حضرت براء بن عازب سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ اللہ تعالیٰ اور اس کے فرشتے پہلی صف پر رحمت بھیجتے ہیں۔ [مصنف ابن ابي شيبه/كتاب الصلوات/حدیث: 3842]

حضرت براء بن عازت سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ اللہ تعالیٰ اور اس کے فرشتے اگلی صفوں پر رحمت بھیجتے ہیں۔ [مصنف ابن ابي شيبه/كتاب الصلوات/حدیث: 3843]

حضرت براء بن عازب فرماتے ہیں کہ اللہ تعالیٰ اور اس کے فرشتے پہلی صف پر رحمت بھیجتے ہیں۔ [مصنف ابن ابي شيبه/كتاب الصلوات/حدیث: 3844]

حضرت عروہ فرماتے ہیں کہ کہا جاتا تھا کہ آدمیوں کی بہترین صفیں اگلی صفیں ہیں اور عورتوں کی بدترین صفیں اگلی صفیں ہیں۔ [مصنف ابن ابي شيبه/كتاب الصلوات/حدیث: 3845]

حضرت زاذان فرماتے ہیں کہ اگر لوگوں کو معلوم ہوجائے کہ اگلی صف میں کیا ہے تو وہ اس کے لئے قرعہ اندازی کرنے لگیں۔ [مصنف ابن ابي شيبه/كتاب الصلوات/حدیث: 3846]

حضرت عروہ فرماتے ہیں کہ کہا جاتا تھا کہ اللہ تعالیٰ اور اس کے فرشتے ان لوگوں پر رحمت بھیجتے ہیں جو اگلی صفوں میں نماز پڑھتے ہیں۔ [مصنف ابن ابي شيبه/كتاب الصلوات/حدیث: 3847]

حضرت داود بن ابی ہند فرماتے ہیں کہ ایک آدمی نبی کریم صلی اللہ علیہ وآلہ وسلم کی خدمت میں حاضر ہوا اور عرض کیا کہ اے اللہ کے رسول! مجھے کوئی ایسا عمل بتائیے جسے میں کیا کروں۔ آپ نے فرمایا کہ اپنی قوم کا امام بن جاؤ۔ انہوں نے کہا کہ اگر میں اس کی طاقت نہ رکھوں؟ آپ نے فرمایا کہ پھر تم ان کے مؤذن بن جاؤ۔ اس نے کہا کہ اگر میں اس کی بھی طاقت نہ رکھوں؟ آپ نے فرمایا کہ پھر پہلی صف میں کھڑے ہوجاؤ۔ [مصنف ابن ابي شيبه/كتاب الصلوات/حدیث: 3848]

حضرت حصین فرماتے ہیں کہ میں حضرت عبد اللہ بن شداد کے ساتھ تھا، میں نے نماز کے لئے اقامت کہی۔ وہ کہنے لگے آگے ہوجاؤ، آگے ہوجاؤ۔ کیونکہ کہاجاتا تھا کہ اللہ تعالیٰ اور اس کے فرشتے اگلی صفوں پر رحمت بھیجتے ہیں۔ [مصنف ابن ابي شيبه/كتاب الصلوات/حدیث: 3849]

حضرت عامر بن مسعود قرشی سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ اگر لوگوں کو معلوم ہوجائے کہ پہلی صف میں کیا ہے تو قرعہ اندازی کرکے اس میں جگہ بنائیں۔ [مصنف ابن ابي شيبه/كتاب الصلوات/حدیث: 3850]

حضرت عرباض بن ساریہ (جو کہ اصحاب صفہ میں سے ہیں) فرماتے ہیں نبی کریم صلی اللہ علیہ وآلہ وسلم اگلی صف پر تین مرتبہ رحمت بھیجتے تھے اور دوسری صف پر ایک مرتبہ۔ [مصنف ابن ابي شيبه/كتاب الصلوات/حدیث: 3851]