سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”وقفے وقفے سے ملاقات کیا کرو، محبت بڑھے گی۔“
امام طبرانی رحمہ اللہ فرماتے ہیں: ”اس حدیث کو ابن جریج رحمہ اللہ سے منصور بن اسماعیل کے سوا کسی نے روایت نہیں کیا۔“ [المعجم الأوسط/باب الميم/حدیث: 5641]

ام المومنین سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے سیدہ صفیہ رضی اللہ عنہا کو آزاد کیا اور ان کی آزادی ہی کو ان کا مہر مقرر فرمایا اور پھر ان سے نکاح کر لیا۔
امام طبرانی رحمہ اللہ فرماتے ہیں: ”اس حدیث کو ایوب رحمہ اللہ سے حماد بن زید کے سوا کسی نے روایت نہیں کیا، اور اس میں یونس مؤدب منفرد ہیں۔“ [المعجم الأوسط/باب الميم/حدیث: 5642]

سیدنا علی بن ابی طالب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”صدقہ دینے میں جلدی کیا کرو، کیونکہ مصیبت صدقے کو پھلانگ کر آگے نہیں بڑھ سکتی۔“
امام طبرانی رحمہ اللہ فرماتے ہیں: ”یہ حدیث سیدنا علی رضی اللہ عنہ سے صرف اسی سند سے مروی ہے۔“ [المعجم الأوسط/باب الميم/حدیث: 5643]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”حسن اور حسین جنتی نوجوانوں کے سردار ہیں۔“
امام طبرانی رحمہ اللہ فرماتے ہیں: ”اس حدیث کو صفوان بن سلیم سے صرف دراوردی نے روایت کیا ہے، اور اس میں حرب بن حسن منفرد ہیں۔“ [المعجم الأوسط/باب الميم/حدیث: 5644]

سیدنا عبداللہ بن عمر رضی اللہ عنہما سے روایت ہے کہ جب یہ آیت نازل ہوئی: ﴿مَثَلُ الَّذِينَ يُنْفِقُونَ أَمْوَالَهُمْ فِي سَبِيلِ اللَّهِ كَمَثَلِ حَبَّةٍ أَنْبَتَتْ سَبْعَ سَنَابِلَ فِي كُلِّ سُنْبُلَةٍ مِائَةُ حَبَّةٍ﴾ (جو لوگ اپنے مال اللہ کی راہ میں خرچ کرتے ہیں ان کی مثال اس دانے کی سی ہے جس سے سات بالیاں اگیں، ہر بالی میں سو دانے ہوں) تو رسول اللہ صلی اللہ علیہ وسلم نے دعا کی: ”اے میرے رب! میری امت کو اور زیادہ عطا فرما۔“ تو یہ آیت نازل ہوئی: ﴿مَنْ ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ أَضْعَافًا كَثِيرَةً﴾ (کون ہے جو اللہ کو قرضِ حسنہ دے تاکہ وہ اسے اس کے لیے کئی گنا بڑھا دے)۔ آپ صلی اللہ علیہ وسلم نے پھر عرض کیا: ”اے میرے رب! میری امت کو اور زیادہ عطا فرما۔“ تو یہ آیت نازل ہوئی: ﴿إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ﴾ (صبر کرنے والوں کو ان کا اجر بے حساب پورا پورا دیا جائے گا)۔
امام طبرانی رحمہ اللہ فرماتے ہیں: ”اس حدیث کو نافع سے صرف عیسیٰ بن مسیب نے روایت کیا ہے، اور عیسیٰ سے صرف ابو اسماعیل مؤدب نے، اور اس میں حفص بن عمر دوری منفرد ہیں۔“ [المعجم الأوسط/باب الميم/حدیث: 5645]

سیدنا ابو قتادہ انصاری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”یومِ عرفہ کا روزہ دو سال کا کفارہ ہے: ایک گزشتہ سال کا اور ایک آئندہ سال کا، اور عاشورا کا روزہ ایک سال کا کفارہ ہے۔“
امام طبرانی رحمہ اللہ فرماتے ہیں: ”اس حدیث کو ابن ابی لیلیٰ سے، انہوں نے عطاء بن ابی رباح سے، انہوں نے ابو الطفیل سے، انہوں نے ابو قتادہ سے صرف قیس بن ربیع نے روایت کیا ہے، اور اس میں ابو زید نحوی منفرد ہیں، جبکہ لوگوں نے اسے ابن ابی لیلیٰ سے، انہوں نے عطاء سے، انہوں نے ابو الخلیل سے، انہوں نے ابو قتادہ سے روایت کیا ہے۔“ [المعجم الأوسط/باب الميم/حدیث: 5646]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”زانی جب زنا کرتا ہے تو اس وقت وہ مومن نہیں رہتا، اور شراب پینے والا جب شراب پیتا ہے تو اس وقت وہ مومن نہیں رہتا، لیکن توبہ کا دروازہ کھلا ہوا ہے۔“
امام طبرانی رحمہ اللہ فرماتے ہیں: ”اس حدیث کو ہارون بن سعد سے صرف عبدالرحیم بن ہارون نے روایت کیا ہے۔“ [المعجم الأوسط/باب الميم/حدیث: 5647]

سیدنا کعب بن عجرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کیا میں تمہیں نہ بتاؤں کہ تمہارے مردوں میں سے جنتی کون ہیں؟ نبی جنت میں ہوں گے، صدیق جنت میں ہوں گے، شہید جنت میں ہوگا، اور وہ آدمی بھی جنت میں ہوگا جو شہر کے کسی دور کے کنارے میں رہنے والے اپنے بھائی سے اللہ کی خاطر ملنے جاتا ہے۔ کیا میں تمہیں نہ بتاؤں کہ تمہاری عورتوں میں سے جنتی کون ہیں؟ وہ عورت جو بہت بچے جننے والی، بہت محبت کرنے والی ہو، اور جب وہ خود کسی پر ظلم کر بیٹھے یا اس پر ظلم ہو تو (اپنے شوہر سے) کہے: یہ میرا ہاتھ آپ کے ہاتھ میں ہے، جب تک آپ راضی نہ ہو جائیں میں آنکھ بند کر کے سوؤں گی نہیں۔“
امام طبرانی رحمہ اللہ فرماتے ہیں: ”اس حدیث کو شعبی رحمہ اللہ سے سری بن اسماعیل کے سوا کسی نے روایت نہیں کیا، اور سری سے محمد بن خالد ضبی کے سوا کسی نے روایت نہیں کیا، اس میں سعید بن خثیم منفرد ہیں، اور کعب بن عجرہ رضی اللہ عنہ سے یہ حدیث اسی سند کے سوا مروی نہیں۔“ [المعجم الأوسط/باب الميم/حدیث: 5648]

سیدنا کعب بن عجرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص کسی مومن کی تکلیفوں میں سے کوئی تکلیف دور کرے، اللہ تعالیٰ قیامت کے دن اس کی تکلیفیں دور فرمائے گا۔ اور جو شخص کسی مومن کے عیب کی پردہ پوشی کرے، اللہ اس کے عیب پر پردہ ڈال دے گا۔ اور جو شخص کسی مومن کی مشکلات میں آسانی پیدا کرے، اللہ اس کی مشکل میں آسانی پیدا فرما دے گا۔“
امام طبرانی رحمہ اللہ فرماتے ہیں: ”اس حدیث کو محمد بن کعب رحمہ اللہ سے لیث کے سوا کسی نے روایت نہیں کیا، اس میں شعیب انماطی منفرد ہیں۔“ [المعجم الأوسط/باب الميم/حدیث: 5649]

سیدنا جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے کچھ لوگوں کو دیکھا جو وضو کر چکے تھے (اور ان کی ایڑیاں خشک رہ گئی تھیں)، تو آپ صلی اللہ علیہ وسلم نے فرمایا: ”ان ایڑیوں کے لیے آگ سے بڑی ہلاکت ہے۔“
امام طبرانی رحمہ اللہ فرماتے ہیں: ”اس حدیث کو حسن بن صالح رحمہ اللہ سے عبدالرحمن بن ابی حماد کے سوا کسی نے روایت نہیں کیا، اس میں ابو الاسباط منفرد ہیں۔“
دار الحرمین کے نسخے میں یوں ہی ہے، جبکہ درست نام ”عمار بن رزیق“ ہے۔ [المعجم الأوسط/باب الميم/حدیث: 5650]