حضرت ابراہیم (نخعی) رحمہ اللہ نے فرمایا: سلف کا مسلک یہ تھا کہ جو شخص کوئی مشروب پیے اور اسے نشہ محسوس ہو تو اس کے لیے اسے دوبارہ پینا جائز نہیں۔ [سنن نسائي/كتاب الأشربة/حدیث: 5750]

حضرت ابراہیم رحمہ اللہ سے مروی ہے کہ پختہ نبیذ (شیرے) میں کوئی حرج نہیں۔ [سنن نسائي/كتاب الأشربة/حدیث: 5751]

حضرت ابو مسکین رحمہ اللہ سے روایت ہے، انہوں نے کہا کہ میں نے حضرت ابراہیم نخعی رحمہ اللہ سے پوچھا کہ ہم شراب یا طلاء کی باقی ماندہ تلچھٹ کو لے کر اسے صاف کرتے ہیں، پھر اس میں منقیٰ بھگو کر تین دن تک پڑا رہنے دیتے ہیں، پھر اسے صاف کر کے چھوڑتے ہیں حتیٰ کہ وہ تیار ہو جاتی ہے، پھر ہم اسے پی لیتے ہیں، (کیا یہ درست ہے؟) انہوں نے کہا کہ مکروہ اور ناجائز ہے۔ [سنن نسائي/كتاب الأشربة/حدیث: 5752]

ابن شبرمہ رحمہ اللہ نے کہا: اللہ تعالیٰ ابراہیم (نخعی) رحمہ اللہ پر رحم فرمائے کہ لوگوں نے (نشہ آور) نبیذ کے بارے میں سختی کی ہے، مگر ابراہیم رحمہ اللہ نے اس کے پینے کی رخصت دی ہے۔ [سنن نسائي/كتاب الأشربة/حدیث: 5753]

حضرت ابو اسامہ رحمہ اللہ سے روایت ہے کہ میں نے عبداللہ بن مبارک رحمہ اللہ سے سنا، وہ فرما رہے تھے کہ میں نے ابراہیم نخعی رحمہ اللہ کے علاوہ کسی (صحابہ یا تابعی) سے نشہ آور «نَبِيذ» پینے کی رخصت صحیح سند کے ساتھ نہیں پائی۔ [سنن نسائي/كتاب الأشربة/حدیث: 5754]

حضرت ابواسامہ رحمہ اللہ نے فرمایا کہ میں نے شام کے تمام علاقوں، مصر، یمن اور حجاز میں کوئی شخص حضرت عبداللہ بن مبارک رحمہ اللہ سے بڑھ کر علم کا طالب نہیں پایا۔ [سنن نسائي/كتاب الأشربة/حدیث: 5755]