہ وسلم نے ارشاد فرمایا: ”بے شک میں یہ امید رکھتا ہوں کہ میں تم سب سے زیادہ اللہ سے ڈرنے والا اور اللہ کی مقرر کردہ حدود کا تم سب سے زیادہ علم رکھنے والا ہوں“۔ [مسند أبي يعلى الموصلي/مسند عائشة/حدیث: 4427]

سیدہ عائشہ رضی اللہ عنہا سے روایت ہے کہ انہوں نے بیان فرمایا: ”بے شک رسول اللہ صلی اللہ علیہ وسلم اپنی بعض ازواجِ مطہرات کا بوسہ لے لیا کرتے تھے جبکہ آپ صلی اللہ علیہ وسلم روزے کی حالت میں ہوتے تھے“، اور یہ تذکرہ فرما کر سیدہ عائشہ رضی اللہ عنہا مسکرا دیں۔ [مسند أبي يعلى الموصلي/مسند عائشة/حدیث: 4428]

سیدہ عائشہ رضی اللہ عنہا سے روایت ہے کہ انہوں نے فرمایا: ”میں اور رسول اللہ صلی اللہ علیہ وسلم ایک ہی برتن سے غسل کر لیا کرتے تھے اور ہم دونوں اس (برتن) سے ایک ساتھ پانی لیتے تھے۔“ [مسند أبي يعلى الموصلي/مسند عائشة/حدیث: 4429]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم جب غسلِ جنابت کا ارادہ فرماتے تو پہلے اپنے دونوں ہاتھوں پر پانی بہا کر انہیں دھوتے، پھر اسی طرح وضو فرماتے جیسا کہ نماز کے لیے کیا جاتا ہے، پھر اپنے دونوں ہاتھ برتن میں ڈالتے، پھر انہیں نکال کر اپنے سر کے بالوں میں داخل فرماتے اور بالوں کی جڑوں کا خلال کرتے یہاں تک کہ جب آپ صلی اللہ علیہ وسلم سر کی جلد کو تر کر لیتے اور آپ صلی اللہ علیہ وسلم کو یہ اطمینان ہو جاتا کہ اسے اچھی طرح صاف کر لیا ہے تو اپنے سر مبارک پر تین لپ پانی ڈالتے، پھر باقی تمام جسم پر پانی بہا دیتے“، نیز عروہ رحمہ اللہ نے اس سے قبل یہ قول نقل کیا کہ: ”جب غسل کرنے والا اپنی دونوں ہتھیلیاں دھو لے تو اسے چاہیے کہ اپنی شرمگاہ دھوئے، پھر نماز جیسا وضو کرے۔“ [مسند أبي يعلى الموصلي/مسند عائشة/حدیث: 4430]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے ارشاد فرمایا: ”جب نماز کا وقت ہو جائے اور رات کا کھانا (سامنے) رکھ دیا جائے تو پہلے کھانے سے آغاز کرو۔“ [مسند أبي يعلى الموصلي/مسند عائشة/حدیث: 4431]

ابوبردہ رحمہ اللہ بیان کرتے ہیں کہ ہم سیدہ عائشہ رضی اللہ عنہا کی خدمت میں حاضر ہوئے تو انہوں نے ہمیں یمن کا بنا ہوا ایک موٹا تہبند اور ایک ایسی چادر نکال کر دکھائی جسے تم لوگ ”ملبدہ“ (پیوند لگی ہوئی یا گفتی ہوئی موٹی چادر) کہتے ہو، پھر سیدہ رضی اللہ عنہا نے فرمایا: ”رسول اللہ صلی اللہ علیہ وسلم کی روحِ مبارک انہی دو کپڑوں میں قبض کی گئی تھی۔“ [مسند أبي يعلى الموصلي/مسند عائشة/حدیث: 4432]

سیدہ عائشہ رضی اللہ عنہا سے روایت ہے کہ سیدہ سودہ رضی اللہ عنہا ایک جسیم اور قد آور خاتون تھیں، جب وہ باہر نکلتیں تو دیگر خواتین میں نمایاں نظر آتیں، تو سیدنا عمر بن خطاب رضی اللہ عنہ نے انہیں دیکھ کر فرمایا: ”غور کرو کہ تم کس طرح نکلتی ہو، اللہ کی قسم! جب تم باہر نکلتی ہو تو ہم سے چھپی نہیں رہتیں (بلکہ پہچان لی جاتی ہو)۔“ سیدہ سودہ رضی اللہ عنہا نے اس بات کا ذکر رسول اللہ صلی اللہ علیہ وسلم سے کیا جبکہ آپ صلی اللہ علیہ وسلم کے دستِ مبارک میں ہڈی والا گوشت تھا، عروہ رحمہ اللہ بیان کرتے ہیں کہ وحی کی کیفیت کے باعث آپ صلی اللہ علیہ وسلم کے ہاتھ میں موجود گوشت والی ہڈی حرکت کرنے لگی، پھر آپ صلی اللہ علیہ وسلم نے ارشاد فرمایا: ”یقیناً اللہ تعالیٰ نے تم (خواتین) کے لیے اپنی ضروریات کے تحت باہر نکلنے کی رخصت و اجازت مقرر فرما دی ہے۔“ [مسند أبي يعلى الموصلي/مسند عائشة/حدیث: 4433]

سیدہ عائشہ رضی اللہ عنہا سے روایت ہے کہ ایک شخص نے نبی کریم صلی اللہ علیہ وسلم کی بارگاہ میں عرض کی: ”میری والدہ کا اچانک انتقال ہو گیا ہے اور میرا خیال ہے کہ اگر وہ گفتگو کر پاتیں تو ضرور صدقہ کرتیں، تو کیا میں ان کی جانب سے صدقہ کروں؟“ تو رسول اللہ صلی اللہ علیہ وسلم نے ارشاد فرمایا: «نَعَمْ» ”ہاں (تم ان کی طرف سے صدقہ کرو)“۔ [مسند أبي يعلى الموصلي/مسند عائشة/حدیث: 4434]

سیدہ عائشہ رضی اللہ عنہا سے روایت ہے کہ سیدہ بریرہ رضی اللہ عنہا میرے پاس آئیں اور کہنے لگیں: ”میں نے اپنے مالکان سے نو اوقیہ چاندی کے بدلے اپنی آزادی کا معاہدہ کیا ہے کہ ہر سال ایک اوقیہ ادا کروں گی، لہٰذا آپ اس میں میری مدد فرمائیں“، سیدہ عائشہ رضی اللہ عنہا نے ان سے فرمایا: ”اگر تمہارے مالکان اس بات پر راضی ہوں کہ میں انہیں یہ پوری رقم یکمشت ادا کر دوں اور تمہاری ولاء میرے لیے ہو جائے تو میں ایسا کر سکتی ہوں“، چنانچہ سیدہ بریرہ رضی اللہ عنہا اپنے مالکان کے پاس گئیں اور انہیں یہ بات بتائی مگر انہوں نے اس بات سے انکار کر دیا کہ ولاء ان کے علاوہ کسی اور کی ہو، رسول اللہ صلی اللہ علیہ وسلم نے جب یہ معاملہ سنا تو آپ صلی اللہ علیہ وسلم نے دریافت فرمایا جس پر سیدہ عائشہ رضی اللہ عنہا نے آپ صلی اللہ علیہ وسلم کو صورتِ حال بتائی، تب رسول اللہ صلی اللہ علیہ وسلم نے فرمایا: ”تم اسے خرید لو اور ان کے لیے ولاء کی شرط رکھ دو، کیونکہ ولاء تو اسی کا حق ہے جو آزاد کرے“، سیدہ عائشہ رضی اللہ عنہا بیان کرتی ہیں کہ پھر رسول اللہ صلی اللہ علیہ وسلم لوگوں میں خطبہ دینے کے لیے کھڑے ہوئے، اللہ کی حمد و ثنا بیان کی اور فرمایا: ”حمد و ثنا کے بعد! ان لوگوں کا کیا حال ہے جو ایسی شرطیں لگاتے ہیں جو اللہ کی کتاب میں موجود نہیں ہیں؟ جو شرط بھی اللہ کی کتاب میں نہ ہو وہ باطل ہے، اگرچہ وہ سو شرطیں ہی کیوں نہ ہوں“، مزید فرمایا: ”اللہ کا فیصلہ ہی سب سے زیادہ حق دار ہے اور اللہ کی شرط ہی سب سے زیادہ مضبوط ہے، اور ولاء تو صرف اسی کا حق ہے جو آزاد کرے“۔ [مسند أبي يعلى الموصلي/مسند عائشة/حدیث: 4435]

سیدہ عائشہ رضی اللہ عنہا سے روایت ہے کہ سیدہ بریرہ رضی اللہ عنہا انصار کے کچھ لوگوں کی مکاتبہ لونڈی تھیں، وہ بیان کرتی ہیں کہ ”میں نے انہیں خرید کر آزاد کرنے کا ارادہ کیا اور انہیں حکم دیا کہ وہ اپنے مالکان کے پاس جا کر انہیں اس کی خبر دیں، ان کے مالکان نے کہا: اگر آپ ولاء (وراثت کا حق) ہمارے لیے رہنے کی شرط منظور کریں گی تو ہم انہیں آپ کے ہاتھ فروخت کر دیں گے، میں نے اس معاملے میں رسول اللہ صلی اللہ علیہ وسلم سے فتویٰ طلب کیا تو آپ صلی اللہ علیہ وسلم نے ارشاد فرمایا: ”تم انہیں خرید کر آزاد کر دو، کیونکہ ولاء کا حق تو اسی کا ہوتا ہے جو قیمت ادا کر کے آزاد کرے“، سیدہ عائشہ رضی اللہ عنہا فرماتی ہیں کہ وہ ایک غلام کے نکاح میں تھیں، چنانچہ جب وہ آزاد ہو گئیں تو رسول اللہ صلی اللہ علیہ وسلم نے انہیں اختیار دیتے ہوئے فرمایا: ”تمہیں اختیار ہے: اگر چاہو تو اس غلام کے نکاح میں برقرار رہو اور اگر چاہو تو اس سے علیحدگی اختیار کر لو“، انہوں نے عرض کیا: میں نے اس سے علیحدگی اختیار کر لی ہے، سیدہ عائشہ رضی اللہ عنہا بیان کرتی ہیں کہ پھر ایک مرتبہ رسول اللہ صلی اللہ علیہ وسلم میرے پاس تشریف لائے جبکہ ہنڈیا میں گوشت جوش مار رہا تھا، آپ صلی اللہ علیہ وسلم نے دریافت فرمایا: ”اے عائشہ! یہ کیا ہے؟“ میں نے عرض کیا: یہ ہمیں سیدہ بریرہ رضی اللہ عنہا نے ہدیہ دیا ہے، جبکہ انہیں یہ گوشت صدقے میں ملا تھا، تو آپ صلی اللہ علیہ وسلم نے ارشاد فرمایا: ”یہ بریرہ کے لیے صدقہ ہے اور ہمارے لیے ہدیہ ہے“۔“ [مسند أبي يعلى الموصلي/مسند عائشة/حدیث: 4436]