مجاہد رحمہ اللہ سے روایت ہے کہ سیدہ ام سلمہ رضی اللہ عنہا نے عرض کیا: ”اے اللہ کے رسول صلی اللہ علیہ وسلم ! مرد تو جہاد و قتال میں حصہ لیتے ہیں مگر ہم جہاد نہیں کرتیں، اور ہمیں وراثت میں بھی صرف نصف حصہ ملتا ہے“، اس پر اللہ عزوجل نے یہ آیت نازل فرمائی: ﴿وَلَا تَتَمَنَّوْا مَا فَضَّلَ اللَّهُ بِهِ بَعْضُكُمْ عَلَى بَعْضٍ﴾ ”اور اس چیز کی تمنا نہ کرو جس کے ذریعے اللہ نے تم میں سے بعض کو بعض پر فضیلت دی ہے“، نیز راوی کہتے ہیں کہ انہی کے بارے میں یہ آیت بھی نازل ہوئی: ﴿إِنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ﴾ ”بے شک مسلمان مرد اور مسلمان عورتیں، اور مومن مرد اور مومن عورتیں“ آخرِ آیت تک۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6959]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم سیدہ ام سلمہ رضی اللہ عنہا کے گھر میں تشریف فرما تھے اور وہاں ایک مخنث (زنانہ وضع قطع والا شخص) بھی موجود تھا، اس نے سیدہ ام سلمہ رضی اللہ عنہا کے بھائی سیدنا عبداللہ بن ابی امیہ رضی اللہ عنہ سے کہا: ”اے عبداللہ! اگر کل اللہ تعالیٰ آپ کو طائف پر فتح عطا فرما دے تو میں آپ کو غیلان کی بیٹی (کا پتا) دوں گا جو قبیلہ ثقیف کی عورت ہے، وہ (موٹاپے اور جسمانی بناوٹ کی وجہ سے) سامنے سے چار (سلوٹوں) کے ساتھ آتی ہے اور جب پیٹھ پھیر کر جاتی ہے تو آٹھ کے ساتھ مڑتی ہے“، یہ سن کر رسول اللہ صلی اللہ علیہ وسلم نے (گھر کی خواتین سے) ارشاد فرمایا: ”یہ (شخص) اب تمہارے پاس داخل نہ ہوا کرے۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6960]

سیدہ زینب بنت ابی سلمہ رضی اللہ عنہا اپنی والدہ سیدہ ام سلمہ رضی اللہ عنہا اور سیدہ ام حبیبہ رضی اللہ عنہما (ازواجِ مطہرات) سے روایت کرتی ہیں کہ ان دونوں نے بیان فرمایا: ”ایک عورت رسول اللہ صلی اللہ علیہ وسلم کی خدمتِ اقدس میں حاضر ہوئی اور عرض کی: اے اللہ کے رسول! میری بیٹی کے شوہر کا انتقال ہو گیا ہے اور مجھے اس کی آنکھوں کی تکلیف کا اندیشہ ہے، تو کیا میں اسے سرمہ لگا سکتی ہوں؟ رسول اللہ صلی اللہ علیہ وسلم نے ارشاد فرمایا: (زمانہ جاہلیت میں) تم میں سے کوئی عورت سال کے اختتام پر مینگنی پھینکتی تھی (یعنی سال بھر تک سخت ترین سوگ مناتی تھی)، جبکہ (اب اسلام میں) یہ مدت محض چار ماہ اور دس دن ہے“۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6961]

سیدہ ام سلمہ رضی اللہ عنہا سے روایت ہے کہ ”رسول اللہ صلی اللہ علیہ وسلم بسا اوقات اپنی ازواجِ مطہرات سے قربت کے باعث، نہ کہ احتلام کی وجہ سے، جنابت کی حالت میں صبح کرتے تھے اور پھر آپ صلی اللہ علیہ وسلم (غسل فرما کر) اپنا روزہ پورا کرتے تھے۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6962]

سیدہ ام سلمہ رضی اللہ عنہا سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم سات اور پانچ رکعات وتر ادا فرماتے تھے اور ان کے درمیان نہ سلام پھیر کر اور نہ ہی گفتگو کر کے کوئی فاصلہ کرتے تھے“۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6963]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”جب تم کسی مریض یا میت کے پاس حاضر ہو تو خیر کی بات کرو، کیونکہ جو کچھ تم کہتے ہو فرشتے اس پر آمین کہتے ہیں۔“ سیدہ ام سلمہ رضی اللہ عنہا بیان کرتی ہیں کہ جب سیدنا ابو سلمہ رضی اللہ عنہ کی وفات ہوئی تو میں نبی کریم صلی اللہ علیہ وسلم کی خدمت میں حاضر ہوئی اور عرض کیا کہ میں (اب) کیا کہوں؟ آپ صلی اللہ علیہ وسلم نے فرمایا: ”تم یہ کہو: «اللَّهُمَّ اغْفِرْ لَنَا وَلَهُ، وَأَعْقِبْنَا مِنْهُ عُقْبَى صَالِحَةً» ”اے اللہ! ہماری اور اس کی مغفرت فرما، اور ہمیں اس کے بعد اس کا بہتر نعم البدل عطا فرما۔“ چنانچہ میں نے یہ دعا مانگی تو اللہ عزوجل نے مجھے ان کے بدلے میں سیدنا محمد صلی اللہ علیہ وسلم (جیسا شوہر) عطا فرما دیا۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6964]

سیدہ ام سلمہ رضی اللہ عنہا سے روایت ہے کہ میں نے نبی کریم صلی اللہ علیہ وسلم سے عرض کی: ”بے شک ہشام بن مغیرہ صلہ رحمی کرتا، مہمان نوازی کرتا، قیدیوں کو رہا کراتا اور کھانا کھلایا کرتا تھا، اور اگر وہ (آپ صلی اللہ علیہ وسلم کا زمانہ) پا لیتا تو ضرور اسلام قبول کر لیتا، تو کیا یہ (اعمال) اسے نفع دیں گے؟“ آپ صلی اللہ علیہ وسلم نے ارشاد فرمایا: ”نہیں، وہ تو یہ سب دنیا، اس کی شہرت اور اپنی تعریف و ستائش کی خاطر کرتا تھا، اور اس نے کبھی زندگی میں ایک دن بھی یہ نہیں کہا: «رَبِّ اغْفِرْ لِي يَوْمَ الدِّينِ» ”اے میرے رب! جزا و سزا کے دن میری مغفرت فرما دینا۔““ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6965]

حسان بن مخارق رحمہ اللہ سے روایت ہے کہ سیدہ ام سلمہ رضی اللہ عنہا نے بیان فرمایا: ”میری ایک صاحبزادی بیمار ہوگئی تو میں نے اس کے لیے ایک کوزے میں نبیذ تیار کی، پھر نبی کریم صلی اللہ علیہ وسلم تشریف لائے جبکہ وہ (نبیذ) جوش مار رہی تھی، آپ صلی اللہ علیہ وسلم نے دریافت فرمایا: ”یہ کیا ہے؟“ میں نے عرض کیا کہ میری بیٹی بیمار ہے، اس لیے ہم نے اس کے لیے یہ (نبیذ) تیار کی ہے، تو آپ صلی اللہ علیہ وسلم نے ارشاد فرمایا: ”یقیناً اللہ عزوجل نے تمہاری شفا حرام کردہ چیزوں میں نہیں رکھی۔““ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6966]

سیدہ ام المؤمنین ام سلمہ رضی اللہ عنہا سے روایت ہے کہ انہوں نے بیان کیا کہ ”میں نے رسول اللہ صلی اللہ علیہ وسلم سے ان لوگوں کے متعلق دریافت کیا جن کی صورتیں مسخ کر دی گئی تھیں کہ کیا ان کی کوئی نسل ہوتی ہے؟ تو آپ صلی اللہ علیہ وسلم نے ارشاد فرمایا: ”کبھی بھی ایسا نہیں ہوا کہ کسی کی صورت مسخ کی گئی ہو اور پھر اس کی کوئی نسل یا اولاد باقی رہی ہو۔““ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6967]

ام موسیٰ رحمہ اللہ سے روایت ہے کہ سیدہ ام سلمہ رضی اللہ عنہا نے فرمایا: ”اس ذات کی قسم جس کی سیدہ ام سلمہ قسم کھاتی ہے! رسول اللہ صلی اللہ علیہ وسلم سے (وفات کے وقت) سب سے آخری ملاقات کرنے والے اور آپ صلی اللہ علیہ وسلم کے سب سے قریب ترین شخص سیدنا علی رضی اللہ عنہ تھے۔“ پھر انہوں نے تفصیل بیان کرتے ہوئے کہا کہ ”جس صبح رسول اللہ صلی اللہ علیہ وسلم کی روح قبض کی گئی، آپ صلی اللہ علیہ وسلم نے سیدنا علی رضی اللہ عنہ کی طرف پیغام بھیجا، جبکہ میرا خیال ہے کہ آپ صلی اللہ علیہ وسلم نے انہیں پہلے کسی ضرورت سے کہیں بھیجا ہوا تھا، چنانچہ آپ صلی اللہ علیہ وسلم اس صبح بار بار دریافت فرمانے لگے: «جَاءَ عَلِيٌّ؟» ”کیا علی آ گئے؟“، آپ صلی اللہ علیہ وسلم نے یہ سوال تین مرتبہ دہرایا۔ سیدہ ام سلمہ رضی اللہ عنہا فرماتی ہیں کہ پھر وہ سورج طلوع ہونے سے پہلے ہی تشریف لے آئے، جب وہ آئے تو ہمیں محسوس ہو گیا کہ آپ صلی اللہ علیہ وسلم کو ان سے کوئی نجی بات کرنی ہے، چنانچہ ہم سب اس کمرے سے باہر نکل گئیں جہاں ہم سیدہ عائشہ رضی اللہ عنہا کے گھر میں رسول اللہ صلی اللہ علیہ وسلم کی بیمار پرسی کر رہی تھیں۔ سیدہ فرماتی ہیں کہ میں کمرے سے نکلنے والی آخری خاتون تھی اور میں دروازے کے بالکل قریب ہو کر بیٹھ گئی، اس دوران سیدنا علی رضی اللہ عنہ رسول اللہ صلی اللہ علیہ وسلم پر جھک گئے اور وہ آپ صلی اللہ علیہ وسلم سے عہدِ ملاقات کرنے والے آخری انسان تھے، اور رسول اللہ صلی اللہ علیہ وسلم ان سے سرگوشی اور راز و نیاز کی باتیں کرنے لگے۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6968]