سیدنا عبدالرحمن بن عوف رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”چور پر جب حد قائم کر دی جائے تو اس سے تاوان نہیں لیا جائے گا۔“
امام طبرانی رحمہ اللہ فرماتے ہیں: ”یہ حدیث عبدالرحمن بن عوف رضی اللہ عنہ سے صرف اسی سند سے مروی ہے، اس میں مفضل بن فضالہ منفرد ہیں، اور اس کی سند متصل نہیں، کیونکہ مسور نے اپنے دادا سے نہیں سنا۔“ [المعجم الأوسط/باب الواو/حدیث: 9274]

ام المومنین سیدہ عائشہ رضی اللہ عنہا سے روایت ہے کہ نماز جب سب سے پہلے فرض کی گئی تو دو رکعتیں فرض ہوئی تھیں، پھر حضر (اقامت) کی نماز میں اضافہ کر دیا گیا اور سفر کی نماز دو رکعتوں پر برقرار رکھی گئی۔
امام طبرانی رحمہ اللہ فرماتے ہیں: ”اس حدیث کو جعفر بن ربیعہ رحمہ اللہ سے بکر بن مضر رحمہ اللہ کے سوا کسی نے روایت نہیں کیا۔“ [المعجم الأوسط/باب الواو/حدیث: 9275]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم ابن صیاد کے پاس سے گزرے، وہ لڑکوں کے ساتھ کھیل رہا تھا، آپ صلی اللہ علیہ وسلم نے اسے پہچان لیا اور اسے آگے بلایا، پھر فرمایا: ”کیا تو گواہی دیتا ہے کہ میں اللہ کا رسول ہوں؟“ ابن صیاد نے کہا: ”میں گواہی دیتا ہوں کہ آپ امیوں کے نبی ہیں، تو کیا آپ گواہی دیتے ہیں کہ میں اللہ کا رسول ہوں؟“ تو رسول اللہ صلی اللہ علیہ وسلم نے فرمایا: ”میں اللہ پر اور اس کے رسولوں پر ایمان لایا۔“
امام طبرانی رحمہ اللہ فرماتے ہیں: ”اس حدیث کو نافع سے، انھوں نے سالم سے، ضحاک کے سوا کسی نے روایت نہیں کیا، اور مغیرہ بن عبدالرحمن اسے روایت کرنے میں منفرد ہیں۔“ [المعجم الأوسط/باب الواو/حدیث: 9276]

سیدنا ابو زہیر انماری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”ٹڈیوں کو مت مارو، کیونکہ یہ اللہ کا سب سے بڑا لشکر ہیں۔“
امام طبرانی رحمہ اللہ فرماتے ہیں: ”یہ حدیث ابو زہیر رضی اللہ عنہ سے صرف اسی سند سے مروی ہے، اسماعیل بن عیاش اس میں منفرد ہیں۔“ [المعجم الأوسط/باب الواو/حدیث: 9277]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اہلِ زمین کے اعمال نامے ہر پیر اور جمعرات کو اہلِ آسمان کے دفتروں میں نقل کیے جاتے ہیں، پھر ہر اس مسلمان کی مغفرت کر دی جاتی ہے جو اللہ کے ساتھ کسی کو شریک نہیں ٹھہراتا، سوائے اس آدمی کے جس کے اور اس کے بھائی کے درمیان کینہ و عداوت ہو۔“
امام طبرانی رحمہ اللہ فرماتے ہیں: ”اس حدیث کو منصور سے عمرو بن ابی قیس کے سوا کسی نے روایت نہیں کیا، اور نہ عمرو سے عبدالصمد بن عبدالعزیز کے سوا کسی نے، اور اس میں محمد بن عمار منفرد ہیں۔“ [المعجم الأوسط/باب الواو/حدیث: 9278]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم جمعہ کی نماز میں (پہلی رکعت میں) جو کچھ پڑھا کرتے تھے ان میں سورۂ جمعہ بھی ہوتی تھی، جس کے ذریعے آپ صلی اللہ علیہ وسلم مومنوں کو (نیکی پر) ابھارتے تھے، اور دوسری رکعت میں سورۂ منافقون پڑھتے، جس سے آپ صلی اللہ علیہ وسلم منافقوں کو خوف زدہ کرتے تھے۔
امام طبرانی رحمہ اللہ فرماتے ہیں: ”اس حدیث کو منصور سے عمرو بن ابی قیس کے سوا کسی نے روایت نہیں کیا۔“ [المعجم الأوسط/باب الواو/حدیث: 9279]

سیدنا عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تین قسم کے لوگوں کو (قیامت کی) گھبراہٹ خوف زدہ نہیں کرے گی اور نہ انھیں حساب سے سابقہ پڑے گا، وہ مشک کے ایک ٹیلے پر ہوں گے یہاں تک کہ اللہ تعالیٰ بندوں کے حساب سے فارغ ہو جائے: ایک وہ آدمی جس نے اللہ کی رضا کی خاطر قرآن پڑھا، پھر اس کے ذریعے ایسی قوم کی امامت کی جو اس سے راضی تھی؛ دوسرا وہ اذان دینے والا جو اللہ کی رضا کی خاطر پانچوں نمازوں کی طرف بلاتا ہے؛ اور تیسرا وہ بندہ جس نے اپنے اور اپنے رب کے معاملے میں بھی اچھائی کی اور اپنے اور اپنے آقاؤں کے معاملے میں بھی۔“
امام طبرانی رحمہ اللہ فرماتے ہیں: ”اس حدیث کو بشیر بن عاصم سے عمرو بن ابی قیس کے سوا کسی نے روایت نہیں کیا، اور اسے ثوری رحمہ اللہ نے ابو الیقظان سے، انھوں نے زاذان سے، انھوں نے سیدنا ابن عمر رضی اللہ عنہما سے روایت کیا ہے۔“ [المعجم الأوسط/باب الواو/حدیث: 9280]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے جان بوجھ کر مجھ پر جھوٹ باندھا، وہ اپنا ٹھکانا جہنم میں بنا لے۔“
امام طبرانی رحمہ اللہ فرماتے ہیں: ”اس حدیث کو ابن ابی ذئب سے جارودی کے سوا کسی نے روایت نہیں کیا، اور اس میں محمد بن عمار منفرد ہیں۔“ [المعجم الأوسط/باب الواو/حدیث: 9281]

سیدنا انس بن مالک رضی اللہ عنہ نے نبی کریم صلی اللہ علیہ وسلم سے روایت کیا کہ آپ صلی اللہ علیہ وسلم نے فرمایا: ”اگر مومن کسی بل میں (بھی چھپا) ہو تو اللہ تعالیٰ اس میں بھی کسی ایسے شخص کو اس پر مسلط کر دے گا جو اسے تکلیف پہنچائے۔“
امام طبرانی رحمہ اللہ فرماتے ہیں: ”اس حدیث کو زہری سے ان کے بھتیجے کے سوا کسی نے روایت نہیں کیا، اور نہ ان کے بھتیجے سے ابو قتادہ کے سوا کسی نے، اور اس میں عبدالرحمن بن عبدالملک بن شیبہ منفرد ہیں۔“ [المعجم الأوسط/باب الواو/حدیث: 9282]

عبد اللہ بن حارث رحمہ اللہ بیان کرتے ہیں کہ میں ام المومنین سیدہ عائشہ رضی اللہ عنہا کے پاس تھا اور ان کے پاس کعب احبار رحمہ اللہ بھی موجود تھے، انہوں نے اسرافیل علیہ السلام کا ذکر کیا تو سیدہ عائشہ رضی اللہ عنہا نے فرمایا: ”اے کعب! مجھے اسرافیل کے بارے میں بتائیے۔“ کعب رحمہ اللہ نے کہا: ”آپ کے پاس تو (خود) علم موجود ہے۔“ انہوں نے فرمایا: ”ہاں، (پھر بھی) آپ مجھے بتائیے۔“ کعب رحمہ اللہ نے کہا: ”ان کے چار پر ہیں؛ دو پر فضا میں پھیلے ہوئے ہیں، ایک پر کو انہوں نے اپنے بدن پر لباس کی طرح لپیٹ رکھا ہے اور ایک پر ان کے کندھے پر ہے، عرش ان کے کندھے پر ہے اور قلم ان کے کان پر ہے، چنانچہ جب وحی نازل ہوتی ہے تو قلم لکھتا ہے، پھر فرشتے اسے پڑھتے پڑھاتے ہیں۔ اور صور والا فرشتہ ایک گھٹنے کے بل بیٹھا ہے اور دوسرا گھٹنا کھڑا کیا ہوا ہے، اس نے صور کو منہ میں لے رکھا ہے، اس کی کمر جھکی ہوئی ہے اور اس کی نگاہ اسرافیل پر جمی ہوئی ہے، اسے حکم دیا گیا ہے کہ جب وہ اسرافیل کو دیکھے کہ انہوں نے اپنا پر سمیٹ لیا ہے تو صور پھونک دے۔“ تو سیدہ عائشہ رضی اللہ عنہا نے فرمایا: ”میں نے رسول اللہ صلی اللہ علیہ وسلم کو اسی طرح فرماتے ہوئے سنا ہے۔“
امام طبرانی رحمہ اللہ فرماتے ہیں: ”اس حدیث کو حماد بن زید سے مؤمل کے سوا کسی نے روایت نہیں کیا۔“ [المعجم الأوسط/باب الواو/حدیث: 9283]