سیدنا جابر بن عبد اللہ رضی اللہ عنہما سے روایت ہے، وہ اسے نبی کریم صلی اللہ علیہ وسلم تک پہنچاتے ہیں، آپ صلی اللہ علیہ وسلم نے فرمایا: ”جو شخص اللہ کی رضا کی طلب میں قتل کیا گیا، اللہ اسے عذاب نہیں دے گا۔“
امام طبرانی رحمہ اللہ فرماتے ہیں: ”محمد بن سوقہ سے یہ حدیث صرف عبد اللہ بن بکیر نے روایت کی ہے۔“ [المعجم الأوسط/باب الميم/حدیث: 5621]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے بیع غرر (دھوکے اور غیر یقینی والی خرید و فروخت) سے منع فرمایا۔
امام طبرانی رحمہ اللہ فرماتے ہیں: ”عطاء سے یہ حدیث صرف ابن ابی لیلی نے روایت کی ہے اور ابن ابی لیلی سے صرف مطلب بن زیاد نے، اس میں ضرار بن صرد منفرد ہیں۔“ [المعجم الأوسط/باب الميم/حدیث: 5622]

سیدنا بریدہ رضی اللہ عنہ سے روایت ہے کہ رسول اللہ صلی اللہ علیہ وسلم نے ہمیں حکم دیا کہ ہم ہر ہفتے میں ایک بار غسل کریں، یعنی جمعہ کے دن۔
امام طبرانی رحمہ اللہ فرماتے ہیں: ”یہ حدیث سیدنا بریدہ رضی اللہ عنہ سے صرف اسی سند سے مروی ہے، اس میں ابو ہلال منفرد ہیں۔“ [المعجم الأوسط/باب الميم/حدیث: 5623]

سیدنا ابن ابی اوفی رضی اللہ عنہ سے روایت ہے کہ رسول اللہ صلی اللہ علیہ وسلم اپنی نماز میں یہ دعا پڑھا کرتے تھے: «رَبَّنَا لَكَ الْحَمْدُ، مِلْءَ السَّمَاوَاتِ وَمِلْءَ الْأَرْضِ، وَمِلْءَ مَا شِئْتَ مِنْ شَيْءٍ بَعْدُ» ”اے ہمارے رب! تیرے ہی لیے تمام تعریف ہے، آسمانوں کے بھر جانے کے برابر، زمین کے بھر جانے کے برابر، اور اس کے بعد ہر اس چیز کے بھر جانے کے برابر جو تو چاہے۔“ [المعجم الأوسط/باب الميم/حدیث: 5624]

سیدنا عبداللہ بن مسعود رضی اللہ عنہ بیان کرتے ہیں: ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم کے گھر آپ صلی اللہ علیہ وسلم کی بائیں جانب تھے، چنانچہ جب آپ صلی اللہ علیہ وسلم نماز پڑھ لیتے تو بائیں جانب اپنے گھروں کی طرف مڑ جاتے۔“
امام طبرانی رحمہ اللہ فرماتے ہیں: ”ان دونوں حدیثوں کو بکر بن وائل سے صرف یعلیٰ بن حارث نے روایت کیا ہے، اور یعلیٰ سے صرف ان کے بیٹے نے، ان دونوں میں ابو کریب منفرد ہیں۔“ [المعجم الأوسط/باب الميم/حدیث: 5625]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جسے یہ بات خوش کرے کہ اللہ اس کے رزق میں کشادگی فرمائے اور اس کی عمر میں درازی کرے تو وہ اپنے رشتہ داروں سے صلہ رحمی کرے۔“
امام طبرانی رحمہ اللہ فرماتے ہیں: ”اس حدیث کو عمرو بن حارث سے صرف رشدین بن سعد نے روایت کیا ہے۔“ [المعجم الأوسط/باب الميم/حدیث: 5626]

سیدنا علی بن ابی طالب رضی اللہ عنہ فرماتے ہیں: ”میں نے رسول اللہ صلی اللہ علیہ وسلم کو سیدنا سعد رضی اللہ عنہ کے سوا کسی کے لیے اپنے ماں باپ دونوں کو جمع کرتے نہیں سنا، آپ صلی اللہ علیہ وسلم نے غزوۂ احد کے دن ان سے فرمایا: ’تیر چلاؤ، میرے ماں باپ تم پر قربان۔‘“
امام طبرانی رحمہ اللہ فرماتے ہیں: ”اس حدیث کو شریک سے صرف معمر بن بکار سعدی نے روایت کیا ہے۔“ [المعجم الأوسط/باب الميم/حدیث: 5627]

ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”قیامت کے دن ہر عہد شکن کے لیے ایک جھنڈا ہوگا۔ مسلمانوں کا دیا ہوا امان و ذمہ ایک ہی ہے، ان کا ادنیٰ شخص بھی اس (امان) کو دے سکتا ہے۔ جس نے کسی مسلمان کے عہد و پناہ کو توڑا تو اس پر اللہ تعالیٰ، فرشتوں اور تمام لوگوں کی لعنت ہے، قیامت کے دن اس سے نہ کوئی فرض قبول کیا جائے گا اور نہ نفل۔“
امام طبرانی رحمہ اللہ فرماتے ہیں: ”ابو سعد بقال سے یہ حدیث صرف ہاشم نے روایت کی ہے، اس میں ضرار بن صرد منفرد ہیں۔“ [المعجم الأوسط/باب الميم/حدیث: 5628]

سیدنا ابو ہریرہ رضی اللہ عنہ سے روایت ہے کہ نبی صلی اللہ علیہ وسلم پر جب وحی نازل ہوتی تو آپ صلی اللہ علیہ وسلم کو سر درد ہو جاتا، چنانچہ آپ صلی اللہ علیہ وسلم اپنے سر پر مہندی کا لیپ کر لیتے۔
امام طبرانی رحمہ اللہ فرماتے ہیں: ”یہ حدیث سعید بن مسیب رحمہ اللہ سے صرف ابو عون نے روایت کی ہے، اور ابو عون سے صرف احوص نے، اور احوص سے صرف سلیمان بن حکم بن عوانہ نے روایت کی ہے، اس میں محمد بن ابی سمینہ منفرد ہیں۔“ [المعجم الأوسط/باب الميم/حدیث: 5629]

سیدنا ابو ہریرہ رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو فرماتے ہوئے سنا: ”عہد شکن کے لیے (قیامت کے دن) ایک جھنڈا گاڑا جائے گا، پھر کہا جائے گا: یہ فلاں فلاں معاملے میں (عہد شکن) تھا اور اس نے اس میں یہ یہ کیا۔“
امام طبرانی رحمہ اللہ فرماتے ہیں: ”یہ حدیث عطیہ کے واسطے سے سیدنا ابو ہریرہ رضی اللہ عنہ سے صرف عمرو بن عطیہ نے روایت کی ہے، اس میں عبداللہ بن یحییٰ منفرد ہیں، جبکہ لوگوں نے اسے عطیہ کے واسطے سے سیدنا ابو سعید خدری رضی اللہ عنہ سے روایت کیا ہے۔“ [المعجم الأوسط/باب الميم/حدیث: 5630]