سیدنا اسود بن خلف رضی اللہ عنہ بیان کرتے ہیں: ”میں نے نبی کریم صلی اللہ علیہ وسلم کو قرنِ مسفلہ کے مقام پر لوگوں سے بیعت لیتے ہوئے دیکھا، آپ صلی اللہ علیہ وسلم کے پاس مرد، عورتیں، چھوٹے اور بڑے آئے اور انہوں نے اسلام اور شہادت پر آپ صلی اللہ علیہ وسلم سے بیعت کی۔“ (راوی کہتے ہیں) میں نے پوچھا: ”شہادت سے کیا مراد ہے؟“ تو مجھے محمد بن اسود رحمہ اللہ نے بتایا: ”اس بات کی گواہی پر کہ اللہ کے سوا کوئی معبود نہیں اور محمد صلی اللہ علیہ وسلم اللہ کے رسول ہیں۔“
امام طبرانی رحمہ اللہ فرماتے ہیں: ”یہ حدیث اسود رضی اللہ عنہ سے صرف اسی سند سے مروی ہے، اس میں ابن جریج منفرد ہیں۔“ [المعجم الأوسط/باب الألف/حدیث: 2418]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”صفیں مکمل کیا کرو، پھر اگر کوئی کمی رہ جائے تو وہ پچھلی صف میں ہو۔“
امام طبرانی رحمہ اللہ فرماتے ہیں: ”اس حدیث کو سعید سے ابو عاصم کے سوا کسی نے روایت نہیں کیا۔“ [المعجم الأوسط/باب الألف/حدیث: 2419]

سیدنا عبداللہ بن عباس رضی اللہ عنہما سے روایت ہے کہ انہوں نے فرمایا: ”رسول اللہ صلی اللہ علیہ وسلم نے صرف خالص ریشم سے منع فرمایا ہے، لیکن جس کپڑے کا تانا یا بانا ریشم کا ہو (اور باقی دوسرا دھاگا ریشم کا نہ ہو) تو اس کے پہننے میں کوئی حرج نہیں، اور آپ صلی اللہ علیہ وسلم نے چاندی کے برتن (کے استعمال) سے منع فرمایا۔“
امام طبرانی رحمہ اللہ فرماتے ہیں: ”اس حدیث کو خصیف سے، سعید اور عکرمہ کے واسطے سے، ابن جریج کے سوا کسی نے روایت نہیں کیا۔“ [المعجم الأوسط/باب الألف/حدیث: 2420]

سیدنا عبداللہ بن قرط رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ کے نزدیک سب دنوں میں افضل دن یومِ نحر (دسویں ذوالحجہ) ہے، پھر یومِ قر کا درجہ ہے۔“ یومِ قر وہ دن ہے جس میں لوگ (منیٰ میں) ٹھہرتے ہیں اور یہ یومِ نحر کے بعد والا دن ہے۔
(سیدنا عبداللہ بن قرط رضی اللہ عنہ بیان کرتے ہیں:) رسول اللہ صلی اللہ علیہ وسلم کے سامنے پانچ یا چھ اونٹنیاں پیش کی گئیں، تو وہ آپ صلی اللہ علیہ وسلم کی طرف بڑھنے لگیں کہ آپ صلی اللہ علیہ وسلم ان میں سے کس سے ابتدا فرماتے ہیں۔ پھر جب وہ (نحر کے بعد) پہلوؤں کے بل گر پڑیں تو رسول اللہ صلی اللہ علیہ وسلم نے ایک آہستہ سی بات فرمائی جو میں سمجھ نہ سکا۔ میں نے اپنے پہلو میں موجود شخص سے پوچھا: ”آپ صلی اللہ علیہ وسلم نے کیا فرمایا؟“ اس نے کہا: ”آپ صلی اللہ علیہ وسلم نے فرمایا: ”جو چاہے (اس میں سے) کاٹ لے۔““
امام طبرانی رحمہ اللہ فرماتے ہیں: ”یہ حدیث عبداللہ بن قرط رضی اللہ عنہ سے اسی سند کے ساتھ ہی مروی ہے، اس میں ثور منفرد ہیں۔“
(حاشیہ: دارالحرمین کے مطبوعہ نسخے میں اسی طرح ہے، جبکہ درست «عبداللہ بن لحی» ہے، جیسا کہ تخریج کے مصادر میں ہے۔) [المعجم الأوسط/باب الألف/حدیث: 2421]

سیدنا عرباض بن ساریہ رضی اللہ عنہ سے روایت ہے کہ نبی کریم صلی اللہ علیہ وسلم نے خیبر کے دن ہر کچلی والے درندے سے، اور پنجے سے شکار کرنے والے ہر پرندے سے منع فرمایا، اور مجثمہ (باندھ کر نشانہ بنائے گئے جانور) سے منع فرمایا، نیز اس بات سے بھی منع فرمایا کہ حاملہ عورتوں (قیدی لونڈیوں) سے وطی کی جائے یہاں تک کہ وہ اپنے پیٹ کا بچہ جَن لیں۔ [المعجم الأوسط/باب الألف/حدیث: 2422]

اسی سند سے مروی ہے کہ نبی کریم صلی اللہ علیہ وسلم نے مالِ فَے میں سے اونٹ کا ایک بال اٹھایا اور فرمایا: ”اس مال میں سے میرے لیے صرف اتنا ہی ہے جتنا تم میں سے کسی ایک کے لیے ہے، سوائے خمس کے، اور وہ بھی تم ہی پر لوٹا دیا جاتا ہے۔ لہٰذا دھاگا اور سوئی تک واپس کر دو، اور خیانت (مالِ غنیمت میں چوری) سے بچو، کیونکہ وہ عار، بدنامی اور آگ ہے۔“
امام طبرانی رحمہ اللہ فرماتے ہیں: ”یہ دونوں حدیثیں سیدنا عرباض رضی اللہ عنہ سے اسی سند کے ساتھ ہی مروی ہیں، ان میں ابو عاصم منفرد ہیں۔“ [المعجم الأوسط/باب الألف/حدیث: 2423]

سیدنا ابو الطفیل رضی اللہ عنہ بیان کرتے ہیں: ”میں ایک لڑکا تھا اور اونٹ کا ایک عضو (گوشت کا ٹکڑا) اٹھائے ہوئے تھا، تو میں نے رسول اللہ صلی اللہ علیہ وسلم کو جعرانہ میں گوشت تقسیم کرتے دیکھا۔ اتنے میں ایک خاتون آپ صلی اللہ علیہ وسلم کے پاس آئی تو آپ صلی اللہ علیہ وسلم نے اس کے لیے اپنی چادر بچھا دی۔ میں نے پوچھا: ”یہ کون ہیں؟“ کہا گیا: ”یہ آپ صلی اللہ علیہ وسلم کی وہ ماں ہیں جنہوں نے آپ صلی اللہ علیہ وسلم کو دودھ پلایا تھا۔“
امام طبرانی رحمہ اللہ فرماتے ہیں: ”یہ حدیث ابو الطفیل رضی اللہ عنہ سے اسی سند کے ساتھ ہی مروی ہے، اس میں ابو عاصم منفرد ہیں۔“ [المعجم الأوسط/باب الألف/حدیث: 2424]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”مردوں کی صفوں میں بہترین پہلی صف ہے اور بدترین آخری صف، اور عورتوں کی صفوں میں بہترین آخری صف ہے اور بدترین پہلی صف۔“
امام طبرانی رحمہ اللہ فرماتے ہیں: ”یہ حدیث سیدنا ابن عباس رضی اللہ عنہما سے اسی سند کے ساتھ ہی مروی ہے، اس میں ابو عاصم منفرد ہیں۔“ [المعجم الأوسط/باب الألف/حدیث: 2425]

سیدنا ابو شیبہ خدری رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو فرماتے ہوئے سنا: ”جس نے «لَا إِلَهَ إِلَّا اللهُ» کہا، وہ جنت میں داخل ہو گیا۔“
امام طبرانی رحمہ اللہ فرماتے ہیں: ”یہ حدیث ابو شیبہ رضی اللہ عنہ سے اسی سند کے ساتھ ہی روایت کی جاتی ہے، اس میں ابو عاصم منفرد ہیں۔“ [المعجم الأوسط/باب الألف/حدیث: 2426]

سیدنا ابو موسیٰ اشعری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”سواری کے جانور کی پیٹھ پر نماز (نفل) اس طرح، اس طرح اور اس طرح (یعنی جس رخ سواری کا منہ ہو اسی طرف) پڑھی جا سکتی ہے۔“ [المعجم الأوسط/باب الألف/حدیث: 2427]