سیدنا ابوہریرہ رضی اللہ عنہ سے روایت ہے (اور ابوزرعہ رحمہ اللہ بیان کرتے ہیں کہ میں ان کے ہمراہ مروان کے گھر میں داخل ہوا تو وہاں تصویریں/مورتیاں دیکھیں) تو انہوں نے فرمایا کہ میں نے رسول اللہ صلی اللہ علیہ وسلم کو یہ فرماتے ہوئے سنا کہ ”اللہ عزوجل نے ارشاد فرمایا: ”اور اس شخص سے بڑھ کر ظالم کون ہوگا جو میری مخلوق جیسی تخلیق کرنے کی کوشش کرے؟ پس (اگر وہ اتنے ہی قادر ہیں تو) ذرا ایک چیونٹی (یا ذرہ) تو پیدا کریں، یا ایک غلے کا دانہ ہی بنا دکھائیں، یا ایک جَو کا دانہ ہی تخلیق کر کے دکھائیں“۔“ [مسند أبي يعلى الموصلي/مسند أبي هريرة رضي الله عنه/حدیث: 6101]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم میرے نام پر نام رکھو، لیکن میری کنیت اختیار نہ کرو۔“ [مسند أبي يعلى الموصلي/مسند أبي هريرة رضي الله عنه/حدیث: 6102]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے دعا فرمائی: «اللَّهُمَّ اجْعَلْ رِزْقَ آلِ مُحَمَّدٍ فِي الدُّنْيَا قُوتًا» ”اے اللہ! آلِ محمد ( صلی اللہ علیہ وسلم ) کے لیے دنیا میں اتنا رزق مقدر فرما جو ان کی ضرورت کے لیے کافی (کفاف) ہو۔“ فنی طور پر اس روایت کی سند میں امام اعمش رحمہ اللہ نے ابو زرعہ رحمہ اللہ سے سماع کی صراحت کے بجائے صیغہ تمریض (نُبِّئْتُ - مجھے بتایا گیا) کے ساتھ اسے نقل کیا ہے، جو محدثین کے نزدیک سند میں انقطاع یا واسطے کے مجہول ہونے کے احتمال کو ظاہر کرتا ہے۔ [مسند أبي يعلى الموصلي/مسند أبي هريرة رضي الله عنه/حدیث: 6103]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اے بلال! تم نے اسلام لانے کے بعد اپنے نزدیک نفع کے لحاظ سے سب سے زیادہ امید افزا کون سا عمل کیا ہے؟“ سیدنا بلال رضی اللہ عنہ نے عرض کی کہ میں نے اسلام لانے کے بعد اپنے نزدیک اس سے بڑھ کر نفع کی امید والا کوئی عمل نہیں کیا کہ میں نے رات یا دن کے کسی بھی حصے میں جب بھی مکمل طہارت (وضو یا غسل) حاصل کی تو اس طہارت کے ساتھ اپنے رب کے حضور اتنی نماز ضرور ادا کی جتنی میرے لیے مقدر کر دی گئی تھی، اس پر آپ صلی اللہ علیہ وسلم نے فرمایا: ”بلاشبہ میں نے آج کی رات جنت میں اپنے سامنے تمہارے جوتوں کی چاپ سنی ہے۔“ [مسند أبي يعلى الموصلي/مسند أبي هريرة رضي الله عنه/حدیث: 6104]

سیدنا ابوہریرہ رضی اللہ عنہ سے روایت ہے کہ جبرائیل علیہ السلام نبی کریم صلی اللہ علیہ وسلم کے پاس بیٹھے ہوئے تھے کہ انہوں نے آسمان کی طرف نگاہ اٹھائی تو اچانک ایک فرشتہ اترتا ہوا نظر آیا، اس پر جبرائیل علیہ السلام نے آپ صلی اللہ علیہ وسلم سے عرض کی: ”یہ وہ فرشتہ ہے جو اپنی پیدائش کے بعد سے آج اس گھڑی سے پہلے کبھی زمین پر نہیں اترا“، پھر جب وہ فرشتہ نازل ہوا تو اس نے عرض کی: ”اے محمد ( صلی اللہ علیہ وسلم )! آپ کے رب نے مجھے آپ کی طرف یہ پیغام دے کر بھیجا ہے کہ کیا میں آپ کو بادشاہ نبی بنا دوں یا بندہ رسول؟“، تب جبرائیل علیہ السلام نے آپ صلی اللہ علیہ وسلم کو مشورہ دیتے ہوئے عرض کی: ”اے محمد ( صلی اللہ علیہ وسلم )! اپنے رب کے لیے عاجزی اختیار فرمائیں“، تو آپ صلی اللہ علیہ وسلم نے ارشاد فرمایا: ”نہیں، بلکہ میں بندہ رسول (بننا پسند کرتا ہوں)“۔ [مسند أبي يعلى الموصلي/مسند أبي هريرة رضي الله عنه/حدیث: 6105]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو شخص اس بات کو پسند کرے کہ وہ قرآنِ کریم کو اسی تروتازگی کے ساتھ پڑھے جیسا کہ وہ نازل کیا گیا ہے، تو اسے چاہیے کہ وہ ابنِ امِ عبد (سیدنا عبداللہ بن مسعود رضی اللہ عنہ) کی قرات کے مطابق تلاوت کرے۔“ [مسند أبي يعلى الموصلي/مسند أبي هريرة رضي الله عنه/حدیث: 6106]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”کھجور کے بدلے کھجور، گندم کے بدلے گندم اور نمک کے بدلے نمک کی خرید و فروخت برابر برابر ہونی چاہیے، پس جس نے (اپنی طرف سے) زیادہ دیا یا (دوسرے سے) زیادہ کا مطالبہ کیا تو وہ سود ہے، سوائے ان اشیاء کے جن کی اجناس (رنگ و اقسام) ایک دوسرے سے مختلف ہوں۔“ [مسند أبي يعلى الموصلي/مسند أبي هريرة رضي الله عنه/حدیث: 6107]

سیدنا ابوہریرہ رضی اللہ عنہ سے روایت ہے کہ میں تین باتوں کی وجہ سے بنو تمیم سے ہمیشہ محبت رکھتا ہوں، میں نے رسول اللہ صلی اللہ علیہ وسلم کو ان کے بارے میں یہ فرماتے ہوئے سنا کہ «هُمْ أَشَدُّ أُمَّتِي عَلَى الدَّجَّالِ» ”وہ دجال کے خلاف میری امت کے سب سے سخت لوگ ثابت ہوں گے“، نیز سیدہ عائشہ رضی اللہ عنہا کے ذمے سیدنا اسماعیل علیہ السلام کی اولاد میں سے ایک جان آزاد کرنا واجب تھی، پس جب قبیلہ خولان کے قیدی آئے تو سیدہ عائشہ رضی اللہ عنہا نے عرض کی: ”یا رسول اللہ! کیا میں ان میں سے کوئی خرید کر آزاد کر دوں؟“ تو آپ صلی اللہ علیہ وسلم نے فرمایا: «لَا» ”نہیں“، پھر جب بنو عنبر کے قیدی لائے گئے تو آپ صلی اللہ علیہ وسلم نے ارشاد فرمایا: «ابْتَاعِي، فَإِنَّهُمْ وَلَدُ إِسْمَاعِيلَ» ”ان میں سے خرید لو کیونکہ یہ اولادِ اسماعیل سے ہیں“، اور جب بنو تمیم کے زکوٰۃ و صدقات آئے تو آپ صلی اللہ علیہ وسلم نے فرمایا: «هَذِهِ صَدَقَاتُ قَوْمِنَا» ”یہ ہماری ہی قوم کے صدقات ہیں“۔ [مسند أبي يعلى الموصلي/مسند أبي هريرة رضي الله عنه/حدیث: 6108]

سیدنا ابوہریرہ رضی اللہ عنہ سے روایت ہے کہ ”رسول اللہ صلی اللہ علیہ وسلم جب نماز میں تکبیرِ تحریمہ کہتے تو تکبیر اور قراءت کے درمیانی وقفے میں خاموش رہا کرتے تھے۔“ [مسند أبي يعلى الموصلي/مسند أبي هريرة رضي الله عنه/حدیث: 6109]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اللہ تعالیٰ کے بندوں میں سے کچھ ایسے بندے بھی ہیں جن پر انبیاء اور شہداء بھی رشک کریں گے۔“ عرض کیا گیا کہ وہ کون لوگ ہیں؟ تاکہ ہم بھی ان سے محبت کریں، تو آپ صلی اللہ علیہ وسلم نے فرمایا: ”یہ وہ لوگ ہیں جنہوں نے آپس میں کسی قرابتداری اور نسبی تعلق کے بغیر محض اللہ کے نور کی خاطر ایک دوسرے سے محبت کی، ان کے چہرے سراپا نور ہوں گے اور وہ نور کے منبروں پر متمکن ہوں گے، جب لوگ خوفزدہ ہوں گے تو انہیں کوئی خوف نہ ہوگا اور جب لوگ غم زدہ ہوں گے تو انہیں کوئی غم نہ ہو گا۔“ پھر آپ صلی اللہ علیہ وسلم نے یہ آیتِ مبارکہ تلاوت فرمائی: ﴿أَلَا إِنَّ أَوْلِيَاءَ اللَّهِ لَا خَوْفٌ عَلَيْهِمْ وَلَا هُمْ يَحْزَنُونَ﴾ ”خبردار! یقیناً اللہ کے دوستوں پر نہ کوئی خوف ہوگا اور نہ ہی وہ رنجیدہ ہوں گے“۔ [مسند أبي يعلى الموصلي/مسند أبي هريرة رضي الله عنه/حدیث: 6110]