حضرت رفاعہ بن رافع زرقی رضی اللہ عنہ سے روایت ہے اور یہ ان لوگوں میں سے ہیں جو غزوہ بدر میں شریک تھے، انہوں نے فرمایا کہ حضرت جبریل علیہ السلام نے نبی صلی اللہ علیہ وسلم کے پاس آ کر پوچھا: ”آپ اہل بدر کو اپنے ہاں کیا مقام دیتے ہیں؟“ آپ صلی اللہ علیہ وسلم نے فرمایا: ”وہ سب مسلمانوں سے افضل ہیں۔“ یا اس کی مانند کوئی کلمہ ارشاد فرمایا۔ حضرت جبریل علیہ السلام نے کہا: ”اسی طرح وہ فرشتے جو غزوہ بدر میں حاضر ہوئے وہ بھی دیگر فرشتوں سے افضل ہیں۔“ [صحيح البخاري/كِتَاب الْمَغَازِي/حدیث: 3992]

حضرت رفاعہ بن رافع رضی اللہ عنہ سے روایت ہے اور وہ بدر کی لڑائی میں شریک ہوئے تھے جبکہ (ان کے والد) حضرت رافع رضی اللہ عنہ بیعت عقبہ کرنے والوں میں موجود تھے، وہ اپنے بیٹے (حضرت رفاعہ رضی اللہ عنہ) سے کہا کرتے تھے: ”بیعت عقبہ کی حاضری کے مقابلے میں مجھے بدر کی حاضری سے اتنی خوشی نہیں ہوئی۔“ انہوں نے بیان کیا کہ حضرت جبریل علیہ السلام نے نبی صلی اللہ علیہ وسلم سے اس بارے میں سوال کیا تھا۔ [صحيح البخاري/كِتَاب الْمَغَازِي/حدیث: 3993]

حضرت معاذ بن رفاعہ رضی اللہ عنہ سے روایت ہے کہ ”ایک فرشتے نے نبی صلی اللہ علیہ وسلم سے سوال کیا۔“ (راویِ حدیث) حضرت یحییٰ کہتے ہیں کہ ”جس دن معاذ بن رفاعہ انہیں یہ حدیث بیان کر رہے تھے وہ یزید بن ہاد کے ہمراہ تھے۔ یزید نے کہا: معاذ رضی اللہ عنہ نے بیان کیا کہ (رسول اللہ صلی اللہ علیہ وسلم سے) سوال کرنے والے حضرت جبریل علیہ السلام تھے۔“ [صحيح البخاري/كِتَاب الْمَغَازِي/حدیث: 3994]

حضرت ابن عباس رضی اللہ عنہما سے روایت ہے کہ نبی کریم صلی اللہ علیہ وسلم نے بدر کے دن فرمایا: ”یہ جبرائیل علیہ السلام ہیں جو اپنے گھوڑے کا سر تھامے لڑائی کے لیے ہتھیار لگائے ہوئے ہیں۔“ [صحيح البخاري/كِتَاب الْمَغَازِي/حدیث: 3995]