سیدنا جابر رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”ندامت توبہ ہے۔“ [المعجم الأوسط/باب الألف/حدیث: 101]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بلاشبہ گناہوں میں سے کچھ ایسے گناہ ہیں جنہیں نہ نماز مٹاتی ہے، نہ روزہ، نہ حج اور نہ ہی عمرہ۔“ صحابہ کرام رضی اللہ عنہم نے عرض کیا: اے اللہ کے رسول! پھر انہیں کون سی چیز مٹاتی ہے؟ آپ صلی اللہ علیہ وسلم نے فرمایا: ”معیشت کی تلاش میں لاحق ہونے والے غم و تفکرات۔“
اس روایت کو امام مالک رحمہ اللہ سے سوائے یحییٰ بن بکیر رحمہ اللہ کے کسی نے بیان نہیں کیا، اور ان سے روایت کرنے میں محمد بن سلام رحمہ اللہ اکیلے ہیں۔ احمد بن یحییٰ رحمہ اللہ کہتے ہیں کہ میں نے محمد بن سلام سے پوچھا: آپ نے یہ حدیث ابن بکیر سے کیسے سنی جبکہ آپ کے علاوہ اسے کسی اور نے نہیں سنا؟ انہوں نے جواب دیا: میں یحییٰ بن بکیر رحمہ اللہ کے پاس بیٹھا ہوا تھا کہ ایک شخص ان کے پاس آیا اور اپنی تنگدستی کا ذکر کیا، تو ابن بکیر رحمہ اللہ نے کہا: ہمیں امام مالک رحمہ اللہ نے بیان کیا، اور پھر یہ حدیث ذکر کی۔ [المعجم الأوسط/باب الألف/حدیث: 102]

سیدہ فاطمہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”جس نے عقیق کی انگوٹھی پہنی وہ ہمیشہ خیر و بھلائی دیکھتا رہے گا۔“
اس حدیث کو امام مالک رحمہ اللہ سے صرف ابوبکر بن شعیب رحمہ اللہ نے روایت کیا ہے، اور زہیر بن عباد رحمہ اللہ اس کی روایت میں منفرد ہیں۔ [المعجم الأوسط/باب الألف/حدیث: 103]

سیدنا عبداللہ بن عکیم رضی اللہ عنہ سے روایت ہے کہ انہوں نے فرمایا: ”رسول اللہ صلی اللہ علیہ وسلم نے ہمیں تحریر لکھی جبکہ ہم جہینہ کی سرزمین میں تھے کہ: ”میں نے تمہیں مردار کی کھالوں کے بارے میں رخصت دی تھی، سو اب تم مردار کی کھال اور پٹھے سے کوئی فائدہ حاصل نہ کرو۔““
اسے ابوسعید بصری رحمہ اللہ سے یحییٰ بن ایوب رحمہ اللہ کے علاوہ کسی نے روایت نہیں کیا، اور فضالہ بن مفضل رحمہ اللہ اپنے والد رحمہ اللہ سے روایت کرنے میں اس کے ساتھ منفرد ہیں۔ [المعجم الأوسط/باب الألف/حدیث: 104]

سیدنا ابوبکر صدیق رضی اللہ عنہ، ام المومنین سیدہ عائشہ رضی اللہ عنہا سے روایت کرتے ہیں کہ رسول اللہ صلی اللہ علیہ وسلم نے فرمایا: ”کلونجی میں ہر بیماری سے شفا ہے، سوائے موت کے۔“
یہ حدیث سیدنا ابوبکر صدیق رضی اللہ عنہ سے، وہ ام المومنین سیدہ عائشہ رضی اللہ عنہا سے صرف اسی سند کے ساتھ مروی ہے، جس کے بیان کرنے میں عبید اللہ بن موسی رحمہ اللہ منفرد ہیں۔
دار الحرمین کے نسخے میں اسی طرح «خالد بن سعید» درج ہے، اور شاید درست نام «خالد بن سعد» ہے۔ [المعجم الأوسط/باب الألف/حدیث: 105]

سیدنا انس رضی اللہ عنہ سے روایت ہے کہ انہوں نے فرمایا: ”میں نے نبی صلی اللہ علیہ وسلم ، سیدنا ابوبکر رضی اللہ عنہ اور سیدنا عمر رضی اللہ عنہ کو جنازے کے آگے چلتے ہوئے دیکھا۔“
اس حدیث کو بکر بن مضر رحمہ اللہ سے صرف محمد بن سفیان رحمہ اللہ نے ہی روایت کیا ہے۔ [المعجم الأوسط/باب الألف/حدیث: 106]

سیدنا ابوقتادہ رضی اللہ عنہ سے روایت ہے کہ ایک شخص نبی کریم صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم سے قیامت کے متعلق دریافت کیا۔ رسول اللہ صلی اللہ علیہ وسلم نے فرمایا: ”تم نے اس کے لیے کیا تیاری کر رکھی ہے؟“ اس نے عرض کیا: ”اللہ اور اس کے رسول کی محبت۔“ آپ صلی اللہ علیہ وسلم نے فرمایا: ”پس تم اسی کے ساتھ ہو گے جس سے تم نے محبت کی۔“
یہ حدیث سیدنا ابوقتادہ رضی اللہ عنہ سے صرف اسی سند کے ساتھ مروی ہے اور ابوصخر رحمہ اللہ اسے بیان کرنے میں منفرد ہیں۔ [المعجم الأوسط/باب الألف/حدیث: 107]

سیدنا ابن عمر رضی اللہ عنہما سے روایت ہے کہ نبی صلی اللہ علیہ وسلم نے فرمایا: ”جب تم میں سے کوئی جمعہ کے لیے آئے تو اسے چاہیے کہ غسل کرے۔“
الیسع رحمہ اللہ سے یہ حدیث صرف عبد الملک رحمہ اللہ نے روایت کی ہے۔ [المعجم الأوسط/باب الألف/حدیث: 108]

سیدنا انس بن مالک رضی اللہ عنہ سے روایت ہے کہ ”نبی صلی اللہ علیہ وسلم کو جب کوئی (جسمانی) تکلیف ہوتی تو آپ صلی اللہ علیہ وسلم ایک مٹھی بھر «شُونِيز» (کلونجی) پھانک لیتے اور اس پر پانی اور شہد نوش فرماتے۔“
یہ حدیث نبی صلی اللہ علیہ وسلم سے صرف اسی سند کے ساتھ مروی ہے۔ [المعجم الأوسط/باب الألف/حدیث: 109]

سیدنا ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”مقابلے کا انعام حلال نہیں ہے مگر اونٹ کی دوڑ میں یا گھوڑے کی دوڑ میں۔“
اس حدیث کو ابو عبداللہ الجندعی رحمہ اللہ سے صرف سلیمان بن یسار رحمہ اللہ نے روایت کیا ہے، اور ابن یسار رحمہ اللہ سے صرف ابوالاسود محمد بن عبدالرحمن رحمہ اللہ نے؛ جبکہ عبیداللہ رحمہ اللہ سے اسے روایت کرنے میں لیث بن سعد رحمہ اللہ منفرد ہیں۔ [المعجم الأوسط/باب الألف/حدیث: 110]