حضرت ابوحمید ساعدی سے روایت ہے کہ صحابہ رضی اللہ عنہم نے پوچھا آنحضرت صلی اللہ علیہ وسلم سے: یا رسول اللہ صلی اللہ علیہ وسلم ! کیونکر درود بھیجیں آپ پر؟ تو آپ صلی اللہ علیہ وسلم نے فرمایا: ”کہو، اے پروردگار رحمت اتار اپنی محمد صلی اللہ علیہ وسلم اور ان کی بیبیوں اور آل پر جیسے رحمت کی تو نے ابراہیم علیہ السلام پر، اور برکت اتار محمد صلی اللہ علیہ وسلم اور ان کی بیبیوں پر اور آل پر جیسے تو نے برکت اتاری ابراہیم علیہ السلام کی اولاد پر، بے شک تو تعریف کے لائق اور بڑا ہے۔“

سیدنا ابومسعود انصاری رضی اللہ عنہ سے روایت ہے کہ رسول اللہ صلی اللہ علیہ وسلم آئے ہمارے پاس سیدنا سعد بن عبادہ رضی اللہ عنہ کے مکان میں، تو کہا آپ صلی اللہ علیہ وسلم سے سیدنا بشیر بن سعد رضی اللہ عنہ نے: حکم کیا ہم کو اللہ جل جلالہُ نے درود بھیجنے کا آپ صلی اللہ علیہ وسلم پر، تو کیونکر درود بھیجیں آپ صلی اللہ علیہ وسلم پر۔ پس چپ ہو رہے آپ صلی اللہ علیہ وسلم یہاں تک کہ ہم کو تمنا ہوئی کہ کاش نہ پوچھتے آپ صلی اللہ علیہ وسلم سے۔ پھر فرمایا آپ صلی اللہ علیہ وسلم نے: ”کہو: «اَللّٰهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ، وَبَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى آلِ إِبْرَاهِيمَ فِي الْعَالَمِينَ، إِنَّكَ حَمِيدٌ مَجِيدٌ» اور سلام بھیجنے کی ترکیب جیسے تم جان چکے ہو۔“

عبداللہ بن دینار سے روایت ہے کہ میں نے دیکھا سیدنا عبداللہ بن عمر رضی اللہ عنہما کو کھڑے ہوتے تھے نبی صلی اللہ علیہ وسلم کی قبر پر، پھر درود بھیجتے تھے آپ صلی اللہ علیہ وسلم پر اور سیدنا ابوبکر رضی اللہ عنہ اور سیدنا عمر رضی اللہ عنہ پر۔