سیدنا عبداللہ بن عمر رضی اللہ عنہما سے روایت ہے کہ ایک شخص نبی اکرم صلی اللہ علیہ وسلم کی خدمتِ اقدس میں حاضر ہوا اور عرض گزار ہوا: ”میں نے رمضان کا ایک روزہ (بغیر کسی شرعی عذر کے) توڑ دیا ہے“، آپ صلی اللہ علیہ وسلم نے دریافت فرمایا: ”کیا کسی عذر اور سفر کے بغیر؟“ اس نے عرض کیا: ”جی ہاں“، آپ صلی اللہ علیہ وسلم نے فرمایا: ”تم نے بہت برا کیا“، اس نے عرض کیا: ”جی ہاں، اب آپ مجھے کیا حکم دیتے ہیں؟“ آپ صلی اللہ علیہ وسلم نے ارشاد فرمایا: ”ایک غلام آزاد کرو“، اس نے عرض کیا: ”اس ذات کی قسم جس نے آپ کو حق کے ساتھ مبعوث فرمایا! میں کبھی کسی غلام کا مالک نہیں رہا“، آپ صلی اللہ علیہ وسلم نے فرمایا: ”تو پھر لگاتار دو ماہ کے روزے رکھو“، اس نے عرض کیا: ”میں اس کی استطاعت نہیں رکھتا“، آپ صلی اللہ علیہ وسلم نے فرمایا: ”پھر ساٹھ مسکینوں کو کھانا کھلاؤ“، اس نے عرض کیا: ”اس ذات کی قسم جس نے آپ کو حق کے ساتھ مبعوث فرمایا! میں تو اپنے اہل و عیال کا پیٹ بھرنے کی بھی سکت نہیں رکھتا“، اسی دوران نبی اکرم صلی اللہ علیہ وسلم کی خدمت میں کھجوروں کا ایک ٹوکرا پیش کیا گیا تو آپ صلی اللہ علیہ وسلم نے فرمایا: ”اسے لے جاؤ اور ساٹھ مسکینوں پر صدقہ کر دو“، اس نے عرض کیا: ”میں اسے کسے دوں؟“ آپ صلی اللہ علیہ وسلم نے فرمایا: ”تمہارے علم میں جو سب سے زیادہ محتاج ہو اسے دے دو“، اس نے عرض کیا: ”اس ذات کی قسم جس نے آپ کو حق کے ساتھ مبعوث فرمایا! مدینہ کے ان دونوں پتھریلے میدانوں کے درمیان کوئی گھرانہ ہم سے زیادہ حاجت مند نہیں ہے“، تو آپ صلی اللہ علیہ وسلم نے ارشاد فرمایا: ”پھر اسے اپنے ہی اہل و عیال پر صدقہ کر دو“۔ [مسند أبي يعلى الموصلي/مسند عبد الله بن عمر/حدیث: 5725]

سیدنا ابن عمر رضی اللہ عنہما سے روایت ہے کہ میں نے رسول اللہ صلی اللہ علیہ وسلم سے ایک ایسی حدیث سنی جسے اگر میں نے ایک یا دو بار (یہاں تک کہ انہوں نے سات بار تک گنتی کی) سنا ہوتا تو میں اسے بیان نہ کرتا، لیکن میں نے اسے رسول اللہ صلی اللہ علیہ وسلم سے اس سے بھی کہیں زیادہ مرتبہ سنا ہے، آپ صلی اللہ علیہ وسلم نے ارشاد فرمایا: ”بنی اسرائیل میں کفل نامی ایک شخص تھا جو کسی بھی گناہ کے ارتکاب سے باز نہیں آتا تھا، ایک مرتبہ اس کے پاس ایک عورت آئی تو اس نے اسے ساٹھ دینار اس شرط پر دیے کہ وہ اس کے ساتھ بدکاری کرے، پھر جب وہ اس کے پاس اس طرح بیٹھ گیا جیسے ایک مرد اپنی زوجہ کے ساتھ بیٹھتا ہے تو وہ عورت کانپنے لگی اور زار و قطار رونے لگی، کفل نے پوچھا: تمہیں کس بات نے رلا دیا ہے؟ کیا میں نے تمہارے ساتھ کوئی زبردستی کی ہے؟ اس نے کہا: نہیں، بلکہ اصل بات یہ ہے کہ یہ ایک ایسا عمل ہے جو میں نے زندگی میں کبھی نہیں کیا اور مجھے صرف شدید ضرورت و فقر نے اس پر مجبور کیا ہے، کفل نے کہا: تو یہ کام محض اس لیے کر رہی ہے حالانکہ تو نے اسے پہلے کبھی نہیں کیا؟ پھر وہ اس کے پاس سے ہٹ گیا اور کہنے لگا: تم جا سکتی ہو اور یہ دینار بھی تمہارے ہی ہیں، پھر اس نے عہد کیا: اللہ کی قسم! کفل آج کے بعد کبھی اللہ کی نافرمانی نہیں کرے گا، راوی فرماتے ہیں کہ اسی رات اس کا انتقال ہو گیا اور صبح اس کے دروازے پر یہ لکھا ہوا پایا گیا کہ یقیناً اللہ تعالیٰ نے کفل کی مغفرت فرما دی ہے“۔ [مسند أبي يعلى الموصلي/مسند عبد الله بن عمر/حدیث: 5726]

سیدنا عبداللہ بن عمر رضی اللہ عنہما سے روایت ہے کہ میں نے نبی اکرم صلی اللہ علیہ وسلم کو یہ فرماتے ہوئے سنا: ”جو شخص قاضی کے منصب پر فائز ہوا اور اس نے دانستہ ظلم و ناانصافی کے ساتھ فیصلہ کیا تو وہ جہنمی ہے، اور جو قاضی بنا اور اس نے علم نہ ہونے کے باوجود نادانی و جہالت کے ساتھ فیصلہ کیا تو وہ بھی جہنمی ہے، اور جس نے قاضی بن کر عدل و انصاف کے ساتھ فیصلہ کیا تو وہ اس لائق ہے کہ اس عہدے کی ذمہ داریوں سے برابر سرابر (یعنی بغیر کسی گناہ یا وبال کے) نجات پا جائے۔“ [مسند أبي يعلى الموصلي/مسند عبد الله بن عمر/حدیث: 5727]

سیدنا ابن عمر رضی اللہ عنہما سے روایت ہے کہ ایک مرتبہ میں رسول اللہ صلی اللہ علیہ وسلم کے ہمراہ نماز ادا کر رہا تھا کہ اسی دوران مجمع میں سے ایک شخص نے یہ کلمات کہے: «اللهُ أَكْبَرُ كَبِيرًا، وَالْحَمْدُ لِلَّهِ كَثِيرًا، وَسُبْحَانَ اللهِ بُكْرَةً وَأَصِيلًا» ”اللہ سب سے بڑا ہے، بہت زیادہ بڑائی والا، اور تمام تر تعریفیں اللہ ہی کے لیے ہیں جو بہت زیادہ ہیں، اور اللہ تعالیٰ صبح و شام ہر عیب سے پاک ہے“، پس جب رسول اللہ صلی اللہ علیہ وسلم نماز مکمل فرما چکے تو دریافت فرمایا: ”تم میں سے ان کلمات کو کہنے والا کون ہے؟“ تو لوگ خاموش رہے، پھر ایک شخص نے عرض کی: اے اللہ کے رسول صلی اللہ علیہ وسلم ! میں نے یہ کلمات کہے تھے اور میرا مقصد محض خیر و بھلائی ہی تھا، تو رسول اللہ صلی اللہ علیہ وسلم نے ارشاد فرمایا: ”ان کلمات کے لیے آسمان کے دروازے کھول دیے گئے“، سیدنا ابن عمر رضی اللہ عنہما فرماتے ہیں کہ ”جب سے میں نے رسول اللہ صلی اللہ علیہ وسلم کو یہ فرماتے ہوئے سنا ہے، اس کے بعد سے میں نے کبھی ان کلمات کو ترک نہیں کیا“۔ [مسند أبي يعلى الموصلي/مسند عبد الله بن عمر/حدیث: 5728]

سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”اہلِ جنت میں منزلت کے اعتبار سے سب سے ادنیٰ درجے والا وہ شخص ہوگا جو اپنی سلطنت میں دو ہزار سال کی مسافت تک نظر کرے گا اور وہ اس کے بعید ترین گوشوں کو بھی (اسی طرح) دیکھے گا (جیسے قریب کو دیکھتا ہے)، وہ اپنی ازواج اور اپنے تخت و سرور کا مشاہدہ کر رہا ہوگا، اور اہل جنت میں سب سے بلند مرتبے والا وہ شخص ہوگا جو ہر روز دو مرتبہ اللہ سبحانہ و تعالیٰ کے چہرۂ انور کے دیدارِ مبارک سے مشرف ہوگا۔“ [مسند أبي يعلى الموصلي/مسند عبد الله بن عمر/حدیث: 5729]

سیدنا عبد اللہ بن عمر رضی اللہ عنہما سے روایت ہے کہ عبد العزیز بن مروان نے ان کی طرف خط لکھا کہ آپ اپنی ضرورت و حاجت مجھے لکھ بھیجیں، جس پر سیدنا ابن عمر رضی اللہ عنہما نے انہیں جواباً لکھا کہ رسول اللہ صلی اللہ علیہ وسلم نے ارشاد فرمایا ہے: «الْيَدُ الْعُلْيَا، خَيْرٌ مِنَ الْيَدِ السُّفْلَى، وَابْدَأْ بِمَنْ تَعُولُ» ”اوپر والا ہاتھ (دینے والا) نیچے والے ہاتھ (لینے والے) سے بہتر ہے، اور (خرچ و خیرات کی) ابتدا ان سے کرو جو تمہاری زیر کفالت ہیں“ اور میں تم سے کسی چیز کا سوال نہیں کرتا، لیکن جو رزق اللہ تعالیٰ تمہارے واسطے سے مجھے عطا فرمائے گا میں اسے واپس بھی نہیں کروں گا۔ [مسند أبي يعلى الموصلي/مسند عبد الله بن عمر/حدیث: 5730]

سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ایک شخص سے ارشاد فرمایا: «أَنْتَ وَمَالُكَ لِأَبِيكَ» ”تم اور تمہارا مال تمہارے والد ہی کا ہے“۔ [مسند أبي يعلى الموصلي/مسند عبد الله بن عمر/حدیث: 5731]

سیدنا عبد الرحمن بن سمرہ رضی اللہ عنہ سے روایت ہے کہ سیدنا ابن عمر رضی اللہ عنہما نے کچھ لوگوں کو دیکھا تو فرمایا کہ رسول اللہ صلی اللہ علیہ وسلم نے ارشاد فرمایا: ”کیا تم میں سے کوئی اس بات سے عاجز ہے کہ جب اس کے پاس کوئی ایسا شخص آئے جو اسے قتل کرنے کا ارادہ رکھتا ہو تو وہ آدم علیہ السلام کے دو بیٹوں کی مانند ہو جائے؛ (جس کا انجام یہ ہے کہ) قاتل آگ میں ہو گا اور مقتول جنت میں ہو گا۔“ [مسند أبي يعلى الموصلي/مسند عبد الله بن عمر/حدیث: 5732]

سیدنا عبداللہ بن عمر رضی اللہ عنہما سے روایت ہے کہ ”نبی کریم صلی اللہ علیہ وسلم کی خدمتِ اقدس میں کچی کھجوروں کے رس (فضِیخ) کا ایک مٹکا لایا گیا جبکہ آپ صلی اللہ علیہ وسلم مسجدِ فضِیخ میں تشریف فرما تھے، آپ صلی اللہ علیہ وسلم نے اسے نوش فرمایا اور اسی بنا پر اس جگہ کا نام 'مسجدِ فضِیخ' پڑ گیا۔“ [مسند أبي يعلى الموصلي/مسند عبد الله بن عمر/حدیث: 5733]

سیدنا عبد اللہ بن عمر رضی اللہ عنہما سے روایت ہے کہ ”رسول اللہ صلی اللہ علیہ وسلم عرفات میں وادیِ نمرہ میں قیام فرمایا کرتے تھے۔“ [مسند أبي يعلى الموصلي/مسند عبد الله بن عمر/حدیث: 5734]