حضرت انس رضی اللہ عنہ سے روایت ہے، انہوں نے فرمایا: (میری والدہ محترمہ) حضرت ام سلیم رضی اللہ عنہا کے پاس لکڑی کا ایک پیالہ تھا جس کے بارے میں وہ فرمایا کرتی تھیں کہ میں نے اس پیالے میں رسول اللہ صلی اللہ علیہ وسلم کو ہر قسم کا مشروب پلایا ہے؛ پانی بھی، شہد بھی، دودھ بھی اور نبیذ بھی۔ [سنن نسائي/كتاب الأشربة/حدیث: 5756]

حضرت عبدالرحمن بن ابزیٰ رضی اللہ عنہ سے روایت ہے کہ میں نے حضرت ابی بن کعب رضی اللہ عنہ سے نبیذ کے بارے میں پوچھا تو انہوں نے فرمایا: پانی پی، شہد پی، ستو پی اور دودھ پی جس کے ساتھ تیری پرورش ہوئی تھی۔ میں نے دوبارہ سوال کیا تو (غصے سے) فرمانے لگے: تو شراب پینا چاہتا ہے؟ تو شراب پینا چاہتا ہے؟ [سنن نسائي/كتاب الأشربة/حدیث: 5757]

حضرت (عبداللہ) ابن مسعود رضی اللہ عنہ نے فرمایا: اب لوگوں نے کئی قسم کے مشروب ایجاد کر لیے ہیں۔ میں نہیں جانتا، وہ کیا اور کیسے ہیں؟ بیس یا چالیس سال ہو گئے ہیں کہ میں نے پانی یا ستو کے علاوہ کوئی اور مشروب نہیں پیا۔ انہوں نے نبیذ کا ذکر نہیں فرمایا۔ [سنن نسائي/كتاب الأشربة/حدیث: 5758]

حضرت عبیدہ (سلمانی) رحمہ اللہ نے فرمایا کہ لوگوں نے بے شمار مشروبات بنا لیے ہیں، میں نہیں جانتا کہ وہ کون کون سے ہیں اور کیسے ہیں؟ میری حالت تو یہ ہے کہ بیس سال گزر چکے ہیں، میرے پاس پانی، دودھ اور شہد کے علاوہ کوئی اور مشروب نہیں ہوتا۔ [سنن نسائي/كتاب الأشربة/حدیث: 5759]

ابن شبرمہ رحمہ اللہ سے روایت ہے، انہوں نے کہا کہ حضرت طلحہ رضی اللہ عنہ نے نبیذ کے بارے میں کوفے والوں سے فرمایا کہ یہ ایسا فتنہ ہے کہ جس میں تمہارے چھوٹے پرورش پاتے ہیں اور تمہارے بڑے اسے پیتے پیتے کھوسٹ اور بوڑھے ہو جاتے ہیں۔ اور جب کوئی شادی ہوتی تو حضرت طلحہ اور حضرت زبید رضی اللہ عنہما لوگوں کو دودھ اور شہد پلایا کرتے تھے۔ حضرت طلحہ رضی اللہ عنہ سے کہا گیا کہ آپ لوگوں کو نبیذ کیوں نہیں پلاتے؟ انہوں نے فرمایا کہ میں پسند نہیں کرتا کہ میری وجہ سے کوئی مسلمان نشے میں آئے۔ [سنن نسائي/كتاب الأشربة/حدیث: 5760]

حضرت جریر رحمہ اللہ نے فرمایا: حضرت ابن شبرمہ رحمہ اللہ پانی اور دودھ کے علاوہ کوئی مشروب نہیں پیتے تھے۔ [سنن نسائي/كتاب الأشربة/حدیث: 5761]