داؤد بن ابی عاصم ثقفی رحمہ اللہ بیان کرتے ہیں کہ میں نے سیدنا عبداللہ بن عمر رضی اللہ عنہما سے منیٰ میں نماز (کی تعداد) کے بارے میں سوال کیا، تو انہوں نے (جواباً مجھ سے) دریافت فرمایا: ”کیا تم نے محمد صلی اللہ علیہ وسلم کے بارے میں سنا ہے؟“ میں نے عرض کیا: جی ہاں، اور میں آپ صلی اللہ علیہ وسلم پر ایمان لایا ہوں، اس پر انہوں نے فرمایا: ”تو یقیناً آپ صلی اللہ علیہ وسلم منیٰ میں دو رکعتیں ہی ادا فرمایا کرتے تھے۔“ [مسند أبي يعلى الموصلي/مسند عبد الله بن عمر/حدیث: 5735]

سیدنا ابن عمر رضی اللہ عنہما سے روایت ہے کہ ”رسول اللہ صلی اللہ علیہ وسلم نے (کھجوریں وغیرہ کھاتے ہوئے) دو دانوں کو ایک ساتھ ملا کر کھانے سے منع فرمایا ہے، یہاں تک کہ تم (ایسا کرنے سے قبل) اپنے ساتھیوں سے اجازت لے لو۔“ [مسند أبي يعلى الموصلي/مسند عبد الله بن عمر/حدیث: 5736]

سیدنا عبداللہ بن عمر رضی اللہ عنہما سے روایت ہے کہ ”انہوں نے نبی کریم صلی اللہ علیہ وسلم کا بوسہ لیا۔“ [مسند أبي يعلى الموصلي/مسند عبد الله بن عمر/حدیث: 5737]

سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”داڑھیوں کو بڑھاؤ اور مونچھوں کو اچھی طرح کترواؤ۔“ [مسند أبي يعلى الموصلي/مسند عبد الله بن عمر/حدیث: 5738]

سیدنا عبد اللہ بن عمر رضی اللہ عنہما سے روایت ہے کہ ایک شخص نے ان سے مچھر کے خون کے متعلق دریافت کیا تو آپ رضی اللہ عنہما نے اس سے پوچھا: ”تمہارا تعلق کہاں سے ہے؟“ اس نے عرض کیا کہ میں اہل عراق میں سے ہوں، تو آپ رضی اللہ عنہما نے (تعجب کے ساتھ لوگوں سے) فرمایا: ”ذرا اس شخص کی طرف دیکھو! یہ مجھ سے مچھر کے خون کے بارے میں سوال کر رہا ہے حالانکہ ان لوگوں نے رسول اللہ صلی اللہ علیہ وسلم کے فرزندِ ارجمند کو شہید کر دیا، جبکہ میں نے خود رسول اللہ صلی اللہ علیہ وسلم کو یہ فرماتے ہوئے سنا ہے: ”وہ دونوں (حسن و حسین) دنیا میں میرے دو خوشبودار پھول ہیں“۔“ [مسند أبي يعلى الموصلي/مسند عبد الله بن عمر/حدیث: 5739]

سیدنا ابن عمر رضی اللہ عنہما سے روایت ہے کہ عبدالقیس کے آزاد کردہ غلام مسلم رحمہ اللہ نے بیان کیا کہ ایک شخص نے سیدنا ابن عمر رضی اللہ عنہما سے دریافت کیا: ”وتر کے بارے میں آپ کی کیا رائے ہے، کیا وہ سنت ہے؟“ انہوں نے فرمایا: ”سنت سے تمہاری کیا مراد ہے؟ رسول اللہ صلی اللہ علیہ وسلم اور مسلمانوں نے وتر ادا کیے ہیں۔“ اس شخص نے دوبارہ پوچھا: ”کیا یہ سنت ہے؟“ تو سیدنا ابن عمر رضی اللہ عنہما نے اسے فرمایا: ”کیا تم عقل نہیں رکھتے؟ رسول اللہ صلی اللہ علیہ وسلم اور مسلمانوں نے وتر پڑھے ہیں۔“ [مسند أبي يعلى الموصلي/مسند عبد الله بن عمر/حدیث: 5740]

واسع بن حبان رحمہ اللہ سے روایت ہے کہ وہ مسجد میں کھڑے نماز پڑھ رہے تھے اور سیدنا عبداللہ بن عمر رضی اللہ عنہ ان کے سامنے مسجد کی قبلہ والی دیوار سے پیٹھ لگا کر بیٹھے تھے، جب واسع رحمہ اللہ نماز سے فارغ ہوئے تو وہ اپنی بائیں جانب سے مڑ کر سیدنا ابن عمر رضی اللہ عنہ کی طرف بڑھے اور ان کے پاس بیٹھ گئے، تو سیدنا ابن عمر رضی اللہ عنہ نے ان سے دریافت کیا: ”تمہیں اپنی دائیں جانب سے مڑنے سے کس چیز نے روکا؟“ انہوں نے عرض کی: ”اور تو کوئی بات نہ تھی سوائے اس کے کہ میں نے آپ کو دیکھا تو (آپ کی مجلس کی خاطر) آپ ہی کی طرف مڑ آیا“، اس پر سیدنا ابن عمر رضی اللہ عنہ نے فرمایا: ”تم نے درست کیا، دراصل کچھ لوگ یہ کہتے ہیں کہ: جب تم نماز پڑھ کر فارغ ہو تو صرف دائیں جانب سے ہی مڑا کرو“، پھر سیدنا ابن عمر رضی اللہ عنہ نے (مسئلہ واضح کرتے ہوئے) فرمایا: ”جب تم نماز پڑھ کر مڑو تو تمہیں اختیار ہے، چاہو تو اپنی دائیں جانب سے مڑو اور چاہو تو بائیں جانب سے“، نیز سیدنا ابن عمر رضی اللہ عنہ نے فرمایا: ”کچھ دوسرے لوگ یہ کہتے ہیں کہ: جب کوئی قضائے حاجت کے لیے بیٹھے تو نہ قبلہ کی طرف رخ کرے اور نہ ہی بیت المقدس کی طرف، حالانکہ ایک دن میں اپنے گھر کی چھت پر چڑھا تو میں نے رسول اللہ صلی اللہ علیہ وسلم کو قضائے حاجت فرماتے ہوئے دیکھا“، امام ابویعلیٰ کو شک ہے کہ (سیدنا ابن عمر رضی اللہ عنہ نے یہ الفاظ کہے کہ) ”آپ صلی اللہ علیہ وسلم بیت المقدس کی طرف رخ کیے ہوئے تھے“۔ [مسند أبي يعلى الموصلي/مسند عبد الله بن عمر/حدیث: 5741]

سیدنا ابن عمر اور سیدنا ابن عباس رضی اللہ عنہما سے روایت ہے کہ ان دونوں نے رسول اللہ صلی اللہ علیہ وسلم کی بابت گواہی دی کہ آپ صلی اللہ علیہ وسلم نے منبر پر جلوہ افروز ہو کر ارشاد فرمایا: «لَيَنْتَهِيَنَّ قَوْمٌ عَنْ وَدْعِهِمُ الْجُمُعَاتِ، أَوْ لَيَخْتِمَنَّ اللَّهُ عَلَى قُلُوبِهِمْ وَلَيَكُونَنَّ مِنَ الْغَافِلِينَ» ”لوگوں کو جمعہ کی نمازیں چھوڑنے سے ہر صورت باز آ جانا چاہیے، بصورتِ دیگر اللہ تعالیٰ یقیناً ان کے دلوں پر مہر ثبت فرما دے گا اور وہ لازمی طور پر غافلوں میں شامل ہو جائیں گے۔“ [مسند أبي يعلى الموصلي/مسند عبد الله بن عمر/حدیث: 5742]

سیدنا عبداللہ بن عمر رضی اللہ عنہما سے روایت ہے کہ ”نبی کریم صلی اللہ علیہ وسلم نے ظہر کی نماز کی پہلی رکعت میں سجدہ کیا، تو آپ صلی اللہ علیہ وسلم کے صحابہ رضی اللہ عنہم نے یہ خیال کیا کہ آپ صلی اللہ علیہ وسلم نے سورت ﴿تَنْزِيلَ السَّجْدَةَ﴾ کی تلاوت فرمائی ہے“؛ راوی (سلیمان التیمی رحمہ اللہ) بیان کرتے ہیں کہ میں نے یہ روایت ابو مجلز رحمہ اللہ سے خود نہیں سنی۔ [مسند أبي يعلى الموصلي/مسند عبد الله بن عمر/حدیث: 5743]

سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”اپنے غلاموں کو مت مارا کرو، کیونکہ تم نہیں جانتے کہ (ان کے معاملے میں) تمہارا کس (انجام یا الٰہی پکڑ) سے سابقہ پیش آنے والا ہے۔“ [مسند أبي يعلى الموصلي/مسند عبد الله بن عمر/حدیث: 5744]